ज्ञानेश कुमार यांच्याशी संबंधित जुन्या दक्षता तपासाच्या नोंदी केरळच्या गृह विभागाने मागवल्या

तिरुवनंतपुरम : केरळच्या गृह विभागाने केंद्रीय मुख्य निवडणूक आयुक्त ज्ञानेश कुमार यांच्याशी संबंधित जुन्या दक्षता तपासाच्या नोंदी मागवल्या आहेत. हा तपास सुमारे दोन दशके जुना आहे. ज्या वेळी कुमार केरळच्या सार्वजनिक बांधकाम विभागाचे सचिव होते, त्या वेळी, म्हणजे २००६ मध्ये, ही चौकशी सुरू झाली होती.

हे प्रकरण केरळ राज्य परिवहन प्रकल्पांतर्गत एमसी रोडच्या बांधकामाशी जोडलेले आहे. या प्रकल्पाशी संबंधित पाटी-बेल ही इंडो-मलेशियन कंपनी आहे. त्या कंपनीचे मुख्य प्रकल्प व्यवस्थापक ली सी. बीन यांनी २००६ मध्ये क्वालालंपूरमध्ये आत्महत्या केली होती.

बीन यांच्या सुसाईड नोटमध्ये सरकारी अधिकाऱ्यांवर पेमेंटला उशीर केल्याचा आणि अनियमितता केल्याचा आरोप होता. त्या नोटमध्ये ज्ञानेश कुमार यांचेही नाव समोर आले. त्यानंतर तेव्हाच्या एलडीएफ सरकारने दक्षता चौकशीचे आदेश दिले होते.

दरम्यान, ओडिशातील एसआयआरवरून मोठा राजकीय गदारोळ सुरू असतानाच, राज्याचे मुख्य निवडणूक अधिकारी आर. संथन गोपालन यांनी सरकारी नोकरीतून स्वेच्छानिवृत्ती घेण्याचा निर्णय घेतला आहे. २००१ च्या बॅचचे आयएएस अधिकारी असलेल्या गोपालन यांनी मतदारयादीचे काम पूर्ण झाल्यानंतर अवघ्या एका आठवड्याने सरकारकडे राजीनामा सादर केला. आपण हे पाऊल कोणत्याही वादामुळे उचललेले नाही, तर पूर्णपणे वैयक्तिक आणि कौटुंबिक कारणांमुळे उचलले आहे, असे त्यांनी म्हटले आहे.

मुख्य निवडणूक आयुक्त ज्ञानेश कुमार यांच्या कार्यपद्धतीवर प्रश्न उपस्थित करणारी एक जनहित याचिका सुप्रीम कोर्टात दाखल झाली आहे. त्या याचिकेवर पुढील आठवड्यात सुनावणी घेण्यास कोर्टाने संमती दिली आहे. निवडणूक आयोगात निर्णय घेताना दोन निवडणूक आयुक्तांची मंजुरी होती का, तसेच आयोगाची बहुसदस्यीय रचना प्रत्यक्षात कशी चालते, असे प्रश्न या याचिकेत विचारण्यात आले आहेत.

याच दरम्यान, ज्ञानेश कुमार यांनी राजीनामा द्यावा, या मागणीसाठी आज दिल्लीतील जंतर मंतर येथे आंदोलन होणार आहे. आंदोलनाच्या पार्श्वभूमीवर जंतर मंतर येथे सुरक्षा व्यवस्था ठेवण्यात आली आहे. जंतर मंतरकडे जाणाऱ्या सर्व प्रमुख रस्त्यांवर बॅरिकेड्स लावण्यात आले आहेत, तसेच मोठ्या संख्येने सुरक्षा दल तैनात करण्यात आले आहे. पोलिसांनी परवानगी नाकारली असली तरीही आंदोलन होण्याची चिन्हे निर्माण झाली आहेत.