लातूरमध्ये 6 लाख 20 हजारांच्या कर्जाला कंटाळून 28 वर्षांच्या तरुण शेतकऱ्याची आत्महत्या

लातूर जिल्ह्यातील शिरूर अनंतपाल तालुक्यात असलेल्या अंकुलगा राणी गावात दत्ता सूर्यकांत कुंभार या 28 वर्षांच्या तरुण शेतकऱ्याने कर्जाला कंटाळून गळफास घेऊन आत्महत्या केली. मराठवाड्यात पुन्हा एकदा कर्जबाजारी शेतकऱ्याने जीव दिल्याची ही घटना समोर आल्याने संपूर्ण परिसरात शोककळा पसरली आहे. शेतकरी वर्गात संताप आणि हळहळ व्यक्त होत आहे.

मिळालेल्या माहितीनुसार शेतीत झालेले नुकसान आणि सततची नापिकी यामुळे दत्ता कुंभार आर्थिक अडचणीत सापडले होते. त्यांच्यावर खासगी फायनान्स कंपन्यांचे एकूण 6 लाख 20 हजार रुपयांचे कर्ज होते. डोक्यावरचा कर्जाचा डोंगर आणि ते फेडण्यासाठी येणारा सतत सतावणारा दबाव यामुळे ते गेल्या काही दिवसांपासून प्रचंड मानसिक तणावात होते. या नैराश्यातूनच त्यांनी हे टोकाचे पाऊल उचलले.

आत्महत्येपूर्वी कुंभार यांनी सुसाइड नोट लिहून ठेवली आहे. त्या नोटमध्ये त्यांनी कर्जामुळे आलेली लाचारी मांडली असून, आपल्या कुटुंबाची काळजी घ्यावी अशी आर्त हाक दिली आहे. त्यांचे हे शेवटचे शब्द वाचून अनेकांच्या अंगावर काटा आला आहे.

दत्ता यांच्या मागे वृद्ध आई, पत्नी आणि दोन लहान मुले असा परिवार आहे. घरातला कमावता माणूस गेल्याने हे कुटुंब पूर्णपणे बेसहारा झाले असून कुंभार कुटुंबावर आभाळ कोसळले आहे.

मराठवाड्यातील दुष्काळी परिस्थिती, वाढता कर्जाचा बोजा आणि सरकारी मदतीचा अभाव यामुळे अन्नदाता हवालदिल झाला आहे. आयुष्याची सुरुवात असतानाच एका तरुण शेतकऱ्याने जगाचा निरोप घेतल्याने प्रशासनाच्या आणि सरकारच्या धोरणांवर पुन्हा एकदा गंभीर प्रश्नचिन्ह उपस्थित झाले आहे. या दुःखात बुडालेल्या निराधार कुटुंबाला तातडीने आर्थिक मदत मिळवून द्यावी, अशी मागणी ग्रामस्थ करत आहेत.

महाराष्ट्रात अपुरा पाऊस आणि हवामान बदलामुळे दुष्काळसदृश परिस्थिती गंभीर होत चालली आहे. मराठवाडा, विदर्भ आणि उत्तर महाराष्ट्रातील अनेक जिल्ह्यांत पाण्याचा प्रचंड तुटवडा निर्माण झाला आहे. विहिरी आणि कूपनलिकांच्या पाण्याची पातळी मोठ्या प्रमाणात घटली असून अनेक ठिकाणी टँकरने पाणीपुरवठा करावा लागत आहे.

पाण्याअभावी शेतीचे अतोनात नुकसान झाले आहे, पिके करपून गेली आहेत आणि शेतकरी बांधव मोठ्या आर्थिक संकटात सापडले आहेत. जनावरांचा चारा आणि पिण्याचे पाणी हाही गंभीर प्रश्न बनला आहे. दुष्काळावर मात करण्यासाठी सरकारने टँकरची संख्या वाढवावी, छावण्या उभाराव्यात आणि पाणीटंचाई दूर करण्यासाठी तातडीच्या उपाययोजना राबवाव्यात, अशी मागणी होत आहे.