जेएसडब्ल्यू ग्रीनटेकला १०० इलेक्ट्रिक ट्रकची पहिली व्यावसायिक ऑर्डर, सिमेंट वाहतुकीसाठी वापर

जेएसडब्ल्यू ग्रुपच्या इलेक्ट्रिक व्यावसायिक वाहन विभागातील जेएसडब्ल्यू ग्रीनटेक लिमिटेड या कंपनीने आपल्या एएमपीस्टार इलेक्ट्रिक ट्रक्सची पहिली व्यावसायिक विक्री जाहीर केली आहे. जेएसडब्ल्यू सिमेंटच्या विजयनगर येथील प्रकल्पासाठी १०० 'एएमपीस्टार ४x२ ५५ टन ट्रॅक्टर ट्रक्स'ची ऑर्डर कंपनीला मिळाली आहे. औद्योगिक क्षेत्रातील जड मालाची वाहतूक करण्यासाठी हे ट्रक्स वापरले जातील.

या कामात जेएसडब्ल्यू इको-मोबिलिटी बॅटरी-अॅज-अ-सर्व्हिस (बीएएएस) सेवा देणार आहे, तर परादीप परिवहन लिमिटेड वाहतूक भागीदार म्हणून काम पाहणार आहे. जेएसडब्ल्यू इको-मोबिलिटी ही जेएसडब्ल्यू ग्रीनटेकची उपकंपनी आहे.

एएमपीस्टार ४x२ आणि ६x४ ट्रॅक्टर ट्रक्सना ऑटोमोटिव्ह रिसर्च असोसिएशन ऑफ इंडिया (एआरएआय) या संस्थेकडून केंद्रीय मोटार वाहन नियमांनुसार (सीएमव्हीआर) प्रमाणपत्र मिळाले आहे. त्यामुळे भारतीय रस्त्यांवर वापरण्यासाठी लागणारे सुरक्षा, कामगिरी आणि नियामक निकष हे ट्रक्स पूर्ण करतात. ब्रँड सादर केल्यानंतर महिन्याभरापेक्षा थोड्याच अधिक काळात ही ऑर्डर मिळाली आहे. म्हणजेच एएमपीस्टार ट्रक्स बाजारात सादर करण्याच्या टप्प्यातून प्रत्यक्ष वापराच्या टप्प्यात आले आहेत.

एएमपीस्टार ४x२ ५५ टन ट्रॅक्टर ट्रकची निर्मिती भारतातील कठीण व्यावसायिक परिस्थितीतही काम करता येईल अशा पद्धतीने केली आहे. या ट्रकमध्ये ४३० किलोवॅट क्षमतेची सर्वोच्च शक्ती आणि २,६०० न्यूटन-मीटरचा सर्वोच्च टॉर्क आहे. हे १०० ट्रक्स जेएसडब्ल्यू सिमेंट लिमिटेडमधील एकात्मिक वाहतूक व्यवस्थेचा भाग असतील. आंध्र प्रदेशातील नंद्याळ ते कर्नाटकातील विजयनगर या सुमारे ३३० किलोमीटरच्या मार्गावरून क्लिंकर आणि स्लॅगची वाहतूक होईल. या मार्गावर दरमहा अंदाजे १.२५ लाख टन मालाची वाहतूक होणार आहे.

जेएसडब्ल्यू इको-मोबिलिटी या ट्रक्सना बॅटरी पुरवेल आणि विजयनगर ते नंद्याळ मार्गावर स्वतंत्र वाहतूक मार्गिका तयार करेल. या मार्गावर बॅटरी बदलण्याची चार केंद्रे असतील. कराराच्या संपूर्ण कालावधीत या व्यवस्थेमुळे सुमारे ४.५ कोटी लिटर डिझेलची बचत होईल, तसेच कार्बन डायऑक्साइडचे उत्सर्जन सुमारे ६,२५० टनांनी कमी होईल, असा अंदाज आहे.

