कसारा-आसनगावदरम्यान 7 ते 18 ऑक्टोबर मध्य रेल्वेचा 12 दिवसांचा ब्लॉक, लोकल रद्द
कसारा आणि आसनगाव स्थानकांदरम्यान तिसऱ्या मार्गिकेच्या कामासाठी मध्य रेल्वेने 7 ते 18 ऑक्टोबरदरम्यान विशेष ट्रॅफिक आणि पॉवर ब्लॉक जाहीर केला आहे. पहिला टप्पा 7 ते 9 ऑक्टोबरला आहे.
मध्य रेल्वेने कसारा आणि आसनगाव स्थानकांदरम्यान 12 दिवसांचा विशेष ट्रॅफिक आणि पॉवर ब्लॉक जाहीर केला आहे. हा ब्लॉक 7 ते 18 ऑक्टोबर या काळात टप्प्याटप्प्याने घेतला जाणार आहे. त्यामुळे या मार्गावरील लोकल आणि लांब पल्ल्याच्या गाड्यांच्या प्रवाशांना काही प्रमाणात गैरसोय सहन करावी लागू शकते.
हा ब्लॉक कशासाठी, तेही रेल्वेने सांगितले आहे. कसारा आणि आसनगावदरम्यान तिसरी रेल्वे मार्गिका सुरू करायची आहे. शिवाय कसारा यार्डमधील 'अप' यार्ड मार्गिकेचा विस्तार करायचा आहे. या दोन कामांसाठी हा ब्लॉक घेतला जात आहे. पायाभूत सुविधा वाढवण्यासाठी आणि पुढे रेल्वे वाहतूक अधिक वेगवान व सुरळीत करण्यासाठी ही कामे अत्यंत आवश्यक असल्याचे रेल्वे अधिकाऱ्यांनी स्पष्ट केले आहे.
ब्लॉकचा पहिला टप्पा 7 ते 9 ऑक्टोबर, म्हणजे तीन दिवसांचा आहे. 7 आणि 8 ऑक्टोबर रोजी दुपारी 3.35 ते रात्री 8.35 असा पाच तासांचा ब्लॉक असेल. या वेळेत कसारा ते आसनगावदरम्यान काही लोकल फेऱ्या पूर्णपणे, तर काही अंशतः रद्द राहतील. 9 ऑक्टोबरला मध्यरात्री 12.30 ते पहाटे 5.30 असा पाच तासांचा नाईट ब्लॉक असेल. तेव्हाही पॉवर आणि ट्रॅफिक ब्लॉक लागू राहील.
7 आणि 8 ऑक्टोबरला छत्रपती शिवाजी महाराज टर्मिनस (CSMT) येथून सुटणाऱ्या काही लोकल आसनगावपर्यंतच धावतील. CSMT हून कसाऱ्याकडे जाणाऱ्या दुपारी 1.20, 2.17, 2.46 आणि 4.50 वाजताच्या लोकल आसनगावपर्यंतच चालवल्या जातील. उलट दिशेला, CSMT कडे जाणाऱ्या लोकल कसाऱ्याऐवजी आसनगावहून सुटतील. त्या दुपारी 4.12, 4.54, सायंकाळी 5.39 आणि 6.54 वाजता असतील.
ब्लॉकच्या आधीच्या आणि नंतरच्या वेळांवरही परिणाम होणार आहे. CSMT हून कसाऱ्यासाठी शेवटची लोकल दुपारी 12.30 वाजता सुटेल. कसाऱ्याहून CSMT साठी शेवटची लोकल दुपारी 2.42 वाजता धावेल. ब्लॉक संपल्यावर CSMT हून कसाऱ्यासाठी पहिली लोकल संध्याकाळी 6.28 वाजता निघेल, तर कसाऱ्याहून CSMT साठी पहिली लोकल रात्री 8.35 वाजता सुटेल.
8 ऑक्टोबरच्या रात्रीपासून 9 ऑक्टोबरच्या पहाटेपर्यंतच्या ब्लॉकमुळे काही महत्त्वाच्या फेऱ्या पूर्णपणे रद्द केल्या आहेत. यात 8 ऑक्टोबरला रात्री 10.47 ची CSMT-कसारा लोकल आणि 9 ऑक्टोबरला मध्यरात्री 12.08 ची CSMT-कसारा लोकल आहे. 8 ऑक्टोबरला रात्री 11.14 ची टिटवाळा-ठाणे लोकल आणि 9 ऑक्टोबरला पहाटे 3.51 ची कसारा-CSMT लोकलही रद्द आहे.
प्रवाशांनी घराबाहेर पडण्यापूर्वी सुधारित वेळापत्रक तपासूनच प्रवास करावा, असे आवाहन रेल्वे प्रशासनाने केले आहे.
