नागपूरच्या कॉटन मार्केटमध्ये उभारणार ६४ कोटी रुपयांचे व्यावसायिक संकुल, मेट्रोच्या प्लॅनमुळे पार्किंगची

नागपूर शहरातील सर्वात वर्दळीच्या आणि ऐतिहासिक व्यापारी केंद्रांपैकी एक असलेल्या कॉटन मार्केटजवळ सुमारे ३४,००० चौरस फूट रिकामी जागा आहे. या जागेवर महा मेट्रो प्रशासनाकडून रोजगारनिर्मितीच्या उद्देशाने एक मोठे व्यावसायिक संकुल आणि अत्याधुनिक पार्किंग परिसर उभारला जाणार आहे.

या भागात व्यावसायिक पायाभूत सुविधा विकसित करण्यासाठी आणि शहरी वाहतूक सुरळीत करण्यासाठी महा मेट्रोने एक मोठा मास्टर प्लान तयार केला आहे. यासाठीची कागदोपत्री प्रक्रियाही महा मेट्रोने सुरू केली आहे. हा प्रकल्प पीपीपी म्हणजे पब्लिक प्रायव्हेट पार्टनरशिप मॉडेलवर आधारित असणार आहे. यामुळे पीस बाजार या भागातील व्यावसायिकीकरणाला बळ मिळण्याची शक्यता वर्तवली जात आहे.

मिळालेल्या माहितीनुसार, कॉटन मार्केट मेट्रो स्टेशनला अगदी लागूनच असलेल्या या मौल्यवान आणि सुमारे ३४,००० चौरस फूट रिकाम्या जागेवर एक अत्याधुनिक व्यावसायिक आणि मल्टीमोडल पार्किंग संकुलाची उभारणी होणार आहे.

सार्वजनिक-खासगी भागीदारी म्हणजे पब्लिक प्रायव्हेट पार्टनरशिप मॉडेलवर आधारित हा महत्त्वाकांक्षी प्रकल्प केवळ कॉटन मार्केट भागातील जुन्या वाहतूक कोंडीच्या आणि पार्किंगच्या मारापासून त्रस्त असलेल्या व्यापाऱ्यांना मोठा दिलासा देणार नाही, तर त्याचबरोबर या भागातील व्यापारी उलाढालींनाही चालना देणार आहे.

नागपूर शहरातील महा मेट्रोच्या माहितीनुसार, या संपूर्ण प्रकल्पाचा अंदाजित विकास खर्च सुमारे ६४.८ कोटी रुपये इतका निश्चित करण्यात आला आहे. या कामासाठी खासगी क्षेत्रातील मोठ्या विकासकांना आमंत्रित केले जात आहे, जे डिझाइन, बिल्ड, फायनान्स, ऑपरेट अँड ट्रान्स्फर या तत्त्वावर हे संकुल तयार करतील. महा मेट्रोने या बांधकामाचे काम पुढील तीन वर्षांत पूर्ण करण्याचे उद्दिष्ट ठेवले आहे.

नागपूर शहरातील सर्वात वर्दळीच्या भागांपैकी एक असलेल्या आणि ऐतिहासिक व्यापारी केंद्र असलेल्या कॉटन मार्केट आणि आसपासच्या बोक व किरकोळ बाजारात दररोज हजारो वाहनांची ये-जा होते, त्यामुळे या भागात कित्येक तास वाहतूक कोंडीची स्थिती कायम राहते. महा मेट्रोच्या या प्रकल्पात मल्टीलेवल पार्किंग संकुलही विकसित केले जाणार आहे.

ग्राहक आणि व्यापाऱ्यांच्या दुचाकी व चारचाकी वाहनांसाठी मोठ्या प्रमाणात पार्किंगची सुविधा उपलब्ध होणार आहे. या बहुमजली व्यावसायिक संकुलात आधुनिक दुकाने, कॉर्पोरेट कार्यालये आणि शोरूम तयार केले जातील. मेट्रोच्या सुरक्षा नियमांनुसार या संपूर्ण ३४,००० चौरस फूट जागेचा वापर केवळ व्यावसायिक आणि पार्किंगच्या कामांसाठीच केला जाणार आहे.