कळमेश्वर एमआयडीसीत स्टीम बॉयलरचा स्फोट, भिंतीचा भाग कोसळला, तीन कामगार जखमी

नागपूर जिल्ह्यातून एक मोठी बातमी समोर आली आहे. जिल्ह्यातील कळमेश्वर एमआयडीसीत शनिवारी रात्री मोठा स्फोट झाला. तिथल्या केमफिल्ड कंपनीतील स्टीम बॉयलर फुटला. रात्री साडेनऊच्या सुमारास ही दुर्घटना घडल्याची माहिती आहे.

या स्फोटात तीन कामगार किरकोळ जखमी झाले आहेत. सुदैवाने मोठी दुर्घटना टळली, असे सांगण्यात आले आहे. जखमींमध्ये नीरज यादव, रवी निषाद आणि जून बंदसिंग या 18 वर्षीय कामगारांचा समावेश आहे. तिघांना आधी खासगी रुग्णालयात दाखल करण्यात आले. तिथे प्राथमिक उपचार झाल्यानंतर त्यांना रात्रीच घरी सोडण्यात आल्याची माहिती आहे.

स्फोट इतका जोरदार होता की कंपनीच्या भिंतीचा काही भाग कोसळला. स्फोट कशामुळे झाला, याबद्दल तापमानात अचानक झालेल्या चढ-उतारामुळे तो झाल्याचा प्राथमिक अंदाज व्यक्त करण्यात आला आहे. हा केवळ प्राथमिक अंदाज आहे. स्फोटाचे अंतिम आणि नेमके कारण अजून समोर आलेले नाही.

घटनेची माहिती मिळताच कळमेश्वर पोलीस घटनास्थळी पोचले. त्यांनी जागेची पाहणी केली आणि स्फोटाचे नेमके कारण शोधण्यासाठी तपास सुरू केला आहे. या घटनेनंतर परिसरात काही काळ भीतीचे वातावरण पसरले होते.

दुसरीकडे, नागपूरच्या वर्धमान नगर भागातील प्लास्टिकच्या गोदामाला भीषण आग लागल्याची घटना घडली आहे. पहाटे सहाच्या सुमारास ही आग लागल्याची माहिती आहे. या आगीत मोठ्या प्रमाणात प्लास्टिक साहित्य जळून राख झाले. घटनेची माहिती मिळताच अग्निशमन विभागाच्या चार गाड्या घटनास्थळी पोचल्या आणि त्या गाड्यांच्या मदतीने आग विझवण्याचे काम झाले.

परिणामी आग आता नियंत्रणात आली आहे. मात्र ही आग नेमकी कशामुळे लागली, हे अजूनही स्पष्ट झालेले नाही.

नागपुरातील लकडगंज लघुउद्योग परिसरात रविवारी सकाळी प्लास्टिक बारदानाच्या गोदामाला लागलेल्या आगीमुळे परिसरात एकच खळबळ उडाली. या गोदामात प्लास्टिकचा कच्चा माल आणि तयार साहित्य मोठ्या प्रमाणात साठवून ठेवले होते. प्लास्टिक अत्यंत ज्वलनशील असल्याने आगीने काही वेळातच भीषण रूप घेतले. गोदामातून मोठ्या प्रमाणात काळा धूर बाहेर पडत होता आणि परिसरात धुराचे लोट पसरले. अग्निशमन जवानांनी आग आटोक्यात आणण्यासाठी युद्धपातळीवर प्रयत्न सुरू केले.