बुटीबोरीतील कंपनीला ईमेल हॅक करून 34.50 लाखांचा गंडा; सीताबर्डी पोलिसांत गुन्हा

बुटीबोरी औद्योगिक क्षेत्रातील इरोज इंफ्रास्ट्रक्चर प्रा.लि. या कंपनीला सायबर ठगांनी गंडा घातला आहे. कंपनीचा नेहमीचा मशिनरी पुरवठादार असलेल्या वेंडरचा अधिकृत ईमेल हॅक करून त्यावरून बनावट बँक तपशील पाठवण्यात आले आणि कंपनीकडून 34.50 लाख रुपयांची आगाऊ रक्कम ठगांनी सांगितलेल्या खात्यात भरून घेतली. फसवणूक उघड झाल्यावर कंपनी व्यवस्थापनात खळबळ उडाली. सीताबर्डी पोलिसांनी तक्रारीवरून बीएनएस आणि आयटी ॲक्टच्या संबंधित कलमांखाली गुन्हा नोंदवून तपास सुरू केला आहे.

पोलिसांनी दिलेल्या माहितीनुसार, इरोज इंफ्रास्ट्रक्चरचे एचआर मॅनेजर अभय सीताराम पांडे (34) यांनी तक्रार दिली आहे. कंपनी कामकाजासाठी सुमारे 1.15 कोटी रुपयांची रोल-फॉर्मिंग मशीन खरेदी करण्याच्या तयारीत होती. त्यासाठी कंपनीने राजकोट येथील आपला नेहमीचा वेंडर डिव्हाईन मशीन्स प्रा.लि. याच्याशी त्याच्या अधिकृत ईमेलवरून संपर्क साधला होता.

वेंडरकडून मशीनच्या किमतीच्या 30 टक्के रक्कम आगाऊ भरण्यास सांगण्यात आले. सोबत बँक ऑफ बडोदाच्या खात्याचा तपशील आणि प्रोफॉर्मा इनव्हॉइसही पाठवले गेले. पैशांबाबतची माहिती ईमेलवरून सतत मिळत होती, त्यामुळे कंपनीला कसलीही शंका आली नाही.

30 सप्टेंबर रोजी कंपनीला पुन्हा ईमेल आला आणि आगाऊ रक्कम कॅनरा बँकेच्या एका खात्यात भरण्यास सांगितले गेले. हा ईमेल वेंडरच्या अधिकृत ईमेल आयडीवरून आला होता, म्हणून कंपनीने तो खरा मानला. त्यानंतर 3 ऑक्टोबर रोजी कंपनीने 34.50 लाख रुपये सांगितलेल्या खात्यात पाठवले.

रक्कम पाठवल्यानंतर 5 ऑक्टोबर रोजी कंपनीने वेंडरच्या डायरेक्टरशी संपर्क साधला, तेव्हा शंका आली. आपल्याकडे कंपनीकडून कोणतीही रक्कम आलेली नाही, असे डायरेक्टरांनी स्पष्ट सांगितले. शिवाय आपल्या कंपनीचे कॅनरा बँकेत खातेच नाही, असेही त्यांनी सांगितले.

डायरेक्टरांशी बोलल्यानंतर कंपनीला सगळा प्रकार समजला. आपल्या कंपनीचा अधिकृत ईमेल हॅक झाला होता आणि सायबर गुन्हेगारांनी त्याच ईमेलवरून संपर्क साधून बँक खात्याची खोटी माहिती पाठवली, असे डायरेक्टरांनी सांगितले.

त्यानंतर इरोज इंफ्रास्ट्रक्चरच्या व्यवस्थापनाने पोलिसांकडे तक्रार केली. सीताबर्डी पोलिसांनी तक्रारीवरून अज्ञात आरोपींविरुद्ध गुन्हा नोंदवला आहे. ज्या बँक खात्यात 34.50 लाख रुपये गेले, त्याची माहिती पोलीस आता गोळा करत आहेत. तसेच ईमेल हॅक करणारे आरोपी आणि रकमेच्या व्यवहारात सहभागी असलेल्या इतर लोकांचाही शोध घेतला जात आहे.

या घटनेमुळे व्यावसायिक कंपन्यांना ईमेलमार्फत होणाऱ्या सायबर फसवणुकीचा धोका पुन्हा समोर आला आहे. गुन्हेगार आधी एखाद्या कंपनीचा किंवा तिच्या नेहमीच्या पुरवठादाराचा ईमेल हॅक करतात आणि दोन्ही बाजूंमध्ये होणाऱ्या खऱ्या व्यावसायिक संवादाचा फायदा घेऊन बँक खात्याची माहिती बदलतात. ईमेल खरा असल्याने कंपनीला शंका येत नाही आणि लाखो रुपये थेट ठगांच्या खात्यात पोहोचतात.

मोठ्या रकमेचे पेमेंट करण्यापूर्वी बँक खात्याच्या माहितीची फोनवर किंवा प्रत्यक्ष भेटून खात्री नक्की करावी, असे आवाहन पोलिसांनी कंपन्यांना केले आहे.