जेएसडब्ल्यू ग्रीनटेक लिमिटेडचे मुख्य कार्यकारी अधिकारी सुमित मित्तल म्हणाले, की एएमपीस्टार ब्रँडच्या अनावरणाच्या वेळी ५५ टन क्षमतेचा इलेक्ट्रिक ट्रॅक्टर ट्रक पहिल्यांदा सादर करण्यात आला होता. व्यावसायिक वाहतुकीच्या क्षेत्रातील हे एक अत्यंत आव्हानात्मक वाहन आहे. ब्रँड सादर केल्यानंतर महिन्याभरापेक्षा थोड्याच अधिक काळात कंपनीने महत्त्वाचा टप्पा गाठला आहे, असे ते म्हणाले. जेएसडब्ल्यू सिमेंटच्या औद्योगिक मालवाहतुकीसाठी पहिल्या १०० ट्रक्सचा वापर सुरू होत आहे. स्वतंत्र इलेक्ट्रिक मार्गिका आणि बॅटरी बदलण्याची केंद्रे असलेली इलेक्ट्रिक वाहतुकीची एकात्मिक व्यवस्था उभारली जात असून त्यामुळे मालाची वाहतूक सुरळीतपणे करता येईल, असे मित्तल यांनी सांगितले. जड मालाची इलेक्ट्रिक वाहतूक व्यावसायिकदृष्ट्या परवडणारी करण्याचा आणि एएमपीस्टारच्या माध्यमातून संपूर्ण भारतात मालवाहतुकीची पद्धत बदलण्याचा कंपनीचा उद्देश आहे, असेही ते म्हणाले.

जेएसडब्ल्यू सिमेंटचे वित्त संचालक नरिंदर कहलॉन यांनी सांगितले, की औद्योगिक कामकाज अधिक पर्यावरणपूरक आणि कार्यक्षम करण्यासाठी कंपनी प्रयत्नशील आहे. १०० इलेक्ट्रिक ट्रक्सचा वापर सुरू होणे हे त्या दिशेने महत्त्वाचे पाऊल आहे. यामुळे मालवाहतुकीतील कार्बन उत्सर्जन कमी करण्यास मदत होईल आणि पुरवठा साखळीतील मालाची वाहतूकही सुरू राहील. डिझेलवरील अवलंबित्व कमी करणे, उत्सर्जन घटवणे आणि पर्यावरणपूरक विकासाची उद्दिष्टे साध्य करणे यासाठी ही व्यवस्था उपयोगी ठरेल. कामकाजाच्या कार्यक्षमतेवर कोणताही परिणाम होऊ नये याचीही काळजी घेतली जात असल्याचे कहलॉन यांनी सांगितले.

एएमपीस्टारची वाहने जेएसडब्ल्यू ग्रीनटेकच्या नवीन एकात्मिक उत्पादन कारखान्यात तयार होतील. हा कारखाना महाराष्ट्रातील छत्रपती संभाजीनगर येथील ऑरिकमध्ये सुमारे ९० एकर जागेवर उभारला जात आहे. तिथे दरवर्षी १५ हजार इलेक्ट्रिक बस आणि ट्रक्स तयार करण्याची क्षमता असेल. ट्रकच्या केबिनसाठी स्वयंचलित उत्पादन लाइन आणि बॅटरीसाठी एकात्मिक व्यवस्था असेल. पुण्यातील जेएसडब्ल्यू ग्रीनटेकचे संशोधन आणि विकास केंद्रही या कारखान्याला तांत्रिक मदत करेल.

एएमपीस्टारच्या वाहनांमध्ये १५० किलोवॅट ते ५०० किलोवॅटपर्यंतच्या क्षमतेचे पर्याय उपलब्ध असतील. ग्राहकांना वाहन थेट खरेदी करता येईल किंवा भाडेतत्त्वावर घेता येईल. बॅटरी-अॅज-अ-सर्व्हिस (बीएएएस) योजनेचा पर्यायही असेल, तसेच मालकी आणि वापराचे इतर पर्याय उपलब्ध असतील. चार्जिंगसाठी आवश्यक सुविधा, आर्थिक मदत आणि विक्रीनंतरची सेवा कंपनीकडून दिली जाईल. ट्रॅक्टर ट्रक्सनंतर टिपर्स आणि फिक्स बॉडी असलेल्या डंपर्सचाही वाहनांच्या श्रेणीत समावेश करण्याची कंपनीची योजना आहे.