उपचाराच्या १,५०० रुपयांवरून नागपुरात निरामय हॉस्पिटलमध्ये धुडगूस, पाच जणांना अटक

नागपूर : उपचाराच्या अवघ्या १,५०० रुपयांवरून झालेल्या वादाचे पर्यवसान इमामवाडा परिसरातील निरामय हॉस्पिटलमध्ये मारहाण आणि तोडफोडीत झाले. आरोपींनी कायदा हातात घेत हॉस्पिटलमध्ये धुडगूस घातला, असे समोर आले आहे. हॉस्पिटलच्या सुपरवायझरला शिवीगाळ आणि मारहाण करण्यात आली, तसेच एका डॉक्टरलाही लक्ष्य करण्यात आले. या घटनेनंतर आरोग्यसेवेतील कर्मचाऱ्यांच्या सुरक्षेबद्दल गंभीर प्रश्न उभे राहिले आहेत. इमामवाडा पोलीसांनी या प्रकरणात पाच आरोपींना अटक केली आहे.

२० ऑक्टोबरच्या रात्री रस्ते अपघातात जखमी झालेले संदीप ठोकर यांना उपचारासाठी निरामय हॉस्पिटलमध्ये आणण्यात आले होते. एक्सरे तपासणीनंतर डॉक्टरांनी त्यांच्या पायाला फ्रॅक्चर असल्याचे सांगितले. पायाला बेंडेज बांधून त्यांना हॉस्पिटलमध्ये दाखल करण्याचा सल्ला डॉक्टरांनी दिला. मात्र ठोकर यांच्यासोबत आलेल्या लोकांनी त्यांना दुसऱ्या हॉस्पिटलमध्ये नेणार असल्याचे सांगितले.

त्यावेळी हॉस्पिटलचे सुपरवायझर सुभाष गायधने यांनी ठोकर यांच्यासोबतच्या लोकांना झालेल्या उपचारांचे १,५०० रुपये देण्यास सांगितले. यावरून गायधने आणि त्या लोकांमध्ये वाद झाला. वादादरम्यान ते लोक गायधने यांना धमकी देऊन हॉस्पिटलमधून निघून गेले.

काही वेळाने सागर निकम आणि आदित्य तिवारी हे दोघे कथित रीत्या आपल्या पाच ते सहा साथीदारांना घेऊन हॉस्पिटलमध्ये परतले. त्यानंतर वाद चिघळला आणि हिंसक झाला. आरोपींनी गायधने यांना शिवीगाळ करत मारहाण सुरू केली. हॉकी स्टिक आणि लाथाबुक्क्यांनी केलेल्या हल्ल्यात सुपरवायझर जखमी झाले. मध्यस्थीसाठी आलेल्या एका डॉक्टरलाही मारहाण करण्यात आली. हॉस्पिटलमधील वस्तूंची तोडफोड करून नुकसान करण्यात आले.

पंधरवड्याच्या आत हॉस्पिटलमध्ये तोडफोड करून डॉक्टरला मारहाण झाल्याची ही दुसरी घटना आहे. याआधी धंतोलीत एका मुलीच्या मृत्यूमुळे संतापलेल्या नातेवाईकांनी डॉ. गांधी यांना मारहाण करून तोडफोड केली होती.

इमामवाडा पोलीसांची कारवाई : पाच जणांना अटक

घटनेनंतर हॉस्पिटल व्यवस्थापनाने तक्रार दिली. त्यानुसार इमामवाडा पोलीस स्टेशनमध्ये गुन्हा दाखल करण्यात आला आहे. पोलीसांनी कारवाई करत पाच आरोपींना अटक केली आहे. प्रकरणाचा पुढील तपास सुरू आहे.

हॉस्पिटलमधील उपचारांच्या खर्चावरून सुरू झालेला वाद मारहाण आणि तोडफोडीपर्यंत पोहोचल्यामुळे आरोग्य संस्थांमधील डॉक्टर आणि कर्मचाऱ्यांच्या सुरक्षेचा मुद्दा पुन्हा चर्चेत आला आहे. आता पोलीसांच्या तपासातून या घटनेशी संबंधित इतर बाबी उघड होतील, अशी अपेक्षा आहे.