चंद्रपूर, बल्लारशाह स्थानकांचे काम वेगाने करा; मुनगंटीवारांच्या रेल्वे प्रबंधकांना सूचना

नागपूर : चंद्रपूर आणि बल्लारशाह या दोन्ही रेल्वे स्थानकांच्या पुनर्विकासाची कामे अधिक गतीने पूर्ण करावीत, अशा स्पष्ट सूचना आमदार सुधीर मुनगंटीवार यांनी दिल्या. मध्य रेल्वेच्या नागपूर विभागीय कार्यालयात विभागीय रेल्वे प्रबंधक विनायक गर्ग यांच्यासोबत झालेल्या बैठकीत त्यांनी ही भूमिका मांडली. दोन्ही स्थानके अत्याधुनिक, आकर्षक आणि वैशिष्ट्यपूर्ण स्वरूपात विकसित व्हावीत, तसेच प्रवाशांच्या सुविधांमध्ये भरीव वाढ व्हावी, असे त्यांनी सांगितले.

अमृत भारत स्टेशन योजनेअंतर्गत सुरू असलेल्या या कामांच्या सद्यस्थितीचा आढावा घेऊन आवश्यक कार्यवाहीला गती द्यावी, असे मुनगंटीवार यांनी गर्ग यांना सांगितले. स्थानकांचा विकास फक्त पायाभूत सुविधांपुरता मर्यादित न राहता प्रवाशांना आधुनिक सुविधा देणारा आणि चंद्रपूर जिल्ह्याची स्वतंत्र ओळख अधोरेखित करणारा असावा, अशी त्यांची भूमिका होती.

बल्लारशाह-लोकमान्य टिळक टर्मिनस या नवीन रेल्वेगाडीला 'ताडोबा एक्स्प्रेस' हे नाव देण्याच्या प्रस्तावालाही गती द्यावी, अशी सूचना त्यांनी केली. या गाडीच्या आकर्षक आणि वैशिष्ट्यपूर्ण डिझाइनला अंतिम स्वरूप देण्यासाठी जे. जे. स्कूल ऑफ आर्ट आणि ताडोबा प्रशासनातील अधिकाऱ्यांसोबत चर्चा करून ही प्रक्रिया लवकरात लवकर पूर्ण करावी, असे ते म्हणाले.

बल्लारशाह स्थानकावरून विविध गाड्यांच्या फेऱ्या वाढवाव्यात आणि पुण्यासाठी रेल्वेसेवा सुरू करावी, याकडे त्यांनी रेल्वे प्रशासनाचे लक्ष वेधले. अधिकाधिक गाड्यांचे प्रस्ताव मुख्यालयाकडे पाठवण्यात आले असून त्यावर लवकरच सकारात्मक कार्यवाही होईल, अशी अपेक्षा व्यक्त करण्यात आली. वर्धा-सेवाग्राम-बल्लारशाह तिसऱ्या रेल्वेमार्गाचे काम पूर्ण झाल्यानंतर गाड्यांची वारंवारता वाढवायला अधिक वाव मिळेल, याकडेही बैठकीत लक्ष वेधण्यात आले.

रेल्वे स्थानकावरील पादचारी उड्डाणपुलाचे (FOB) काम आणि बल्लारपूर येथील गोल पुलिया रेल्वे भुयारी मार्गाची सुधारणा तातडीने करावी, अशा सूचना मुनगंटीवार यांनी दिल्या. गोल पुलिया परिसरात सिमेंट काँक्रीटचा रस्ता किंवा उच्च दर्जाचे डांबरीकरण करून नागरिकांची ये-जा अधिक सुरक्षित आणि सुलभ करावी, अशी मागणी त्यांनी गर्ग यांच्याकडे केली.

बल्लारपूर शहरात मध्य रेल्वेच्या जमिनीवरील शॉपिंग कॉम्प्लेक्समध्ये व्यवसाय करणाऱ्या व्यापाऱ्यांचा प्रश्न सोडवण्यासाठी मुनगंटीवार यांनी पुढाकार घेतला. या प्रकरणात विभागीय रेल्वे प्रबंधक विनायक गर्ग स्वतः प्रत्यक्ष भेट देऊन परिस्थितीचा आढावा घेतील, असे आश्वासन त्यांनी बैठकीत मुनगंटीवार यांना दिले.

बाबूपेठ-सास्ती परिसरातील प्रस्तावित रेल्वेमार्गासाठी होणाऱ्या भूसंपादनामुळे बाधित शेतकऱ्यांच्या आक्षेपांचे निराकरण करावे, त्यांना योग्य मोबदला आणि आवश्यक सुविधा द्याव्यात, अशी मागणी मुनगंटीवार यांनी केली. वर्धा-सेवाग्राम-बल्लारशाह तिसऱ्या रेल्वेमार्गिका आणि डम्पिंग यार्ड प्रकल्पासाठी मौजा बल्लारपूर येथील भूसंपादनाची सद्यस्थिती जाणून घेण्यावरही त्यांनी भर दिला.

चंद्रपूर शहरात मध्य रेल्वेच्या जमिनीवर झालेल्या अतिक्रमणांच्या प्रश्नावर मानवी दृष्टिकोनातून निर्णय घ्यावा, अशी भूमिका त्यांनी मांडली. संबंधित अतिक्रमणधारकांसाठी पर्यायी निवासाची व्यवस्था होईपर्यंत अतिक्रमण हटवण्याची कार्यवाही स्थगित ठेवावी, अशी मागणी त्यांनी केली. भाग्यनगर एक्स्प्रेसचा कागजनगर येथून बल्लारशाह-चंद्रपूरपर्यंत विस्तार करण्याच्या प्रस्तावावर तातडीने सकारात्मक निर्णय घेण्याची गरजही त्यांनी अधोरेखित केली.

प्रवाशांच्या सुविधा, रेल्वे पायाभूत सुविधांचा विकास, शेतकऱ्यांचे हित आणि व्यापाऱ्यांच्या प्रश्नांची सोडवणूक या सर्व बाबींवर मुनगंटीवार यांनी एकत्रितपणे भर दिला. चंद्रपूर जिल्ह्यातील रेल्वेसेवा अधिक सक्षम करण्यासाठी आणि प्रलंबित प्रश्न मार्गी लावण्यासाठी विनायक गर्ग यांनी संबंधित विषयांवरील कार्यवाहीला गती द्यावी, अशी अपेक्षा त्यांनी व्यक्त केली.

या बैठकीला माजी आमदार संजीव रेड्डी बोदकुरवार, मध्य रेल्वे, मुंबई येथील झेडआरयूसीसीचे सदस्य अजय दुबे, विभागीय रेल्वे प्रबंधक विनायक गर्ग आणि रेल्वे विभागाशी संबंधित अधिकारी उपस्थित होते.