पैशाचा माज सोशल मीडियावर दाखवला आणि इन्फ्लुएन्सर महिलेला एक कोटीचा फटका बसला

सोशल मीडियावर पैशांचा आणि दागिन्यांचा दिखावा करणं एका इन्फ्लुएन्सर महिलेला चांगलंच महागात पडलं आहे. कन्याकुमारीतील मधुमिता नावाची ही महिला नेहमी आपले दागिने, घर आणि पैसे दाखवत रील बनवते. काही दिवसांपूर्वी तिने असाच एक व्हिडीओ टाकला होता, ज्यात ती 500 रुपयांच्या नोटांची बंडलं आणि अंगावर ढिगभर दागिने घालून दिसत होती. एवढंच नाही तर या व्हिडीओत तिने आपल्या लेकीच्या अंगावर चक्क नोटांचा पाऊस पाडला होता. हा व्हिडीओ प्रचंड व्हायरल झाला आणि लाखो लोकांपर्यंत पोहोचला.

हाच व्हिडीओ चोरांच्याही नजरेस पडला आणि तिथूनच पुढचा सगळा प्रकार सुरू झाल्याचं समोर येत आहे. मधुमिता आणि तिचा नवरा एके दिवशी बाजारात खरेदीसाठी बाहेर पडले होते. नेमकी हीच संधी साधत चोरांनी घरात घुसखोरी केली. घरातले सोन्याचे दागिने, हिऱ्याचे हार आणि तब्बल 50 हजार रुपये रोख घेऊन ते पसार झाले. चोरीला गेलेल्या या सगळ्या ऐवजाची किंमत जवळपास एक कोटी रुपये असल्याचं सांगितलं जात आहे.

घरी परतल्यावर मधुमिताला हा प्रकार बघून जबरदस्त धक्का बसला. तिने लगेच पोलिसात तक्रार दिली, त्यानंतर पोलिसांनी तपासाला सुरुवात केली. चोरांचा शोध घेण्यासाठी पाच वेगवेगळ्या टीम तयार करण्यात आल्या आहेत. मात्र घरात सीसीटीव्ही असतानाही चोर आत कसे शिरले आणि त्यांना घराची इतकी बारीक माहिती कशी मिळाली, हा प्रश्न अजूनही अनुत्तरित आहे. पाच टीम तयार करूनही चोरांचा अजून काहीच सुगावा लागलेला नाही, आणि तपास कोणत्या दिशेने पुढे जाईल याकडे सगळ्यांचं लक्ष लागलं आहे.

पोलिसांना संशय आहे की चोरांनी मधुमिताच्या जुन्याच रीलचा अभ्यास करूनच ही चोरी केली असावी. कारणही तसंच आहे, तिच्या आधीच्या अनेक व्हिडीओंमध्ये घराचा आतला भाग स्पष्ट दिसत होता. सामान कुठे ठेवलंय, लॉकर नेमका कुठे आहे, दागिने कुठे ठेवले जातात, हे सगळंच त्या व्हिडीओंमधून उघड होत होतं. एका रीलमध्ये तर तिने दागिन्यांची काळजी कशी घ्यावी हेदेखील सांगितलं होतं. म्हणजे घराची अंतर्गत रचना, वस्तू ठेवण्याची जागा आणि सुरक्षेची पद्धत, हे सगळं तिने नकळत स्वतःच सोशल मीडियावर उघड केलं होतं. त्यामुळे चोरांनी आधी सगळी रेकी करूनच चोरी घडवली असावी, असा पोलिसांचा अंदाज आहे. तपास अजून सुरू आहे.

या घटनेनंतर घाबरलेल्या मधुमिताने आपले सगळे सोशल मीडिया अकाउंट बंद करून टाकले आहेत. एरवी लाखो लोकांसमोर आपली श्रीमंती मिरवणारी ही महिला आता पूर्णपणे सोशल मीडियापासून दूर गेली आहे. सोशल मीडियावर पैशांचं आणि श्रीमंतीचं जाहीर प्रदर्शन किती धोकादायक ठरू शकतं, हेच या घटनेने पुन्हा एकदा दाखवून दिलं आहे.