भाजपच्या 'नमो सेवा - अनसुनी कहानियाँ' पथनाट्याचा मुंबईत शुभारंभ, राज्यभर प्रयोग होणार

भारतीय जनता पक्षाने 'नमो सेवा - अनसुनी कहानियाँ' या विशेष पथनाट्य उपक्रमाची महाराष्ट्रात सुरुवात केली आहे. पंतप्रधान नरेंद्र मोदी यांच्या सार्वजनिक जीवनातील 25 वर्षांचा प्रवास, त्यांचा त्याग आणि राष्ट्रसेवेचे विचार घराघरांत पोहोचवण्यासाठी पक्षाने हा उपक्रम हाती घेतला आहे. देशभरात सुरू असलेल्या 'सेवा संकल्प अभियाना'चाच हा एक भाग आहे.

मुंबईतील केसी महाविद्यालयात झालेल्या कार्यक्रमात भाजपचे महाराष्ट्र प्रदेशाध्यक्ष रविंद्र चव्हाण यांच्या हस्ते या उपक्रमाचा अधिकृत शुभारंभ करण्यात आला.

उपस्थितांशी बोलताना रविंद्र चव्हाण यांनी या उपक्रमाचे कौतुक केले. ते म्हणाले, "पंतप्रधान नरेंद्र मोदीजी यांच्या जीवनप्रवासातून आपल्याला निस्वार्थ सेवाभाव, उत्तम सुशासन, समर्पण आणि राष्ट्रभक्तीची मोलाची शिकवण मिळते. त्यांच्या आयुष्यातील प्रेरणादायी प्रसंग सर्वसामान्यांच्या मनात रुजवण्यासाठी हा उपक्रम अत्यंत स्तुत्य आहे. ज्याप्रमाणे नवोदित कलाकारांच्या 'हनुमान अंश' या चित्रपटाने यशाचे नवे विक्रम प्रस्थापित केले, अगदी त्याच धर्तीवर हे 'नमो सेवा गाथा' पथनाट्यदेखील सर्व रेकॉर्ड मोडीत काढेल." असा विश्वास त्यांनी व्यक्त केला.

मोदी यांचा संघर्षाने भरलेला प्रवास, त्यांची राष्ट्रनिष्ठा आणि जनसेवेचे व्रत प्रभावीपणे मांडण्याची जबाबदारी पिंपरी-चिंचवडमधील कलाकारांवर सोपवण्यात आली आहे. हे कलाकार महाराष्ट्राच्या कानाकोपऱ्यात जाऊन पथनाट्याचे प्रयोग सादर करणार आहेत.

या अभियानाचा कार्यक्रमही ठरलेला आहे. 15 ऑक्टोबर 2026 पर्यंत राज्यातील प्रत्येक जिल्ह्यात 1 मोठा मुख्य प्रयोग होणार आहे. शिवाय प्रत्येक विधानसभा क्षेत्रात किमान 10 पथनाट्य प्रयोग सादर केले जाणार आहेत. एवढ्या मोठ्या प्रमाणावर प्रयोग होणार असल्यामुळे नवोदित कलाकारांना आपली कला सादर करण्याची आणि समाजात जनजागृती करण्याची मोठी संधी मिळाली आहे.

केसी महाविद्यालयातील शुभारंभ सोहळ्यात पथनाट्य सादर करणाऱ्या कलाकारांचा आणि कार्यक्रमाच्या संयोजकांचा विशेष सत्कार करण्यात आला.

कार्यक्रमाला महाराष्ट्राचे सांस्कृतिक कार्यमंत्री ॲड. आशिष शेलार, विधानसभा अध्यक्ष आमदार राहुल नार्वेकर, भाजपचे मुंबई अध्यक्ष आमदार अमित साटम, मुंबईच्या महापौर रितू तावडे, भाजपचे प्रदेश सरचिटणीस आमदार निरंजन डावखरे आणि आमदार अमित गोरखे उपस्थित होते. त्यांच्यासह भाजपचे अनेक वरिष्ठ पदाधिकारी, कार्यकर्ते आणि नागरिकही मोठ्या संख्येने हजर होते.