निवृत्त रेल्वे कर्मचाऱ्याला 32 लाखांचा गंडा; DRM अधिकारी असल्याची बतावणी करून घेतली बँक माहिती

नागपुरात एका सायबर ठकबाजाने मध्य रेल्वेतून निवृत्त झालेल्या कर्मचाऱ्याला पेन्शनमध्ये नियमानुसार सुधारणा करून देण्याचं आमिष दाखवून तब्बल ३१ लाख ९७ हजार रुपयांना गंडा घातला. डीआरएम कार्यालयातून बोलत असल्याची बतावणी करून त्याने आधी विश्वास संपादन केला आणि नंतर व्हॉट्सअॅपवर बनावट पेन्शन कागदपत्रे पाठवून बँक खात्याची गोपनीय माहिती मिळवली. ही माहिती हाती येताच त्याने खात्यातील रक्कम परस्पर वळती केली. सेवानिवृत्त कर्मचाऱ्यांना अशाच प्रकारे लक्ष्य केलं जात असल्याचं यातून पुन्हा एकदा समोर आलं आहे.

विजय ढाबरे असं या ६१ वर्षीय पीडिताचं नाव आहे. ते मध्य रेल्वेतून सुमारे वर्षभरापूर्वी सेवानिवृत्त झाले होते. ८ सप्टेंबरला ते घरी असताना त्यांच्या मोबाइलवर एका व्यक्तीचा फोन आला. फोन करणाऱ्याने आपण डीआरएम कार्यालयातून धर्मेंद्र यादव बोलत असल्याची ओळख सांगितली आणि ढाबरे यांच्या पेन्शनमध्ये नियमानुसार सुधारणा केली जाणार असल्याचं सांगितलं. यावर विश्वास बसावा म्हणून त्याने ढाबरे यांच्या नावाने तयार केलेली बनावट पेन्शनची कागदपत्रं व्हॉट्सअॅपवर पाठवली. ही कागदपत्रं पाहून समोरची व्यक्ती खरोखरच रेल्वेची अधिकारी असल्याचा ढाबरे यांना पक्का विश्वास बसला आणि त्यांनी त्याच्यावर पूर्ण भरवसा ठेवला.

पेन्शन सुधारण्यासाठी अर्ज भरून देण्याच्या बहाण्याने आरोपीने ढाबरे यांच्याकडून बँक खात्याची माहिती, एटीएम कार्ड क्रमांक आणि सीव्हीव्ही क्रमांक मिळवला. ही गोपनीय माहिती हाती लागताच आरोपीने ढाबरे यांच्या खात्यातून ३१ लाख ९७ हजार रुपये परस्पर वळते केले. खात्यातील रक्कम कमी झाल्याचे संदेश मोबाइलवर आल्यानंतर आपली फसवणूक झाल्याचं ढाबरे यांच्या लक्षात आलं. त्यांनी तातडीने सायबर पोलिसांकडे तक्रार दिली. त्यावरून पोलिसांनी अज्ञात आरोपीविरुद्ध आर्थिक फसवणुकीचा गुन्हा दाखल करून तपास सुरू केला आहे.

सेवानिवृत्त कर्मचारी आणि ज्येष्ठ नागरिकांना लक्ष्य करण्यासाठी सध्या पेन्शन सुधारणा, थकीत पेन्शन, महागाई भत्ता किंवा इतर सरकारी लाभांच्या नावाखाली सायबर ठकबाजांकडून फोन केले जात आहेत. आपण सरकारी अधिकारी असल्याचा विश्वास निर्माण करण्यासाठी बनावट ओळख सांगण्यासोबतच कार्यालयीन कागदपत्रांसारखे दिसणारे बनावट दस्तऐवजही व्हॉट्सअॅपवर पाठवले जातात. अशा प्रकारे बनावट कागदपत्रं पाठवून खात्री पटवून दिली जाते आणि त्यानंतर गोपनीय बँक माहिती काढून घेतली जाते. अशा प्रकारचा फोन आल्यास कोणतीही बँकविषयक गोपनीय माहिती देऊ नये, असं आवाहन करण्यात आलं आहे. संबंधित विभागाच्या अधिकृत कार्यालयाशी थेट संपर्क साधून फोन करणाऱ्या व्यक्तीची खातरजमा करून घ्यावी, असंही सांगण्यात आलं आहे.