जेईई मेन 2027 साठी कोचिंगशिवाय अभ्यास: तीन मोफत ऑनलाइन प्लॅटफॉर्म उपयोगी

जेईई मेन 2027 ची तयारी करणाऱ्या विद्यार्थ्यांच्या हातात चांगले स्टडी मटेरियल आणि मॉक टेस्ट असणे फार गरजेचे असते. अनेकांना महागडा कोचिंग क्लास न लावता अभ्यास करायचा असतो, पण भरवशाचा कंटेंट नेमका कुठे मिळेल हेच त्यांना कळत नाही. अशा विद्यार्थ्यांसाठी ऑनलाइन असे काही प्लॅटफॉर्म उपलब्ध आहेत, जिथे मोफत व्हिडिओ लेक्चर, सराव प्रश्न आणि मॉक टेस्टची मदत मिळू शकते. जेईई मेनमध्ये चांगले गुण मिळवायचे असतील, तर या प्लॅटफॉर्मचा वापर करता येईल.

पहिला पर्याय म्हणजे "नॅशनल टेस्ट अभ्यास" हे ॲप. जेईई मेनच्या तयारीत नुसती पुस्तके वाचून भागत नाही, ठरलेल्या वेळेत प्रश्न सोडवण्याचाही सराव करावा लागतो. स्पर्धा परीक्षांची तयारी करणाऱ्या विद्यार्थ्यांसाठी नॅशनल टेस्टिंग एजन्सीने (NTA) हे ॲप तयार केले आहे.

या प्लॅटफॉर्मवर विद्यार्थी कॉम्प्युटर आधारित परीक्षा म्हणजेच CBT (Computer Based Test) पद्धतीने मॉक टेस्ट देऊ शकतात. त्यामुळे प्रत्यक्ष परीक्षेचा अनुभव मिळतो आणि मर्यादित वेळेत प्रश्न कसे सोडवायचे हेही समजते. मॉक टेस्ट डाऊनलोड करून ऑफलाइन सराव करता येतो, म्हणजे इंटरनेटची अडचण असली तरी अभ्यास थांबत नाही. याची माहिती NTA ची अधिकृत वेबसाइट nta.ac.in वर मिळू शकते.

दुसरा पर्याय आहे SATHEE. याचे पूर्ण नाव Self Assessment, Test and Help for Entrance Exams असे आहे. हा शिक्षण मंत्रालय आणि IIT कानपूर यांचा उपक्रम आहे. स्पर्धा परीक्षांची तयारी करणाऱ्या विद्यार्थ्यांना मोफत अभ्यासाची सोय देणे, हा त्याचा उद्देश आहे.

इथे विद्यार्थ्यांना व्हिडिओ लेक्चर, मॉक टेस्ट आणि अभ्यासातील शंका सोडवण्यासाठी ऑनलाइन सेशनसारख्या सुविधा मिळतात. जेईई मेनसोबत जेईई ॲडव्हान्स्डची तयारी करणारे विद्यार्थीही याचा वापर करू शकतात. घरबसल्या आपल्या कमकुवत बाजू ओळखता येतात आणि ज्या विषयात अडचण येते त्यावर पुन्हा काम करता येते. जेईई मेनच्या तयारीसाठी क्रॅश कोर्सही इथे उपलब्ध करून दिले जातात. नवे कोर्स आणि सत्रांची माहिती sathee.iitk.ac.in या अधिकृत वेबसाइटवर मिळेल.

तिसरा पर्याय IIT-PAL. जेईई मेनमध्ये चांगले गुण मिळवण्यासाठी फिजिक्स, केमिस्ट्री आणि मॅथ्सच्या संकल्पना पक्क्या असाव्या लागतात. एखादा विषय समजत नसेल, तर IIT-PAL ची व्हिडिओ लेक्चर्स मदत करू शकतात.

IIT-PAL म्हणजे IIT Professor Assisted Learning. यात आयआयटीचे प्राध्यापक आणि विषय तज्ज्ञ यांची लेक्चर्स विद्यार्थ्यांना उपलब्ध करून दिली जातात. अकरावी आणि बारावीच्या विद्यार्थ्यांना महत्त्वाच्या संकल्पना समजून घेण्यात आणि स्पर्धा परीक्षांच्या तयारीत मदत करणे, हा याचा उद्देश आहे. फिजिक्स, केमिस्ट्री आणि मॅथ्स या विषयांची लेक्चर्स टॉपिकनुसार पाहता येतात आणि कोणताही टॉपिक सोयीनुसार पुन्हा पाहता येतो. ही लेक्चर्स स्वयं प्रभा चॅनेलवरही प्रसारित होतात. उपलब्ध कंटेंट iitpal.iitd.ac.in या अधिकृत वेबसाइटवर पाहता येईल.

आजकाल अभ्यासासाठी आर्टिफिशियल इंटेलिजन्स (AI) टूल्सचाही वापर करता येतो. त्यांच्या मदतीने विद्यार्थी स्वतःसाठी स्टडी प्लॅन बनवू शकतात, अवघड विषय सोप्या भाषेत समजून घेऊ शकतात आणि एखादी संकल्पना लक्षात ठेवण्याचे सोपे मार्ग शोधू शकतात. फिजिक्सचा एखादा प्रश्न कळला नसेल, तर AI टूलला त्याचे उत्तर स्टेप-बाय-स्टेप समजावून सांगायला सांगता येते. मॅथ्सच्या एखाद्या टॉपिकवर जादा प्रश्न तयार करून घेऊन सरावही करता येतो. मात्र AI ने दिलेली उत्तरे डोळे मिटून बरोबर मानू नयेत. विशेषतः मॅथ्स आणि सायन्सच्या प्रश्नांची उत्तरे पुस्तके किंवा भरवशाच्या स्टडी मटेरियलशी ताडून पाहणे जास्त चांगले.

फक्त व्हिडिओ पाहून किंवा मॉक टेस्ट देऊन तयारी पूर्ण होत नाही, हे लक्षात ठेवायला हवे. प्रत्येक टेस्टनंतर आपल्या चुका समजून घ्याव्या लागतात आणि कमकुवत विषयांवर पुन्हा काम करावे लागते. नियमित अभ्यास, योग्य रणनीती आणि सतत सराव असेल, तर या मोफत ऑनलाइन स्रोतांचा चांगला फायदा घेता येतो.