कल्याणमध्ये मालकाचे ४० लाख लुटले, माजी कर्मचाऱ्याचा कट; ३६ लाख जप्त, सहा जण अटकेत

कल्याणमध्ये ४० लाख रुपयांच्या लुटीचा गुन्हा उघडकीस आणण्यात कल्याण क्राईम ब्रँचला यश आले आहे. दुकानातून चोरीच्या संशयावरून काढून टाकलेल्या एका माजी कर्मचाऱ्याने तीन महिन्यांचा पगार मिळाला नसल्याच्या रागातून साथीदारांच्या मदतीने ही लूट घडवून आणल्याचे पोलिसांच्या तपासात उघड झाले आहे. या प्रकरणी सहा आरोपींना अटक करण्यात आली असून लुटीच्या रकमेपैकी ३६ लाख रुपये पोलिसांनी परत मिळवले आहेत.

१५ सप्टेंबर रोजी कल्याण-आग्रा रोडवर ही घटना घडली. फारूक अत्तार आणि त्यांचा एक साथीदार ४० लाख रुपये घेऊन बँक ऑफ बडोदाच्या शाखेत भरण्यासाठी निघाले होते. त्याचवेळी दोन दुचाकींवरून आलेल्या चार जणांनी त्यांना रस्त्यात अडवले. आरोपींनी दोघांना खाली पाडून त्यांच्याकडची ४० लाखांची रक्कम हिसकावली आणि तिथून पळ काढला. भररस्त्यात झालेल्या या लुटीमुळे परिसरात एकच खळबळ उडाली.

घटनेनंतर बाजारपेठ पोलीस स्टेशन आणि कल्याण क्राईम ब्रँचने तपासाला सुरुवात केली. कल्याण क्राईम ब्रँचचे वरिष्ठ पोलीस निरीक्षक अजित शिंदे यांच्या मार्गदर्शनाखाली तपास पुढे नेण्यात आला. तपासादरम्यान पोलिसांनी शोहेब शेख या कर्मचाऱ्याला ताब्यात घेऊन चौकशी केली, तेव्हा लुटीच्या कटाबाबत महत्त्वाची माहिती मिळाल्याचे पोलिसांचे म्हणणे आहे. यानंतर तपासाची दिशा मुख्य संशयित समीर शेख आणि त्याच्या साथीदारांकडे वळली.

पोलिसांनी समीर शेख, आफताब खान, शहनवाज अन्सारी, शोहेब शेख, मुजाहिद खान आणि शाहिद शेख या सहा जणांना अटक केली. आरोपींकडून लुटीच्या ४० लाखांपैकी तब्बल ३६ लाख रुपये जप्त करण्यात आल्याची माहिती पोलिसांनी दिली.

पोलिसांच्या तपासानुसार, मुख्य आरोपी समीर शेख हा उल्हासनगरमधील क्रांती फूड या दुकानात काम करत होता. चोरीच्या संशयावरून त्याला कामावरून काढण्यात आले होते आणि त्यावेळी त्याचा तीन महिन्यांचा पगारही दिला गेला नव्हता, असा दावा आहे. याच रागातून समीरने दुकानदाराला लुटण्याचा कट रचल्याचे तपासात समोर आले आहे.

समीरने आधी याच दुकानात काम केल्यामुळे तिथले आर्थिक व्यवहार त्याला माहीत होते. दुकानातून किती रक्कम बाहेर नेली जाते, पैसे बँकेत कधी भरले जातात आणि ते कुठून नेले जातात, याची इत्थंभूत माहिती त्याच्याकडे होती, असे पोलिसांचे म्हणणे आहे. याच माहितीच्या आधारे साथीदारांसोबत नियोजन करून पैसे बँकेत जमा करण्यासाठी नेले जात असतानाच त्याने लुटीचा कट अमलात आणला, असा पोलिसांचा दावा आहे.

घटनेनंतर वेगाने तपास करत पोलिसांनी सहा संशयितांना अटक केली आणि त्यांच्याकडून ३६ लाख रुपये जप्त केले. उरलेली रक्कम आणि या गुन्ह्यात आणखी कोणाचा सहभाग आहे का, याचा पुढील तपास सुरू आहे. या प्रकरणाचा तपास कल्याण क्राईम ब्रँच आणि बाजारपेठ पोलीस करत आहेत. आरोपींवरील आरोप न्यायालयात सिद्ध होणे बाकी आहे.