जंतर मंतरवर नेहा बोरा यांना पोलिसांनी ताब्यात घेतले; ज्ञानेश कुमारांविरोधात आंदोलनाची हाक

दिल्लीतील जंतर मंतरवर मुख्य निवडणूक आयुक्तांविरोधात आंदोलनाची हाक देणाऱ्या ऑल इंडिया स्टूडेंट्स एसोसिएशनच्या राष्ट्रीय अध्यक्षा नेहा बोरा यांना ताब्यात घेतल्याची माहिती समोर आली आहे. शुक्रवारी, २ ऑक्टोबरला हा प्रकार घडला.

मुख्य निवडणूक आयुक्त ज्ञानेश कुमार यांच्याविरोधात काँग्रेससह देशभरातील विरोधी पक्षांनी मोहीम सुरू केली आहे. विरोधी पक्ष शुक्रवारी जंतर मंतर येथे आंदोलन करण्याची तयारी करत आहेत. त्यामुळे देशातलं राजकारण तापण्याची शक्यता निर्माण झाली आहे.

दिल्ली पोलिसांनी ताब्यात घेतल्यानंतर नेहा बोरा यांनी संतापून प्रतिक्रिया दिली. त्या म्हणाल्या, "तुम्ही देशासोबत जे केले आहे, त्यासाठी देश तुम्हाला कधीही माफ करणार नाही. आज तुम्ही आम्हाला बसमध्ये भरून लोकशाहीचा आवाज दाबण्याचा प्रयत्न करत आहात. पण एक दिवस तुम्हाला दोनशे, दोन हजार, दोन लाख, २० लाख लोकांना भरण्याची वेळ येईल. त्यानंतरही तुम्हाला ज्ञानेश कुमार आणि इतर निवडणूक आयुक्तांना वाचवण्याचा प्रयत्न करावा लागेल. पण तुम्ही जी गद्दारी केली आहे, चोरी केली आहे, ज्ञानेश कुमार यांनी देशाच्या जनतेसोबत जे केलं आहे, त्याला माफी मिळणार नाही आणि ते विसरले जाणार नाही." असा इशारा नेहा बोरा यांनी दिला आहे.

दरम्यान, कॉकरोच जनता पार्टी (सीजेपी) मुंबईत आंदोलनाची तयारी करत आहे. सीजेपीचे संस्थापक अभिजीत दीपके यांनी ज्ञानेश कुमार यांच्या राजीनाम्याची मागणी केली आहे. राजीनामा न दिल्यास आंदोलन जाहीर करण्यात येईल, असेही त्यांनी म्हटले आहे. काँग्रेस नेते राहुल गांधी भारतीय जनता पार्टीवर (भाजप) सातत्याने टीका करत आहेत.

सीजेपीच्या आंदोलनाबद्दल अभिजीत दीपके म्हणाले होते, "कॉकरोच जनता पक्षाचे आंदोलन सुरू होत आहे. आम्ही देशभरात आंदोलन करणार आहोत. यानंतर आम्ही जंतर मंतरवर बसू आणि ज्ञानेश कुमार राजीनामा देईपर्यंत हे आंदोलन सुरू राहील. ज्ञानेश कुमार हे देशद्रोही आहेत. २०२५ ची एसआयआर यादी तातडीने रद्द करावी. नियुक्त होणारा नवा कोणताही निवडणूक अधिकारी पारदर्शक असावा. नाहीतर ज्या १३ कोटी मतदारांची नावे वगळण्यात आली आहेत, ते सर्व रस्त्यावर उतरतील." असा इशाराही सीजेपीकडून देण्यात आला आहे.

सीजेपीचे नेते सौरव दास यांनीही तरुणांसह देशभरातील नागरिकांना शिवाजी पार्कवर येण्याचे आवाहन केले आहे. ते म्हणाले, "आपल्यासोबत तरुण आहेत. सर्वांनी दुपारी ४ वाजता शिवाजी पार्कमध्ये यावे. आपण शांततापूर्ण आंदोलन करणार आहोत. देशभरात आंदोलने आधीच सुरू झाली आहेत."

दुसरीकडे, जंतर मंतर येथे पोलीस आणि निमलष्करी दलांनी सुरक्षा वाढवली आहे. अनेक राजकीय पक्षांनी केलेल्या आंदोलनांच्या पार्श्वभूमीवर हे पाऊल उचलण्यात आले आहे. दिल्ली पोलिसांनी नवी दिल्ली परिसरात फौजदारी प्रक्रिया संहितेचे (CrPC) कलम १६३ लागू केले आहे. संपूर्ण परिसरात कोणत्याही प्रकारच्या निदर्शनांना परवानगी नाही, असे दिल्ली पोलिसांनी म्हटले आहे. सध्या कोणालाही जंतर मंतरच्या आत प्रवेश करण्यास सक्त मनाई करण्यात आली आहे.