गावाकडच्या मुलांनाही एआय, रोबोटिक्सचे शिक्षण मिळावे, गोरेगावच्या एक्स्पोत आदिती तटकरेंची भूमिका

शिक्षणात कृत्रिम बुद्धिमत्ता (एआय), रोबोटिक्स आणि आधुनिक तंत्रज्ञानाचा वापर वाढत चालला आहे. नवीन राष्ट्रीय शैक्षणिक धोरणानुसार हे शिक्षण फक्त शहरातल्या मुलांपुरते न ठेवता ग्रामीण आणि दुर्गम भागातल्या विद्यार्थ्यांपर्यंतही पोहोचवण्यासाठी शासन प्रयत्न करत आहे, असे महिला व बालविकास मंत्री आदिती तटकरे यांनी मुंबईत सांगितले.

गावाकडच्या मुलांना आधुनिक शिक्षणाच्या समान संधी मिळाव्यात, यासाठी जागतिक पातळीवरचे अभ्यासक्रम भारतीय भाषांमध्ये अनुवादित करून सोप्या स्वरूपात उपलब्ध करून देण्याबाबत विचार होणे गरजेचे आहे, असे मत त्यांनी मांडले.

गोरेगाव येथील नेस्को प्रदर्शन केंद्रात एज्युकेशन ग्रोथ नेटवर्कचा दोन दिवसांचा एज्युकेशन कनेक्ट एक्स्पो सुरू झाला. त्याचे उद्घाटन तटकरे यांच्या हस्ते झाले. एज्युकेशन ग्रोथच्या मुख्य कार्यकारी अधिकारी डॉली सिंग यावेळी हजर होत्या. शिक्षण क्षेत्रातल्या नव्या कल्पना, आधुनिक तंत्रज्ञानाचा वापर आणि शैक्षणिक विकासाच्या वेगवेगळ्या बाजूंवर या कार्यक्रमात चर्चा सुरू आहे. या चर्चासत्रातून जे मुद्दे आणि निष्कर्ष पुढे येतील, ते राज्याच्या प्रस्तावित बालधोरणात घेण्याचा प्रयत्न केला जाईल, असे तटकरे म्हणाल्या.

फक्त अभ्यासातली गुणवत्ता वाढवून भागणार नाही, मुलांचे शारीरिक आणि मानसिक आरोग्य जपणेही तितकेच महत्त्वाचे आहे, असे त्यांनी सांगितले. वाढती स्पर्धा, पालकांच्या अपेक्षा आणि शिक्षणावर होणारा खर्च यामुळे मुलांवर मानसिक ताण येतो. हे लक्षात घेऊन त्यांच्या सर्वांगीण विकासावर भर देण्याची गरज आहे. सरकारी शाळांतली मुले खासगी शाळांतल्या मुलांपेक्षा कमी नाहीत, हा आत्मविश्वास त्यांच्यात यावा म्हणून शाळांतील पायाभूत सुविधा भक्कम करण्यावर शासन भर देत आहे, असेही त्यांनी म्हटले.

एज्युकेशन ग्रोथ नेटवर्क, शालेय शिक्षण विभाग आणि महिला व बालविकास विभाग यांनी मिळून काही शाळांमध्ये प्रायोगिक तत्त्वावर आधुनिक शैक्षणिक सुविधा आणि उपक्रम राबवण्याचा विचार शासन करेल, असे तटकरे यांनी सांगितले. पुढच्या पाच वर्षांत मुलांचा सर्वांगीण विकास साधण्यासाठी शिक्षणाच्या पायाभूत सुविधा अधिक सक्षम करणे आणि शासन व शिक्षण क्षेत्रातील वेगवेगळ्या संस्था यांच्यातला समन्वय वाढवणे आवश्यक आहे, असेही त्यांनी नमूद केले.

डिजिटल शिक्षणासाठी शाळांमध्ये डिजिटल बोर्ड बसवणे पुरेसे नाही. शिक्षकांना त्याचा प्रभावी वापर करता यावा म्हणून किमान दोन दिवसांचे, म्हणजे ४८ तासांचे प्रशिक्षण देणे गरजेचे आहे. विद्यार्थ्यांप्रमाणेच शिक्षकांचे मानसिक आरोग्य आणि कल्याणही महत्त्वाचे आहे. विद्यार्थी, शिक्षक आणि शाळा व्यवस्थापन यांच्या अडचणींचा एकत्र विचार करून त्या सोडवल्या जातील, असे तटकरे म्हणाल्या.

प्रदर्शनात ६० ते ७० स्टॉल्स उभारण्यात आले होते. डिजिटल बोर्डद्वारे शिक्षण, कृत्रिम बुद्धिमत्ता, रोबोटिक्स आणि शाश्वत विकासाशी संबंधित उपक्रम तसेच विद्यार्थ्यांसाठीची नवीन शैक्षणिक साधने आणि सुविधा यांची माहिती या स्टॉल्सवर देण्यात आली.