मांगूर मासा प्रकरण: त्या डीबी पथकाचे "नसीब" खराब

जिल्ह्यातील एका पोलीस स्टेशनच्या डीबी पथकाभोवतीचे तोडी प्रकरण आता नव्या वळणावर पोहोचले आहे. प्रतिबंधित मांगूर माशांचा व्यवसाय करणाऱ्या एका व्यावसायिकाकडे डीबी पथकाने ७० हजार रुपयांची मागणी केल्याचा आरोप आहे. या पथकाने तोडी केल्याचे वृत्त आधीच प्रकाशित झाले होते.

त्या वृत्तानंतर आता या प्रकरणातील तोडी करणाऱ्यांची नावे समोर यायला सुरुवात झाली आहे. आरोपानुसार डीबी पथकाने मांगूर माशांचा व्यवसाय करणाऱ्या त्या व्यावसायिकावर कारवाई केली, पण ती कारवाई अधिकृत नव्हती. पथकाचा उद्देश फक्त तोडी करण्याचाच होता आणि त्यासाठीच ७० हजार रुपये मागितले, असा आरोप आहे.

मांगूर मासे प्रतिबंधित आहेत, हे खरेच. तरीही कारवाईच्या नावाखाली कोणाला काय द्यायचे आणि किती घ्यायचे, याचा मनात विचार करून पोलिसांनी अनधिकृत पद्धतीने त्या व्यावसायिकाकडे धाड टाकली, असे या प्रकरणात म्हटले जात आहे.

व्यावसायिकाला कायद्याचा धाक दाखवण्यात आला. आता कारवाई होणार, या भीतीने तो घाबरला. काही तडजोड होईल का, या विचाराने तो डीबी पथकातील पोलिसांकडे पाहू लागला. त्यावर ठीक आहे, कारवाई करणार नाही, पण त्यासाठी ७० हजार रुपये द्यावे लागतील, अशी मागणी पोलिसांनी केली, असा आरोप आहे.

व्यावसायिकाने पैसे द्यायची तयारी दाखवली. पैसे द्यायचा दिवस जवळ आला, तेव्हा डीबी पथकातील दोन कर्मचाऱ्यांसोबत नसीब पंच म्हणून सोबतीला आला. ४० हजार रुपये देताना व्यावसायिकाने व्हिडीओ काढला. ४० हजार रुपये हातात पडल्यावर त्या पोलीस कर्मचाऱ्यांचा आनंद गगनात मावेनासा झाला.

म्हणजे ७० हजारांपैकी ४० हजार रुपये दिले गेले होते आणि आता उरलेल्या ३० हजार रुपयांची वाट पाहायची होती. पण त्याआधीच पैसे घेताना आपला व्हिडीओ तयार झाला आहे, अशी माहिती डीबी पथकाला मिळाली. हे कळल्यावर नसीब घाबरला आणि आता काय करायचे, हे त्याला सुचेनासे झाले.

डीबी पथकाने शांत डोक्याने एक योजना आखली. त्यांनी मांगूर व्यावसायिकाला पोलीस स्टेशनात बोलावले, त्याचा मोबाईल घेतला आणि त्यातला व्हिडीओ डिलीट केला. त्यानंतर उरलेल्या रकमेची मागणी केली, असा आरोप आहे.

पण मोठा प्रश्न असा आहे की, तो व्हिडीओ खरोखर डिलीट झाला का? या प्रश्नाचे उत्तर येत्या काही दिवसांत मिळेलच. तोपर्यंत या सगळ्या गोष्टी आरोपाच्या पातळीवरच आहेत.