नागपुरात भरदिवसा वृद्धाच्या हातातून 50 हजारांची बॅग हिसकावली, बँकेपासून पाठलाग झाल्याचा अंदाज

नागपूर शहरातील गिट्टीखदान पोलीस स्टेशनच्या हद्दीत भरदिवसा लुटीची घटना घडली आहे. बँकेतून पेन्शनची रक्कम काढून घरी परतणाऱ्या एका वृद्ध व्यक्तीच्या हातातून एक जण बॅग हिसकावून पळून गेला. या बॅगेत 50 हजार रुपये रोख आणि काही महत्त्वाची कागदपत्रे होती.

भरदिवसा घडलेल्या या प्रकारामुळे परिसरात खळबळ उडाली आहे. दीपकनगर येथील नागभूमि सोसायटीतल्या रेडियंट अपार्टमेंटमध्ये राहणारे ज्ञानेश्वर नाईक यांनी याबाबत तक्रार दिली आहे. त्यांच्या तक्रारीवरून पोलिसांनी गुन्हा दाखल केला आहे.

नाईक शासकीय सेवेतून निवृत्त झालेले असून ते कुटुंबासह रेडियंट अपार्टमेंटमध्ये राहतात. त्यांना त्यांच्या पेन्शन खात्यातून पैसे काढायचे होते. दुपारी सुमारे दोनच्या दरम्यान त्यांनी फ्रेंड्स कॉलनी परिसरात असलेल्या इंडियन बँकेतून काही रक्कम काढली. त्यातले 50 हजार रुपये त्यांनी हँडबॅगमध्ये ठेवले आणि उरलेली रक्कम खिशात ठेवली होती.

बँकेतून निघाल्यानंतर ते मेन रोडवर गेले आणि घरी जाण्यासाठी ऑटोत बसले. अपार्टमेंटसमोर ऑटोतून उतरून ते लिफ्टसमोर पोहोचले होते, तेवढ्यात 30 ते 35 वयाचा एक आरोपी मागून आला आणि त्यांच्या हातातली बॅग हिसकावून पळाला. नाईक यांनी त्याला पकडण्यासाठी त्याच्या मागे धाव घेतली, पण त्यांचा तोल गेला आणि ते रस्त्यावर पडले. तोपर्यंत आरोपी कथितरीत्या आपल्या दुचाकीवर बसून तिथून फरार झाला.

बॅगेत रोख रकमेशिवाय चेकबुक, पासबुक आणि पीपीओ बुकही ठेवलेली होती. घडलेल्या प्रकाराची माहिती नाईक यांनी पोलिसांना दिली.

आरोपी बँकेपासूनच नाईक यांचा पाठलाग करत असावा, असा अंदाज व्यक्त केला जात आहे. त्याने अपार्टमेंटसमोर आपली मोपेड उभी केली आणि दबक्या पावलांनी त्यांच्या मागोमाग अपार्टमेंटच्या कंपाउंडमध्ये गेला, असे सांगितले जाते. त्याने आपली गाडी आधीच सुरू ठेवली असावी, असेही मानले जात आहे. अवघ्या काही सेकंदांत तो बॅग घेऊन पसार झाला.

संपूर्ण घटना अपार्टमेंटमधील सीसीटीव्ही कॅमेऱ्यांत कैद झाली आहे. पोलीस या फुटेजच्या आधारे आरोपीची ओळख पटवण्याचा प्रयत्न करत आहेत आणि त्याचा कसून शोध घेत आहेत.