'मैत्रेया' सिनेमाचा टीझर आला; प्रेम आणि मैत्रीच्या सीमारेषेची गोष्ट सांगणार चित्रपट

काही नाती नेमक्या शब्दांत मांडणं अवघड असतं आणि काही नात्यांना ठराविक नावच देता येत नाही. अशाच एका गुंतागुंतीच्या नात्याची गोष्ट सांगणाऱ्या 'मैत्रेया' या आगामी मराठी सिनेमाचा टीझर नुकताच समोर आला आहे. या टीझरमध्ये समर, आयुषी, स्काय आणि रुची या चौघांच्या आयुष्यातील मैत्री, जवळीक आणि त्यामागे लपलेल्या भावना दिसतात. यामुळे या नात्यांमागे नेमकं दडलंय काय, याबद्दल प्रेक्षकांमध्ये उत्सुकता वाढली आहे.

टीझरमध्ये आर्जोयी, जय, साजिरी आणि निर्वाण या पात्रांच्या नात्याभोवती कथा फिरताना दिसते. हे चौघेही एकमेकांच्या आयुष्यातली खास माणसं आहेत आणि त्यांच्यातली मैत्री, धमाल आणि सहजपणा टीझरमधून जाणवतो. पण आयुष्यात एखादी नवी व्यक्ती आली की नात्यांमध्ये आपोआप बदल घडायला लागतात, असंही यात दाखवलं आहे. आतापर्यंत जवळची वाटणारी व्यक्ती अचानक परकी भासायला लागते, आणि याच भावनेभोवती चौघांच्या नात्यांचा गुंता उलगडत जाणार आहे.

टीझरमधलं 'एकीकडे प्रेम, एकीकडे मैत्री अन् एकीकडे मैत्रीत गोंधळलेलं प्रेम...' हे वाक्य या नात्यांमधला संभ्रम आणखी गडद करतं. प्रेम आणि मैत्री यांच्यातली नेमकी सीमारेषा कुठे आहे, याचा शोध हा सिनेमा घेणार आहे.

सिनेमाच्या लेखिका-दिग्दर्शिका क्रांती रेडकर वानखेडे यांनी याबद्दल सांगितलं की, टीझरच्या शेवटी येणारं 'एकीकडे प्रेम, एकीकडे मैत्री अन् एकीकडे मैत्रीत गोंधळलेलं प्रेम...' हे वाक्य नात्यांच्या या गुंत्यात आणखी भर घालतं. या एकाच वाक्यातून आर्जोयी, जय, साजिरी आणि निर्वाण यांच्या नात्यांमधला पेच समोर येतो, असं त्या म्हणाल्या. प्रेम नेमकं कुठे संपतं आणि मैत्री कुठून सुरू होते, की काही नाती या दोन्हींच्या मधोमध कायमची अडकून राहतात, याचाच शोध 'मैत्रेया'च्या कथेतून घेतला जाणार आहे, असं त्यांनी सांगितलं.

निर्माते मनोज खळतकर यांनीही या सिनेमाबद्दल आपलं मत मांडलं. काहीतरी युथफुल आणि संपूर्ण कुटुंबाला एकत्र बसून बघता येईल असा फॅमिली एंटरटेनर प्रेक्षकांसमोर आणण्याची त्यांची इच्छा होती, आणि 'मैत्रेया'च्या माध्यमातून ही इच्छा पूर्ण करण्याचा प्रयत्न केल्याचं ते म्हणाले. तरुणाईच्या नात्यांमधल्या भावभावना, त्यातली गंमत आणि सहजपणा प्रेक्षकांना या सिनेमातून अनुभवायला मिळेल, असंही त्यांनी नमूद केलं.

समर टाईम्स प्रॉडक्शन निर्मित 'मैत्रेया'चं लेखन आणि दिग्दर्शन क्रांती रेडकर वानखेडे यांनी केलं आहे. मनोज खळतकर हे सिनेमाचे निर्माते असून अमन खळतकर सहनिर्माते म्हणून जबाबदारी सांभाळत आहेत. समर, आयुषी, स्काय आणि रुची यांच्या प्रमुख भूमिका सिनेमात आहेत. मैत्री, प्रेम आणि नात्यांमधल्या बदलत्या भावनांची ही कथा २३ ऑक्टोबर २०२६ रोजी प्रेक्षकांसमोर येणार आहे.