मुंबईतील पंचतारांकित हॉटेलच्या जेवणात झुरळ; नामांकित हृदयरोगतज्ज्ञ डॉक्टरांना धक्का

मुंबईतील सहार भागातल्या जेडब्ल्यू मॅरियट हॉटेलमधल्या रोमानो या रेस्टॉरंटमध्ये जेवायला गेलेल्या एका नामांकित डॉक्टरांना जेवणादरम्यान चांगलाच धक्का बसला. फोर्टिस एस्कॉर्ट्स हार्ट इन्स्टिट्यूटचे अध्यक्ष आणि हृदयरोगतज्ज्ञ डॉ. अशोक सेठ शनिवारी रात्री या रेस्टॉरंटमध्ये जेवत असताना त्यांच्या टेबलवर एक लहान झुरळ फिरताना दिसले. एका पंचतारांकित हॉटेलमध्ये अशा प्रकारे झुरळ दिसणे हे तिथल्या स्वच्छतेवर प्रश्नचिन्ह उभे करणारे ठरले.

डॉ. सेठ यांनी या झुरळाला मिश्किलपणे 'रोची' असे नाव दिले. आपण खूप समजावूनही हे झुरळ टेबलवरून हलायला तयार नव्हते, कदाचित त्याला पास्ता नको तर पिझ्झा हवा असावा, अशी टिप्पणी त्यांनी केली. मात्र या प्रकारामुळे आपली भूकच उडाल्याचे सांगत डॉ. सेठ यांनी जेवण अर्धवट सोडून रेस्टॉरंट सोडले आणि तिथून निघून गेले.

डॉ. सेठ यांनी हा संपूर्ण प्रकार आपल्या मोबाईलमध्ये चित्रित केला आणि त्याचा व्हिडिओ सोशल मीडियावर पोस्ट केला. या व्हिडिओच्या माध्यमातून त्यांनी हॉटेलमधील असुरक्षिततेवर स्पष्ट आक्षेप नोंदवला. आपल्या पोस्टमध्ये त्यांनी लिहिले की, शनिवारी रात्री जेडब्ल्यू मॅरियट, सहार येथील रोमानो रेस्टॉरंटमध्ये जेवत असताना 'रोची' नावाचे एक बाळ झुरळ त्यांच्या टेबलवर आले आणि जेवणात वाटेकरी बनू पाहत होते. खूप विनवण्या करूनही 'रोची' तिथून जायला तयार नव्हते, असेही त्यांनी नमूद केले.

याच पोस्टच्या माध्यमातून डॉ. सेठ यांनी महाराष्ट्र अन्न व औषध प्रशासनाचे (एफडीए) अधिकारी तुकाराम मुंढे यांना या प्रकरणी कारवाई करण्याची विनंती केली आहे. तसेच त्यांनी महाराष्ट्र अन्न व औषध प्रशासन, एफएसएसएआय आणि हॉटेलच्या प्रशासनाला या पोस्टमध्ये टॅग करत या प्रकरणी कडक कारवाई करण्यात यावी अशी स्पष्ट मागणी केली आहे.

या घटनेच्या सखोल चौकशीबाबत विचारले असता जेडब्ल्यू मॅरियट हॉटेलच्या ग्राहक सेवा विभागाने या घटनेची दखल घेतली जाईल, असे उत्तर दिले. मात्र हॉटेलच्या स्वयंपाकघराकडून याबाबत अद्याप कोणतेही अधिकृत निवेदन आलेले नाही, त्यामुळे स्वयंपाकघरातील स्वच्छतेबाबत प्रश्नचिन्ह कायम राहिले आहे.

पंचतारांकित हॉटेलमध्ये घडलेला हा प्रकार अत्यंत निंदनीय असल्याचे बोलले जात आहे. अशा प्रकारच्या अस्वच्छतेमुळे नागरिकांच्या आरोग्याच्या सुरक्षिततेबाबत पुन्हा एकदा प्रश्न उपस्थित होत आहेत. महाराष्ट्र अन्न व औषध प्रशासन नामांकित हॉटेलांवर कारवाई करून त्यांचे परवाने रद्द करत असल्याच्या पार्श्वभूमीवर, जेडब्ल्यू मॅरियट सहार येथील रोमानो रेस्टॉरंटवरही अशी कारवाई होणार का, असा प्रश्न आता उपस्थित होत आहे.