मिठाईच्या दुकानात १२ वर्षांच्या मुलीचा विनयभंग, आरोपीविरोधात गुन्हा दाखल

नागपुरातील जुन्या कामठी पोलीस स्टेशनच्या हद्दीत १२ वर्षांच्या मुलीचा विनयभंग झाल्याचे प्रकरण समोर आले आहे. मुलीच्या कुटुंबीयांनी पोलिसांत दिलेल्या तक्रारीवरून पोलिसांनी मिठाईचे दुकान चालवणारा विनोद सूरजमल शर्मा (५८) याच्याविरोधात गुन्हा दाखल केला आहे. पोलीस सूत्रांनी दिलेल्या माहितीनुसार ही घटना घडली त्या दिवशी, म्हणजे १४ सप्टेंबरच्या रात्री ९ वाजता, मुलीच्या आईने तिला घराजवळच्या किराणा दुकानातून सामान आणण्यासाठी पाठवले होते.

सामान घेऊन घरी परतत असताना विनोद शर्मा याने मुलीला त्याच्या मिठाईच्या दुकानात बोलावले. सुरुवातीला तो मुलीशी तिच्या अभ्यासाबद्दल बोलू लागला, मात्र याच दरम्यान त्याने तिला अश्लील पद्धतीने स्पर्श केल्याचा आरोप आहे. यामुळे घाबरलेली मुलगी तिथून निघून घरी पोहोचली आणि तिने आपल्या आईला घडलेला सगळा प्रकार सांगितला.

विनोद शर्मा हा कुटुंबाच्या ओळखीचा असल्यामुळे आईने ही गोष्ट लगेच आपल्या पतीला सांगितली नाही. मात्र त्यानंतरच्या काळात मुलीच्या वागण्यात झालेला बदल पाहून वडिलांना काहीतरी बिनसल्याची शंका आली. त्यांनी याबाबत पत्नीकडे विचारपूस केली, तेव्हा हा संपूर्ण प्रकार त्यांच्यासमोर आला. हे कळल्यानंतर कुटुंबीयांनी पोलिसांकडे धाव घेण्याचा निर्णय घेतला आणि १९ सप्टेंबरला पोलीस स्टेशनमध्ये जाऊन याबाबत तक्रार दाखल केली.

या तक्रारीच्या आधारे पोलिसांनी आरोपी विनोद शर्मा याच्याविरोधात लैंगिक शोषणाच्या आरोपाखाली आणि पोक्सो कायद्याअंतर्गत गुन्हा दाखल करून पुढील तपास सुरू केला आहे.