जिवतीत बंद घरातून ६३ हजार ८०० रुपयांची रोकड चोरीला

जिवती : करणकोंडी येथे एका बंद घरातून ६३ हजार ८०० रुपयांची रोख रक्कम चोरीला गेल्याचा प्रकार १ ऑक्टोबर रोजी उघडकीस आला. घरातील सगळे सदस्य बाहेर गेल्याची संधी साधून अज्ञात व्यक्तीने घरात प्रवेश केला, असे तक्रारीत म्हटले आहे. त्यानंतर कपाटाचे आणि त्यातील स्टीलच्या डब्याचे कुलूप तोडण्यात आले. डब्यात ठेवलेली रोकड चोरीला गेल्याचे १ ऑक्टोबरला लक्षात आले.

याप्रकरणी संदीप व्यंकटी लिंगमपल्ले यांनी जिवती पोलीस स्टेशनमध्ये तक्रार दिली. त्यांच्या तक्रारीवरून अज्ञात आरोपीविरुद्ध गुन्हा नोंदवण्यात आला असून पुढील तपास सुरू आहे.

पोलिसांकडून मिळालेल्या माहितीनुसार, संदीप लिंगमपल्ले (वय २७) हे करणकोंडी येथे कुटुंबासह राहतात. जिवती येथे त्यांचे सलून दुकान आहे. दुकानातल्या कामातून मिळणारे पैसे लोकांची उधारी फेडण्यासाठी त्यांनी गेल्या दोन-तीन महिन्यांपासून घरातील कपाटातल्या स्टीलच्या डब्यात साठवून ठेवले होते.

३० सप्टेंबर रोजी सकाळी नेहमीप्रमाणे पैसे तपासून ते दुकानात गेले. त्या दिवशी घरातील सगळे सदस्य वेगवेगळ्या कामासाठी बाहेर गेले होते, त्यामुळे घर बंद होते. दुपारी घरच्यांना दरवाजाच्या कडीचा एक खिळा निघालेला दिसला, पण त्यांनी तो ठोकून पुन्हा होता तसा बसवला.

त्यानंतर १ ऑक्टोबरच्या सकाळी दुकानाचे भाडे द्यायचे होते. त्यासाठी संदीप लिंगमपल्ले जुन्या घरातील कपाटाकडे गेले, तेव्हा कपाटाचे आणि त्यातील स्टीलच्या डब्याचे कुलूप तोडलेले दिसले. डब्यात ठेवलेल्या नोटा गायब होत्या.

डब्यात ५०० रुपयांच्या ४५ नोटा (२२,५०० रुपये), २०० रुपयांच्या २९ नोटा (५,८०० रुपये), १०० रुपयांच्या ३२० नोटा (३२,००० रुपये) आणि लहान नोटांची चिल्लर (३,५०० रुपये) होती. हे सगळे मिळून एकूण ६३,८०० रुपयांची रोकड चोरीला गेल्याचे उघडकीस आले.

घर बंद असल्याचे पाहून अज्ञात व्यक्तीने दरवाजाच्या कडीचा खिळा काढून आत प्रवेश केला आणि रोकड नेली, असे तक्रारीत म्हटले आहे. रोकड चोरीला गेल्याची खात्री झाल्यानंतर लिंगमपल्ले यांनी जिवती पोलीस स्टेशन गाठले आणि तक्रार नोंदवली.

या तक्रारीवरून जिवती पोलिसांनी अज्ञात चोराविरुद्ध भारतीय न्याय संहिता (BNS) २०२३ च्या कलम ३३१(३) आणि ३०५(a) अन्वये गुन्हा नोंदवला आहे. पुढील तपास पोलीस उपनिरीक्षक निखिल रहाटे करत आहेत. या प्रकरणात कोणाला अटक झाल्याचे सांगण्यात आलेले नाही.