जेजुरीत भाजप युवा मोर्चाचा मेळावा; तरुणांना संघटनेत संधी द्या, पडळकरांचे आवाहन

जेजुरी येथे भारतीय जनता युवा मोर्चा, पुणे ग्रामीणच्या वतीने 'युवा निर्धार मेळावा' आयोजित करण्यात आला होता. या मेळाव्याला हजारो युवा कार्यकर्ते उपस्थित होते. युवा प्रश्न, रोजगार, शिक्षण, कौशल्य विकास, शासकीय योजना आणि संघटनात्मक विस्तार या विषयांवर यावेळी मार्गदर्शन करण्यात आले.

या मेळाव्यात बोलताना आमदार गोपीचंद पडळकर यांनी कार्यकर्त्यांना आवाहन केले. भारतीय जनता पक्षाची ताकद घराणेशाहीत नसून सामान्य कार्यकर्त्याच्या कर्तृत्वाला संधी देणाऱ्या संघटनात्मक विचारधारेत आहे, असे ते म्हणाले. गावागाड्यातील, उपेक्षित आणि वंचित घटकांतील होतकरू तरुणांना संघटनेत व्यासपीठ देऊन पुढे आणण्याची जबाबदारी युवा मोर्चाच्या कार्यकर्त्यांनी घ्यावी, असेही त्यांनी सांगितले. शासनाच्या विविध योजनांचा अभ्यास करून त्यांचा लाभ तळागाळातील नागरिकांपर्यंत पोहोचवण्यासाठी सक्रियपणे काम करा, असेही त्यांनी म्हटले.

पडळकर म्हणाले, "भारतीय जनता पार्टी ही घराणेशाहीवर नव्हे, तर कार्यकर्त्यांच्या कर्तृत्वावर विश्वास ठेवणारी संघटना आहे. सामान्य कुटुंबातील कार्यकर्त्याला पक्षातील महत्त्वाच्या जबाबदाऱ्यांपासून देशाच्या नेतृत्वापर्यंत पोहोचण्याची संधी भाजपमध्ये मिळते." बिहारमधील सामान्य कार्यकर्ता पक्षाच्या राष्ट्रीय अध्यक्षपदापर्यंत पोहोचतो आणि पडळकरवाडीसारख्या छोट्या गावातील सामान्य कुटुंबातील तरुण विधिमंडळात पोहोचतो, हे कार्यकर्त्यांच्या कर्तृत्वाला संधी देणाऱ्या भाजपच्या विचाराचे उदाहरण आहे, असे त्यांनी सांगितले.

कार्यकर्त्यांना उद्देशून पडळकर यांनी सांगितले, "युवा मोर्चाच्या कार्यकर्त्यांची जबाबदारी मोठी आहे. गावागाड्यातील तरुणांशी संपर्क वाढवा, त्यांच्या अडचणी समजून घ्या आणि शासनाच्या योजनांचा लाभ त्यांच्यापर्यंत पोहोचवा. संघटनेत नव्या आणि होतकरू तरुणांना संधी देत त्यांना नेतृत्वासाठी तयार करा."

भाजप युवा मोर्चाचे जिल्हाध्यक्ष वैभव सोलणकर यांनी आमदार रोहित पवार यांच्यावर टीका केली. "तरुणांच्या प्रश्नांना योग्य दिशा देण्याऐवजी तरुणांची माथी भडकवण्याचे काम केले जात आहे. युवकांना भडकावण्यापेक्षा त्यांच्या हाताला रोजगार, शिक्षण आणि कौशल्याची ताकद देण्याची गरज आहे," असा आरोप सोलणकर यांनी केला.

भाजप पुणे ग्रामीणचे जिल्हाध्यक्ष शेखर वढणे यांनी संघर्षातून उभ्या राहिलेल्या पक्षाच्या प्रवासाचा आढावा घेतला. कार्यकर्त्यांनी पक्षाची विचारधारा आणि संघटन तळागाळापर्यंत पोहोचवावे, असे आवाहन त्यांनी केले.

भाजप युवा मोर्चाचे प्रदेशाध्यक्ष कृष्णराज महाडीक यांनी युवकांच्या रोजगाराच्या प्रश्नावर भर दिला. यावेळी युवाशक्तीच्या माध्यमातून संघटनेचा विस्तार करणे, युवकांच्या प्रश्नांवर काम करणे आणि गावपातळीवर संघटन अधिक मजबूत करणे, असा निर्धार करण्यात आला.

कार्यक्रमाला भाजप पुणे ग्रामीणचे प्रभारी सदाशिव खाडे, पुरंदरचे माजी आमदार संजय जगताप, सरचिटणीस बाळासाहेब गरुड, वैशाली सणस, अविनाश मोठे, पांडुरंग कचरे, भाजप नेते खलिल काजी, गोविंद देवकाते, युवा मोर्चा महामंत्री स्वप्नील मोडक, अमर बुदगुडे, विवेक साळुंके, ओंकार कड्डे, मयूर शिंदे, अनिकेत भालेराव, युवती अध्यक्ष रसिका सणस, संदीप केसकर आणि शुभम रणवरे उपस्थित होते. भाजप व युवा मोर्चाचे विविध पदाधिकारी, मंडल पदाधिकारी आणि हजारो युवा कार्यकर्तेही यावेळी हजर होते.