लंडनमध्ये ध्रुव राठींच्या आंदोलनावेळी दोन गट समोरासमोर, पोलिसांनी मध्ये बॅरिकेड्स लावले

भारतीय युट्युबर ध्रुव राठी यांनी लंडनमध्ये केलेले आंदोलन सध्या राजकीय वर्तुळात चर्चेत आहे. ब्रिटनच्या संसदेबाहेर, पार्लमेंट स्क्वेअरमधील महात्मा गांधी यांच्या पुतळ्यासमोर ही रॅली झाली. भारतातील लोकशाही व्यवस्था, निवडणूक प्रक्रियेतील पारदर्शकता आणि नागरिकांचे घटनात्मक अधिकार या मुद्द्यांकडे लक्ष वेधण्यासाठी तिचे आयोजन करण्यात आले होते. परदेशात राहणारे अनेक भारतीय नागरिक, विद्यार्थी आणि सामाजिक कार्यकर्ते त्यात सहभागी झाले होते.

आंदोलन सुरू असतानाच त्याला विरोध करणारा दुसरा गट तिथे आला आणि वातावरण तापले. एका बाजूला राठी यांचे समर्थक आणि दुसऱ्या बाजूला सरकारच्या धोरणांचे समर्थन करणारा गट समोरासमोर आले. दोन्ही बाजूंच्या घोषणाबाजीने परिसर दणाणून गेला. या आंदोलनात इंडियन ओव्हरसीज काँग्रेस (IOC), परदेशातील भारतीय विद्यार्थी संघटना आणि लंडनमध्ये राहणारे भारतीय सहभागी झाले होते, तर 'इंडिया डायस्पोरा यूके' या बॅनरखाली राठी यांच्या विरोधात आणि सरकारच्या समर्थनार्थ प्रति-आंदोलन (Counter-Protest) सुरू झाले.

भाषण करताना राठी यांनी मुख्य निवडणूक आयुक्त ज्ञानेश कुमार, निवडणूक आयोगाची 'स्पेशल इंटेसिव्ह रिव्हिजन' (SIR) प्रक्रिया आणि मतदार याद्यांमधील कथित अनियमितता यावर कडक शब्दांत टीका केली. ते म्हणाले, "एका काळी ज्या देशाने आपल्यावर राज्य केले, त्याच ब्रिटनच्या संसदेसमोर उभे राहून आज आपल्याला स्वतःच्या देशातील लोकशाही हक्कांसाठी आणि स्वतंत्र निवडणूक व्यवस्थेसाठी आवाज उठवावा लागत आहे, हा खूप मोठा विरोधाभास आहे."

राठी यांनी पुढे सांगितले की, देशात सामान्य नागरिकांना आणि तरुणांना शांततेने आंदोलन करण्यापासून रोखले जाते, तेव्हा हा संदेश आंतरराष्ट्रीय व्यासपीठावरून जगापर्यंत पोहोचवणे गरजेचे ठरते. निवडणुका पूर्णपणे निष्पक्ष, पारदर्शक आणि तांत्रिक त्रुटींशिवाय व्हाव्यात, हाच या रॅलीमागचा मुख्य हेतू असल्याचे आयोजकांनी सांगितले.

आयोजकांनी भारतीय निवडणूक आयोगावरील जनतेचा विश्वास पुन्हा मिळवण्याची मागणी केली. मुख्य निवडणूक आयुक्तांची नेमणूक करताना सत्ताधारी आणि विरोधी अशा दोन्ही पक्षांची सहमती असावी, म्हणजे निवडणुकीच्या पारदर्शकतेवर कुणालाही बोट दाखवता येणार नाही, यावर त्यांनी विशेष भर दिला. राठी यांच्या मते, हे आंदोलन कोणत्याही पक्षाच्या किंवा देशाच्या विरोधात नाही; ते फक्त प्रशासकीय पारदर्शकता आणि लोकशाहीची मूल्ये जपण्यासाठी आहे.

दोन्ही गटांनी एकमेकांविरोधात घोषणा सुरू केल्यावर पार्लमेंट स्क्वेअर परिसरात तणाव निर्माण झाला. लंडनच्या मेट्रोपॉलिटन पोलिसांनी तातडीने घटनास्थळी धाव घेतली आणि दोन्ही गटांमध्ये लोखंडी बॅरिकेड्स लावून त्यांना एकमेकांपासून सुरक्षित अंतरावर ठेवले. हिंसाचार किंवा हाणामारी होऊ नये म्हणून पोलीस अधिकाऱ्यांनी दोन्ही बाजूंच्या समन्वयकांशी बोलून परिस्थिती संयमाने हाताळली आणि परिसरात शांतता राखली.

या घटनेचे व्हिडिओ आणि बातम्या सध्या सोशल मीडियावर मोठ्या प्रमाणात फिरत आहेत. परदेशातील भारतीय समुदाय आपल्या मातृभूमीतील राजकीय घडामोडींबद्दल आणि लोकशाहीच्या भवितव्याबद्दल किती जागरूक आहे, हे या घटनेतून पुन्हा दिसले, असे राठी यांच्या मते आहे.