डेटा नको असलेल्यांसाठी जिओचे चार नवे व्हॉईस ओन्ली प्लॅन, 147 रुपयांपासून सुरुवात

ज्यांना मोबाईलवर डेटा नको आहे आणि फक्त बोलण्यापुरता रिचार्ज हवा आहे, त्यांच्यासाठी जिओने भारतात चार नवे व्हॉईस ओन्ली रिचार्ज प्लॅन जाहीर केले आहेत. हे सगळे प्लॅन व्हॉईस ओन्ली आहेत, म्हणजे त्यात डेटा मिळणार नाही. एअरटेल आणि व्होडाफोन आयडिया यांनी याआधीच असे प्लॅन आणले होते. त्यानंतर आता भारतातील आघाडीची टेलिकॉम कंपनी असलेल्या जिओनेही अशा प्लॅनची घोषणा केली आहे.

टेलीकॉम रेगुलेटरी अथॉरिटी ऑफ इंडिया म्हणजेच ट्राय (TRAI) यांनी काही आदेश जारी केले आहेत. टेलिकॉम कंपन्यांनी व्हॉईस ओन्ली रिचार्ज प्लॅन आणावेत, असे ट्रायने या आदेशांत सांगितले आहे. त्या आदेशांनंतरच कंपन्यांनी हे प्लॅन बाजारात आणले आहेत. जिओने आणलेल्या नव्या प्लॅनची किंमत आणि व्हॅलिडिटी काय आहे, ते आता पाहू.

कंपनीने आणलेल्या प्लॅनमधला सगळ्यात स्वस्त प्लॅन 147 रुपयांचा आहे. त्याची व्हॅलिडिटी 22 दिवसांची असून त्यात ग्राहकांना अनलिमिटेड कॉलिंग आणि 300 एसएमएस मिळतात. हा प्लॅन घ्यायचा असेल, तर ग्राहकांना दररोज 6.68 रुपये खर्च करावे लागतील.

दुसरा प्लॅन 177 रुपयांचा आहे. त्याची व्हॅलिडिटी 28 दिवसांची आहे. या प्लॅनमध्येही अनलिमिटेड कॉलिंग आणि 300 एसएमएसची सुविधा मिळणार आहे. हा प्लॅन घेण्यासाठी ग्राहकांना दररोज 6.32 रुपये खर्च करावे लागतील.

तिसऱ्या प्लॅनची किंमत 196 रुपये आहे. यात अनलिमिटेड कॉल्स आणि 300 एसएमएस मिळणार आहेत, तर प्लॅनची व्हॅलिडिटी 30 दिवसांची आहे. हा प्लॅन घेण्यासाठी ग्राहकांना दररोज 6.53 रुपये खर्च करावे लागतील.

चौथा प्लॅन 197 रुपयांचा आहे. त्याची व्हॅलिडिटी संपूर्ण एका महिन्याची आहे. यातही अनलिमिटेड कॉल्स आणि 300 एसएमएस मिळणार आहेत. मात्र ज्या महिन्यासाठी रिचार्ज केला जातो, त्या महिन्यात किती दिवस आहेत, त्यानुसार या प्लॅनचा दैनंदिन खर्च बदलतो.

या नव्या प्लॅनशिवाय कंपनी 448 रुपये आणि 1,748 रुपयांचे प्लॅनही देते. त्यांची व्हॅलिडिटी अनुक्रमे 84 दिवस आणि 336 दिवस आहे. ज्या ग्राहकांना डेटाचा फायदा नको आहे, त्यांच्यासाठी कंपनीने हे व्हॉईस ओन्ली प्लॅन आणले आहेत.

तुम्ही जर 200 रुपयांहून कमी किमतीचा रिचार्ज प्लॅन शोधत असाल, तर जिओचा 189 रुपयांचा प्लॅन तुम्ही पाहू शकता. या प्लॅनमध्ये 28 दिवसांची व्हॅलिडिटी मिळणार आहे. त्यात अनलिमिटेड वॉयस कॉल्स, 300 एसएमएस आणि 2GB डेटा मिळणार आहे. शिवाय या प्लॅनसोबत जिओटिव्ही आणि जिओएआयक्लाऊड यांचे फायदेही मिळतात.