जुन्नरमध्ये रात्री घरे फोडणारी टोळी पकडली; ३८.५० लाखांचा ऐवज हस्तगत, चौघे अटकेत

जुन्नर तालुक्यात रात्रीच्या वेळी घरे फोडून सोन्या-चांदीचे दागिने चोरणाऱ्या आंतरजिल्हा टोळीचा पुणे ग्रामीण पोलिसांनी पर्दाफाश केला आहे. स्थानिक गुन्हे शाखा आणि ओतूर पोलिसांनी मिळून ही कारवाई केली. त्यात ओतूर पोलीस ठाण्याच्या हद्दीतील तीन आणि नारायणगाव पोलीस ठाण्याच्या हद्दीतील एक, असे एकूण चार घरफोडीचे गुन्हे उघडकीस आले आहेत.

या प्रकरणात तिघा आरोपींना अटक झाली आहे. चोरीचे चांदीचे दागिने खरेदी केल्याच्या आरोपावरून आणखी एका व्यक्तीलाही पोलिसांनी अटक केली. पोलिसांनी १९ तोळे सोन्याचे दागिने, २ किलो ७७० ग्रॅम चांदी, दोन लाख रुपये रोख आणि गुन्ह्यात वापरलेली कार, असा एकूण ३८ लाख ५० हजार रुपयांचा मुद्देमाल जप्त केला.

५ ऑक्टोबर २०२६ रोजी ओतूर पोलीस ठाण्याच्या हद्दीत अज्ञात व्यक्तींनी घराचे कुलूप तोडून सोन्या-चांदीचे दागिने चोरून नेले होते. ओतूर आणि नारायणगाव परिसरात अशाच घरफोड्या झाल्याने या गुन्ह्यांचा छडा लावणे पोलिसांसाठी आव्हान ठरले होते. पुणे ग्रामीणचे पोलीस अधीक्षक संदीप सिंह गिल्ल यांनी स्थानिक गुन्हे शाखेच्या पथकाला गुन्हे उघडकीस आणून आरोपींना अटक करण्याच्या सूचना दिल्या. त्यानुसार स्थानिक गुन्हे शाखेने समांतर तपास सुरू केला.

घटनास्थळावरील सीसीटीव्ही फुटेज तपासताना पोलिसांना एक संशयित कार दिसली. तिचा माग काढण्यासाठी ओतूरपासून नाशिकपर्यंतच्या मार्गावरील सुमारे १५० सीसीटीव्ही कॅमेऱ्यांचे फुटेज तपासले गेले. तांत्रिक तपास आणि गोपनीय बातमीदारांकडून मिळालेल्या माहितीच्या आधारे ही कार वापरणाऱ्याचा शोध घेण्यात आला.

नाशिकमधील इंदिरानगर आणि वडाळा परिसरात चौकशी केल्यावर ही कार सोनू उर्फ मोहम्मद शरीफ रसूल शेख वापरत असल्याचे पोलिसांना समजले. त्याच्यासोबत वसीम पठाण आणि अदनान पठाण हे दोन साथीदार असल्याचेही तपासात समोर आले. पोलिसांच्या पथकाने सापळा रचून नाशिकमधील वडाळा आणि लासलगाव परिसरातून तिघांना ताब्यात घेतले.

अटक झालेल्यांची नावे अशी: वसीम मुनीर पठाण (वय २९, रा. पिंपळगाव नजीक, लासलगाव, ता. निफाड, जि. नाशिक); अदनान युनूस पठाण (वय २६, सध्या रा. वडाळा, इंदिरानगर, नाशिक; मूळ रा. पिंपळगाव नजीक, लासलगाव, ता. निफाड, जि. नाशिक); आणि सोनू उर्फ मोहम्मद शरीफ रसूल शेख (वय ४०, रा. पिंपळगाव नजीक, लासलगाव, ता. निफाड, जि. नाशिक). चौकशीत या घरफोड्यांमध्ये सहभाग असल्याची कबुली आरोपींनी दिल्याचे प्रसिद्धिपत्रकात म्हटले आहे.

गुन्हे करताना पकडले जाऊ नये आणि एकमेकांशी संपर्क साधता यावा, यासाठी वापरलेले वायरलेस वॉकी-टॉकी संचही पोलिसांनी जप्त केले. चोरीच्या चांदीचे दागिने खरेदी केल्याच्या आरोपावरून सागर अशोक शिंदे (वय ३०, रा. विंचूर, ता. निफाड, जि. नाशिक) यालाही अटक झाली आहे.

उघडकीस आलेले गुन्हे असे: ओतूर पोलीस ठाणे, गुन्हा रजिस्टर क्रमांक २६५/२०२६, २१८/२०२६ आणि १३७/२०२६; तसेच नारायणगाव पोलीस ठाणे, गुन्हा रजिस्टर क्रमांक २०३/२०२६. हे गुन्हे भारतीय न्याय संहितेतील संबंधित कलमांनुसार नोंदवले आहेत.

ही कारवाई पोलीस अधीक्षक संदीप सिंह गिल्ल, अपर पोलीस अधीक्षक डॉ. शुभम कुमार आणि उपविभागीय पोलीस अधिकारी धनंजय पाटील यांच्या मार्गदर्शनाखाली झाली. स्थानिक गुन्हे शाखेचे पोलीस निरीक्षक प्रमोद क्षीरसागर, सहायक पोलीस निरीक्षक महादेव शेलार, ओतूर पोलीस ठाण्याचे सहायक पोलीस निरीक्षक ज्ञानेश्वर बाजगिरे, पोलीस उपनिरीक्षक युवराज जाधव, सहायक फौजदार दीपक साबळे, तसेच पोलीस अंमलदार संदीप वारे, राजू मोमीन, अक्षय नवले, अभिमन्यू मोटे, भारत मोहोळ, चेतन पाटील, नरेंद्र गोराणे, बाळशिराम भवारी, विशाल गोडसे आणि धनंजय पालवे यांनी यात भाग घेतला.

या प्रकरणाचा पुढील तपास ओतूर पोलीस ठाण्याचे पोलीस उपनिरीक्षक युवराज जाधव करत आहेत. या टोळीने इतर ठिकाणीही घरफोड्या केल्या आहेत का, याचा तपास सुरू आहे. चार गुन्ह्यांचा उलगडा झाल्याने जुन्नर तालुक्यातील नागरिकांना दिलासा मिळाला आहे.

ओतूर पोलीस स्टेशनचे सहाय्यक पोलीस निरीक्षक ज्ञानेश्वर बाजगिरे यांनी नागरिकांना आवाहन केले आहे. घर बंद करून बाहेर जाताना किंवा रात्री सुरक्षिततेसाठी घरी सीसीटीव्ही कॅमेरे आणि दरवाज्याला सेन्सर लॉक बसवावेत, तसेच आजूबाजूला काही संशयास्पद हालचाली दिसल्यास तात्काळ पोलिसांना कळवावे, असे पोलिसांनी सांगितले आहे. रात्रीच्या घरफोड्यांमुळे नागरिकांत निर्माण होणारी भीती दूर करण्यासाठी अशा गुन्ह्यांचा तपास वेगाने आणि प्रभावीपणे होणे आवश्यक आहे, असे बाजगिरे यांनी म्हटले आहे.