नागपूर मनपाच्या परिसरातून नोकरीच्या नावाखाली फसवणूक, शांतिनगर पोलिसांत ७ जणांवर गुन्हा
मनपा, मेट्रो आणि रेल्वेत नोकरी लावून देतो असे सांगून एका तरुणाकडून १२ लाख रुपये घेतल्याचा आरोप आहे. शांतिनगर पोलिसांनी ७ जणांवर फसवणुकीचा गुन्हा नोंदवला आहे.
नागपूर : सिव्हिल लाइन्समधील मनपा कार्यालयाच्या परिसरात बसून नोकरी लावून देणाऱ्या टोळीने एका तरुणाला जाळ्यात ओढल्याचा प्रकार समोर आला आहे. तरुणाच्या तक्रारीवरून शांतिनगर पोलिसांनी ७ जणांविरुद्ध फसवणुकीचा गुन्हा दाखल केला आहे.
गुन्हा दाखल झालेल्या आरोपींमध्ये विशाल जाधव (३५, अमरावती), स्वप्नील सहारे (३०), रोशन वानखेडे (३०), दिगांबर शिंदे (२५), सचिन राठोड (३५), अरविंद चौधरी (४०, शंकर नगर, धरमपेठ) आणि प्रतीक युवराज उराडे (२५, विनोबा भावे नगर) यांचा समावेश आहे.
सूत्रांच्या माहितीनुसार या रॅकेटचा सूत्रधार विशाल जाधव आहे. तक्रारदार निखिल हा एका खासगी बँकेत काम करत होता. वर्षभरापूर्वी गणेशोत्सवात महाल भागात एका मित्रामार्फत त्याची विशाल जाधवशी ओळख झाली. मनपा, मेट्रो आणि रेल्वेत आपली चांगली ओळख आहे, असे विशालने त्याला सांगितले. या सरकारी विभागांत कुणालाही सहज नोकरी लावून देऊ शकतो, असेही जाधवने म्हटले आणि निखिललाही मनपात नोकरी लावून देण्याचे आमिष दाखवले.
त्यानंतर विशाल जाधवने इतर आरोपींशी निखिलची ओळख करून दिली. नोकरी लावण्याच्या नावाखाली त्याच्याकडे पैशांची मागणी होऊ लागली. निखिल रोख रक्कम आणि बँकेमार्फत आरोपींना पैसे देत राहिला. नोव्हेंबर २०२५ मध्ये आरोपींनी त्याला बनावट नियुक्तीपत्र दिले आणि बँकेची नोकरी सोडायला सांगितले. मनपात नोकरी मिळेल या आशेने निखिलने खासगी बँकेतील नोकरी सोडली.
यानंतर आरोपींनी त्याला सिव्हिल लाइन्समधील मनपा मुख्यालयाजवळच्या प्रशासकीय इमारत क्रमांक २ मध्ये बोलावले. तिथे सुमारे १५ दिवस विशालचे साथीदार निखिलला भेटत होते. ते स्वतःला मनपा आणि इतर विभागांचे अधिकारी असल्याचे सांगत. ते निखिलची एका रजिस्टरवर सही घेत आणि अभ्यासासाठी जलसंपदा विभागाची पुस्तिका देत. तोपर्यंत निखिलने आरोपींना १२ लाख रुपये दिले होते.
याच काळात स्वप्नील सहारेने निखिलला सांगितले की त्याला दिलेले नियुक्तीपत्र बनावट आहे. स्वप्नीलने सरकारी नोकरी लावून देतो असे सांगितले आणि त्यासाठी ७ लाख रुपयांची मागणी केली. स्वप्नीलच्या बोलण्यामुळे निखिलला फसवणुकीचा संशय आला. त्याने विशाल जाधव आणि इतर आरोपींशी संपर्क साधून पैसे परत मागितले. विशालने फोनवर काहीच प्रतिसाद दिला नाही, तर इतर आरोपीही टाळाटाळ करू लागले. वैतागलेल्या निखिलने शांतिनगर पोलीस स्टेशनमध्ये तक्रार दिली. तपासानंतर पोलिसांनी फसवणुकीचा गुन्हा नोंदवला आहे.
आरोपी मनपा मुख्यालयाच्या परिसरातील प्रशासकीय इमारतीतून हे रॅकेट चालवत होते, त्यामुळे त्यांना मनपातील काही लोकांचा आश्रय असल्याचा संशय निर्माण होतो. आरोपींना अटक झाल्यानंतरच याचे सत्य समोर येऊ शकेल. या रॅकेटने अनेक जणांना जाळ्यात ओढल्याचे आढळून आले आहे.
