५०० कोटींबाबत भाजप नेत्यांना काय सांगितले? जरांगे पाटील यांचा एकनाथ शिंदे यांना सवाल

मराठा आंदोलनाचे नेते मनोज जरांगे पाटील यांनी दसरा मेळाव्यात बोलताना एकनाथ शिंदे यांना थेट प्रश्न विचारला आहे. "एकनाथ शिंदेसाहेब, तुम्ही भाजपकडून ५०० कोटी रुपये आणून ते श्रीकांत शिंदे यांच्याकडून मला दिले, असे भाजप नेत्यांना का सांगितले? याचे उत्तर तुम्ही आज किंवा उद्या संध्याकाळपर्यंत द्या," असे आव्हान त्यांनी दिले. या मेळाव्यात त्यांनी अनेक विषयांवर भाष्य केले.

जरांगे पाटील यांच्या म्हणण्यानुसार, दिल्लीतल्या भाजप लोकांना शिंदे यांनी आपल्याबद्दल खोटे सांगितले. श्रीकांत शिंदे यांच्या माध्यमातून मनोज जरांगे पाटील यांच्यापर्यंत ५०० कोटी रुपये पोहोचवले, असे तुम्ही भाजपच्या नेत्यांना सांगितले का, याचे उत्तर एकनाथ शिंदे यांनी तातडीने दिले पाहिजे, असे ते म्हणाले. दिल्लीत भाजपचे नेते याबद्दल कुजबूज करू लागले आहेत, असेही त्यांनी सांगितले.

तुम्ही मला ५०० कोटी रुपये दिले का, असा प्रश्न त्यांनी विचारला. पैसे दिले नसतील, तर भाजप मला संपवते का आणि भाजप तुम्हालाही संपवतंय का, याचे उत्तर आज संध्याकाळच्या दसरा मेळाव्यातून द्या, असे ते म्हणाले. आज दिले नाही, तर उद्या सकाळी तरी द्या, असे सांगत "शिंदेसाहेब, मला याचे उत्तर हवे आहे," असे त्यांनी म्हटले.

आता मी याच्या खोलात जाऊन छडा लावणार आहे, असे जरांगे पाटील यांनी सांगितले. उद्या सकाळी मी बोललो की मराठ्यांनी १०० रुपये टाका, तर माझ्याकडे २५०० कोटी जमा होतील, हा लहान विषय नाही, असेही ते म्हणाले. पुढच्या तीन महिन्यांनंतर तुमचा आणि माझा पुन्हा सामना होणार आहे, असा इशारा त्यांनी शिंदे यांना दिला.

भाषणात त्यांनी शेतकऱ्यांचाही मुद्दा मांडला. शेतकऱ्यांची ही लढाई आपल्या सगळ्यांना एकत्र मिळून लढायची आहे, असे ते म्हणाले. परिस्थिती भयानक आहे आणि आणखी दोन महिन्यांनी ती अजून भयानक होणार आहे, असे त्यांनी सांगितले. कोणी पाणी मागितले तर त्याला पाणी द्या, एकमेकांची मजा बघत बसू नका, असे आवाहन करून त्यांनी शेतकरी संघटना आणि कृषी तज्ज्ञांना एकत्र बोलावणार असल्याचे सांगितले. शेतकऱ्यांच्या प्रश्नांवर तोडगा काढण्यासाठी हे करणार आहे, असे ते म्हणाले. शेतकऱ्यांना हेक्टरी एक लाख रुपये मदत मिळावी, अशी मागणीही त्यांनी केली.

सरकारने शेतकऱ्यांना पाच हजार रुपयांची मदत जाहीर केली आहे. मात्र ही मदत मिळवण्यासाठी शेतकऱ्यांना सरकारी कार्यालयांचे हेलपाटे घालावे लागणार आहेत, असे जरांगे पाटील यांनी म्हटले. त्यासाठी आठ दिवस हेलपाटे घालावे लागतील, पेट्रोलला दोन हजार रुपये खर्च येईल आणि जेवणावर आणखी दोन ते अडीच हजार रुपये जातील, मग हातात राहिले किती, असा हिशोब त्यांनी मांडला आणि एकनाथ शिंदे यांना लक्ष्य केले.

सरकारच्या आर्थिक धोरणांवरही त्यांनी टीका केली. "जीएसटी आपण भरला आणि बंगले यांचे मोठे झाले. आज राज्यावर संकट आले आहे. मर्द असाल, तर शेतकऱ्यांच्या पाठीशी उभे राहाल. आपल्यावर वाईट संकट आले आहे," असे ते म्हणाले. राज्यातील शेतकऱ्यांची परिस्थिती गंभीर असल्याचे सांगत त्यांनी सरकारकडे पाच प्रमुख मागण्या केल्या.