कामोठे भागात अमली पदार्थ विरोधी कारवाई, ६.५ ग्रॅम हेरॉईनसह पाच जणांना अटक

नवी मुंबईतील कामोठे भागात सुरू असलेल्या अमली पदार्थांच्या अवैध खरेदी-विक्रीवर पोलिसांनी धडक कारवाई केली असून, या कारवाईत ६.५ ग्रॅम हेरॉईन जप्त करण्यात आले आहे. या हेरॉईनची बाजारातील किंमत साधारण १ लाख ३० हजार रुपये इतकी सांगितली जाते. या प्रकरणी पुरवठादार, विक्रेते आणि मध्यस्थ अशा एकूण पाच जणांना पोलिसांनी ताब्यात घेऊन अटक केली आहे. वरिष्ठ पोलीस निरीक्षक संदीप निगडे यांच्या नेतृत्वाखाली अमली पदार्थ विरोधी पथकाने ही कारवाई पार पाडली.

१५ सप्टेंबर रोजी कामोठे परिसरात अमली पदार्थांची खरेदी-विक्री होणार असल्याची गोपनीय माहिती वरिष्ठ पोलीस निरीक्षक संदीप निगडे यांना मिळाली होती. ही माहिती मिळताच त्यांनी पथकाला तातडीने कारवाईचे आदेश दिले आणि शिवकल्पतरू आर्केड परिसरात सापळा रचण्यात आला. या सापळ्यात संशयास्पदरीत्या फिरणाऱ्या महेश शिवलखन सिंग (वय ३४, रा. कामोठे) याला पोलिसांनी ताब्यात घेतले. त्याची अंगझडती घेतली असता त्याच्याकडून ६.५ ग्रॅम हेरॉईन आढळून आले, त्यानंतर पोलिसांनी हे हेरॉईन जप्त करून महेश सिंगला अटक केली.

महेश सिंगकडे केलेल्या चौकशीतून अमली पदार्थांच्या पुरवठा साखळीबाबत महत्त्वाची माहिती पोलिसांच्या हाती लागली. या माहितीच्या आधारे पथकाने नवी मुंबई तसेच मुंबई परिसरात पुढील कारवाई केली आणि हरप्रितसिंग उर्फ हॅरी, जगदेवसिंग उर्फ जग्गी (वय ३८) आणि जगप्रितसिंग उर्फ निज्जर (वय २६) यांना ताब्यात घेतले. हरप्रितसिंगला खारघरमधून, जगदेवसिंगला बोरीवलीतून, तर जगप्रितसिंगला सायन कोळीवाडा परिसरातून अटक करण्यात आली. हा अमली पदार्थांचा साठा पुढे कळंबोली परिसरात विक्रीसाठी पाठवला जाणार असल्याची माहिती तपासादरम्यान समोर आली, त्यानंतर करीयाठील चकाला येथून एल्विन अँटोनी (वय ३४) यालाही पोलिसांनी अटक केली.

या प्रकरणी कामोठे पोलीस स्टेशनमध्ये गुन्हा दाखल करण्यात आला आहे. अटक करण्यात आलेल्या पाचही आरोपींना न्यायालयात हजर करण्यात आले असता न्यायालयाने त्यांना दोन दिवसांची न्यायालयीन कोठडी सुनावली. या रॅकेटचे आणखी धागेदोरे कोणते आहेत, अमली पदार्थांचा पुरवठा नेमका कुठून होत होता आणि या साखळीत आणखी कोणाकोणाचा सहभाग आहे, याचा पुढील तपास सहायक पोलीस निरीक्षक गणेश पाटील करत आहेत.

नवी मुंबई पोलिसांनी अमली पदार्थांच्या अवैध व्यवहाराविरोधात कारवाईची मोहीम अधिक तीव्र केली आहे. संदीप निगडे यांच्या नेतृत्वाखालील अमली पदार्थ विरोधी पथकाने गोपनीय माहितीच्या आधारे केलेली ही कारवाई विशेष ठरली आहे. अचूक नियोजन, सापळा रचून केलेली कारवाई आणि सखोल तपास यांच्या मदतीने कामोठ्यापासून मुंबईपर्यंत पसरलेली पुरवठा साखळी उघडकीस आणण्यात पथकाला यश आले आहे.