राहुल गांधींसमोर मोदींची मिमिक्री, सुनील लाहरी संतापले

काँग्रेसचे नेते आणि लोकसभेतील विरोधी पक्षनेते राहुल गांधी यांच्या उपस्थितीत इंदूरमध्ये झालेल्या 'छात्रों की गूंज' या कार्यक्रमातील एक सादरीकरण सध्या मोठ्या चर्चेत आले आहे. या कार्यक्रमात स्टँड-अप कॉमेडियन पुलकित मणी यांनी पंतप्रधान नरेंद्र मोदी यांच्या बोलण्याच्या शैलीची आणि काही सार्वजनिक प्रसंगांची नक्कल सादर केली. ही मिमिक्री सुरू असताना राहुल गांधी मंचावरच उपस्थित होते आणि व्हिडीओमध्ये ते हसताना दिसतात. हा व्हिडीओ समोर आल्यानंतर राजकीय वर्तुळात आरोप-प्रत्यारोपांना सुरुवात झाली आहे.

हा कार्यक्रम १९ सप्टेंबर रोजी इंदूरमध्ये पार पडला. विद्यार्थ्यांशी संवाद साधताना राहुल गांधी यांनी त्यावेळी केंद्र सरकारच्या धोरणांवर तसेच पंतप्रधान नरेंद्र मोदी यांच्या परराष्ट्र धोरणावर टीका केली होती. त्याच कार्यक्रमादरम्यान कॉमेडियन पुलकित मणी यांनी मोदींच्या बोलण्याच्या पद्धतीची मिमिक्री केली. या सादरीकरणात मोदींच्या इंग्रजी बोलण्याच्या शैलीचा उल्लेख करण्यात आला, तसेच परदेशी नेत्यांशी संवाद साधताना त्यांच्या 'हग डिप्लोमसी' म्हणून चर्चेत आलेल्या पद्धतीचाही संदर्भ देण्यात आला. एका जुन्या प्रसंगात पंतप्रधानांनी एका वृद्ध महिलेला खुर्ची देऊ केल्याच्या घटनेवरही विनोद करण्यात आल्याचे वृत्त आहे.

राहुल गांधी या मिमिक्रीदरम्यान मंचावर उपस्थित असल्याने आणि हसताना दिसल्याने वाद अधिकच वाढला. कार्यक्रमातील हे व्हिडीओ सोशल मीडियावर मोठ्या प्रमाणावर शेअर झाले, त्यानंतर भाजपच्या नेत्यांनी राहुल गांधी आणि काँग्रेसवर टीका केली. दुसरीकडे काँग्रेसने या सादरीकरणाची बाजू घेत हा विनोद आणि मिमिक्रीचाच एक भाग असल्याचे स्पष्टीकरण दिले आहे. त्यामुळे या एका सादरीकरणावरून राजकीय पातळीवर मोठा वाद निर्माण झाला आहे.

'रामायण' मालिकेत लक्ष्मणाची भूमिका साकारणारे अभिनेते सुनील लाहरी यांनी या संपूर्ण प्रकरणावर आपली प्रतिक्रिया दिली आहे. त्यांनी हा व्हिडीओ शेअर करत, राहुल गांधींच्या उपस्थितीत पंतप्रधान मोदींची मिमिक्री करण्यात आल्याबद्दल तीव्र नाराजी व्यक्त केली. आपल्या ट्विटमध्ये सुनील लाहरी यांनी म्हटले आहे की, "देशाची संस्कृती, मातृभाषा आणि गळाभेटीच्या प्रथेची जो नेता खिल्ली उडवतो, अशा नेत्याकडे देशाची जबाबदारी भविष्यात सोपवणे योग्य ठरेल का?"

सुनील लाहरी यांनी पंतप्रधानांनी मातृभाषेत भाषण करण्यावरून होणारी टीका, तसेच भारतीय संस्कृती आणि परंपरांबाबत केल्या जाणाऱ्या विनोदांवरही प्रश्न उपस्थित केले. इंग्रजी ही केवळ एक भाषा आहे आणि अनेक देशांचे नेते आपापल्या मातृभाषेतच भाषण करतात, असे मत त्यांनी मांडले. एखाद्या वृद्ध महिलेला खुर्ची देण्यासारख्या प्रसंगाचीही खिल्ली उडवली जाणे योग्य आहे का, असा सवालही त्यांनी उपस्थित केला. कोणत्याही नेत्याच्या पदाचा आणि देशाच्या सांस्कृतिक मूल्यांचा मान राखला गेला पाहिजे, असे त्यांचे म्हणणे आहे. या संपूर्ण घटनेकडे गांभीर्याने पाहण्याचे आवाहनही त्यांनी केले.

या प्रकरणावरून सध्या राजकीय नेते, कलाकार आणि सोशल मीडिया युजर्समध्ये वेगवेगळ्या प्रतिक्रिया उमटत आहेत. राजकीय व्यंग आणि सार्वजनिक पदावरील व्यक्तींचा सन्मान या मुद्द्यावरून सुरू झालेला हा वाद सध्या चर्चेचा विषय ठरला आहे.