मूलच्या वेटलिफ्टर्सचे नागपूर विभागीय स्पर्धेत यश; ४ सुवर्णांसह राज्यस्तरीय स्पर्धेसाठी निवड

मूल तालुक्यातील वेटलिफ्टिंगपटूंनी नागपूर विभागीय शालेय स्पर्धेत उल्लेखनीय कामगिरी केली आहे. ३ ऑक्टोबर रोजी नागपूर येथे झालेल्या या स्पर्धेत त्यांनी एकूण ४ सुवर्ण आणि ३ रौप्य पदके मिळवली. या खेळाडूंनी उत्कृष्ट कामगिरीचे प्रदर्शन करत ४ सुवर्ण आणि ३ रौप्य पदकांसह घवघवीत यश मिळवले आहे.

हे सर्व खेळाडू मूल तालुका क्रीडा संकुलात NIS प्रशिक्षक करण कोसरे यांच्याकडून मोफत प्रशिक्षण घेतात. सुवर्णपदक जिंकणाऱ्या चारही खेळाडूंची अमरावती येथे १३ ते १५ ऑक्टोबरदरम्यान होणाऱ्या राज्यस्तरीय शालेय वेटलिफ्टिंग स्पर्धेसाठी नागपूर विभागाच्या संघात निवड झाली आहे. राज्यस्तरीय स्पर्धेत हे सर्व खेळाडू नागपूर विभागाचे प्रतिनिधित्व करतील.

१९ वर्षांखालील मुलींच्या गटात मूलच्या चार खेळाडूंनी प्रतिस्पर्ध्यांवर मात करत पहिला क्रमांक पटकावला. जसविंदरकौर कर्नलसिंग बावरी हिने ४८ किलो वजन गटात, श्रावणी किशोर आंबूलकर हिने ५३ किलो वजन गटात, शिवाणी जालिंद्र वाढई हिने ५८ किलो वजन गटात आणि नंदिनी मोतीराम चौधरी हिने ८६ किलो वजन गटात पहिला क्रमांक मिळवला.

दुसरा क्रमांक मिळवणाऱ्यांमध्ये १७ वर्षांखालील मुलींच्या गटातील ईशानी मोहूर्ले (४८ किलो वजन गट) आणि प्रणाली झरकर (७७ किलोवरील वजन गट) यांचा समावेश आहे. १९ वर्षांखालील मुलग्यांच्या गटात अमन फारुख शेख याने दुसरा क्रमांक मिळवला.

तालुक्याचे ठिकाण असलेल्या मूल शहराने क्रीडा क्षेत्रात, विशेषतः वेटलिफ्टिंगमध्ये आपले वर्चस्व निर्माण केले आहे. गेल्या चार वर्षांपासून मूल येथे मोफत वेटलिफ्टिंग प्रशिक्षण सुरू आहे. या प्रशिक्षणातून तयार झालेल्या खेळाडूंनी सुरुवातीपासूनच चांगले यश मिळवले आहे. सलग यंदाही चंद्रपूर जिल्ह्यात वेटलिफ्टिंग या खेळात मूल शहराचेच नाव पहिले ठरले आहे.

या सर्व गुणवंत खेळाडूंच्या आणि प्रशिक्षकांच्या यशाबद्दल जिल्हा क्रीडा अधिकारी विनोद ठिकरे सर, नामदेवजी पिजुरकर सर, रुपचंद उराडे सर, आकाश चौधरी सर आणि स्वप्निल अवघडे सर यांच्यासह क्रीडाप्रेमींनी खेळाडूंचे कौतुक केले आहे. अमरावती येथील राज्यस्तरीय स्पर्धेतील पुढील वाटचालीसाठी त्यांनी सर्वांना भरभरून शुभेच्छाही दिल्या आहेत.