१९ ऑक्टोबरला राज्यात काही ठिकाणी हलक्या सरी, बहुतेक जिल्ह्यांत ढगाळ हवा आणि उकाडा

महाराष्ट्रात काही भागांत पावसाच्या हलक्या सरी पडण्याची शक्यता आहे. मात्र राज्यातील बहुतेक जिल्ह्यांत ढगाळ हवा आणि उकाडा जाणवणार आहे. १८ आणि १९ ऑक्टोबरला हवेचा दाब १०१० हेप्टापास्कल राहील, असा अंदाज आहे. त्यामुळे कोकण, मराठवाडा, पश्चिम महाराष्ट्र आणि विदर्भातील काही जिल्ह्यांत पाऊस पडू शकतो. पण २० ते २४ ऑक्टोबरदरम्यान हवेचा दाब वाढणार असल्याने पावसाची शक्यता कमी होईल. सकाळी थोडा गारवा असेल आणि दुपारी उष्ण व कोरडी हवा राहण्याची शक्यता आहे.

कोकणात सिंधुदुर्गमध्ये १० मिमी, रत्नागिरीत ६ मिमी आणि रायगडमध्ये ३ मिमी पावसाची शक्यता आहे. ठाणे आणि पालघरमध्ये पावसाचा अंदाज नाही. पश्चिम महाराष्ट्रात कोल्हापूरमध्ये १३ मिमी, सांगलीत १० मिमी आणि साताऱ्यात ९ मिमी पाऊस पडू शकतो. पुणे आणि सोलापूरमध्ये प्रत्येकी ६ मिमी, तर अहिल्यानगरमध्ये १ मिमी पावसाची शक्यता आहे.

उत्तर महाराष्ट्रात नाशिक, धुळे, नंदुरबार आणि जळगावमध्ये पावसाची शक्यता नाही. तिथे दुपारी हवा कोरडी राहण्याचा अंदाज आहे. मराठवाड्यात धाराशिवमध्ये ६ मिमी, लातूरमध्ये ५ मिमी, नांदेडमध्ये ३ मिमी आणि बीडमध्ये २ मिमी पाऊस पडू शकतो. परभणी, हिंगोली, जालना आणि छत्रपती संभाजीनगरमध्ये अत्यल्प पावसाची शक्यता आहे.

विदर्भात अकोला आणि वाशीममध्ये अत्यल्प पाऊस पडू शकतो. बुलढाणा आणि अमरावतीमध्ये पावसाची शक्यता नाही. वर्धा आणि नागपूरमध्ये अत्यल्प पावसाचा अंदाज आहे, तर यवतमाळमध्ये पाऊस पडण्याची शक्यता नाही. चंद्रपूर आणि गडचिरोलीमध्ये २ ते ३ मिमी पाऊस पडू शकतो. भंडारा आणि गोंदियात पावसाची उघडीप राहील, असा अंदाज आहे.

कोकणात कमाल तापमान सिंधुदुर्गमध्ये ३३ अंश, रत्नागिरीत ३४ अंश, रायगडमध्ये ३५ अंश आणि ठाणे व पालघरमध्ये ३६ अंश सेल्सिअस राहू शकते. किमान तापमान २४ ते २५ अंशांदरम्यान असेल. पश्चिम महाराष्ट्रात कोल्हापूर आणि सांगलीमध्ये कमाल ३२ अंश, पुणे आणि साताऱ्यात ३४ अंश, तर सोलापूर आणि अहिल्यानगरमध्ये ३५ अंश सेल्सिअस राहण्याचा अंदाज आहे. तिथे किमान तापमान २२ ते २३ अंश असेल.

उत्तर महाराष्ट्रात नाशिकमध्ये कमाल ३५ अंश, धुळे आणि नंदुरबारमध्ये ३६ अंश, तर जळगावमध्ये ३७ अंश सेल्सिअस तापमान राहील. सर्व जिल्ह्यांत किमान तापमान २४ अंश असेल. मराठवाड्यात लातूरमध्ये कमाल ३४ अंश, तर बाकीच्या जिल्ह्यांत ३५ अंश सेल्सिअस राहू शकते. किमान तापमान २२ ते २४ अंशांदरम्यान असेल.

विदर्भात अकोल्यात कमाल तापमान ३६ अंश, तर बुलढाणा, वाशीम आणि अमरावतीमध्ये ३५ अंश सेल्सिअस राहील. तिथे किमान तापमान २२ ते २३ अंश असेल. वर्धा, नागपूर आणि यवतमाळमध्ये कमाल ३५ अंश आणि किमान २३ अंश सेल्सिअस राहण्याची शक्यता आहे. गोंदियात कमाल ३४ अंश, तर चंद्रपूर, गडचिरोली आणि भंडाऱ्यात ३५ अंश सेल्सिअस राहू शकते. तिथे किमान तापमान २३ ते २४ अंश असेल.

ऑक्टोबर-नोव्हेंबरमध्ये पाऊस कमी राहण्याचा अंदाज आहे. प्रशांत महासागरातील पाण्याचे तापमान पनामाजवळ ३० अंश सेल्सिअसपर्यंत पोहोचल्याने एल-निनोचा प्रभाव जास्त राहण्याची शक्यता आहे. दुसरीकडे, हिंदी महासागराच्या पश्चिम भागातील तापमान २९ ते ३० अंशांपर्यंत वाढल्याने सकारात्मक आयओडीचा प्रभाव एल-निनोची तीव्रता काही प्रमाणात कमी करू शकतो. बंगालच्या उपसागरातील तापमान ३० ते ३१ अंश सेल्सिअस असल्याने हलक्या पावसासाठी पोषक वातावरण तयार होऊ शकते. तरीही यंदा एल-निनोच्या प्रभावामुळे ऑक्टोबर आणि नोव्हेंबरमध्ये पावसाचे प्रमाण तुलनेने कमी राहील, असा अंदाज आहे.