इन्स्टाग्राम रीलमधलं गाणं फोनची रिंगटोन कशी करायची, आयफोन आणि अँड्रॉईडसाठी सोप्या स्टेप्स

इन्स्टाग्रामवर रील्स स्क्रोल करताना एखादं गाणं किंवा म्युझिक इतकं आवडतं की ते पुन्हा पुन्हा ऐकावंसं वाटतं. काही लोक तर तेच गाणं आपल्या फोनची रिंगटोन म्हणून ठेवतात. पण रीलचा ऑडिओ रिंगटोन म्हणून कसा सेट करायचा, हे अनेकांना माहीत नसतं.

खरं तर अँड्रॉईड आणि आयफोन, दोन्ही यूजर्ससाठी ही प्रोसेस अतिशय सोपी आहे. आयओएस 26 मुळे ती आणखी सोपी झाली आहे. तुमच्याकडे आयओएस 26 असलेला आयफोन असेल, तर 30 सेकंद किंवा त्यापेक्षा कमी लांबीची एमपी3 किंवा एम4ए ऑडिओ फाईल तुम्ही थेट रिंगटोन म्हणून सेट करू शकता.

आधी आयफोनची पद्धत बघू. ज्या रीलचा ऑडिओ रिंगटोन करायचा आहे, ती रील पहिल्यांदा आयफोनमध्ये डाऊनलोड करा. मग व्हिडीओ ट्रिम करून रिंगटोन म्हणून हवा असलेला भागच ठेवा. आयफोनवर थेट रिंगटोन लावण्यासाठी ऑडिओ फाईल 30 सेकंद किंवा त्याहून कमी असणं गरजेचं आहे.

ही प्रोसेस करण्यासाठी तुमच्याकडे आयओएस 26 असायलाच हवं, हे लक्षात ठेवा. ॲपलने आयओएस 26 मध्ये फाईल्स ॲपमधून छोटी ऑडिओ फाईल थेट रिंगटोन बनवण्याचा पर्याय दिला आहे. व्हिडीओ थेट रिंगटोन म्हणून लावता येत नाही, म्हणून आधी व्हिडीओ फाईल्समध्ये सेव्ह करा आणि त्यातून ऑडिओ फाईल तयार करा.

त्यानंतर तो ऑडिओ MP3 किंवा M4A फॉर्मेटमध्ये सेव्ह करा आणि फाईलची लांबी 30 सेकंद किंवा त्यापेक्षा कमी ठेवा. आता आयफोनमध्ये फाईल्स ॲप उघडा आणि ऑडिओ फाईल जिथे सेव्ह केली आहे, त्या फोल्डरमध्ये जा. ऑडिओ फाईलवर लाँग प्रेस करा आणि शेअर पर्याय निवडा.

शेअर मेन्यूमध्ये तुम्हाला यूज ॲज रिंगटोन हा पर्याय दिसेल. त्यावर टॅप केलं की तुम्ही सेव्ह केलेला ऑडिओ आयफोनची रिंगटोन म्हणून सेट होईल. शेअर मेन्यूमध्ये हा पर्याय दिसला नाही, तर त्यातल्या मोअर पर्यायावर टॅप करा. मग सेटिंगमधल्या साउंड अँड हॅपटिक्समध्ये जाऊन रिंगटोनवर क्लिक करा. तिथे तुम्ही रिंगटोन बघू आणि निवडू शकता.

आता अँड्रॉईडची पद्धत. सर्वात आधी अँड्रॉईड स्मार्टफोनवर इन्स्टाग्रामची रील उघडा आणि तिची लिंक कॉपी करा. इंटरनेटवर इन्स्टाग्राम व्हिडीओला ऑडिओमध्ये बदलणारं टूल शोधा, त्यात रीलची लिंक पेस्ट करा आणि ऑडिओ वर्जन डाऊनलोड करा.

ऑडिओ डाऊनलोड झाल्यावर फोनच्या फाईल्स ॲपमध्ये जाऊन डाऊनलोड फोल्डर उघडा. डाऊनलोड केलेली ऑडिओ फाईल कॉपी करा आणि फोनच्या रिंगटोन फोल्डरमध्ये पेस्ट करा. मग फोनच्या सेटिंग्जमध्ये जाऊन रिंगटोन बदलण्याचा पर्याय निवडा. तिथे तुम्ही सेव्ह केलेल्या ऑडिओ फाईल्स दिसतील. ती फाईल निवडताच इन्स्टाग्राम रीलचा ऑडिओ तुमच्या स्मार्टफोनची रिंगटोन म्हणून सेट होईल.