गोंदिया: जादूटोण्याच्या संशयातून मजुराची निर्घृण हत्या, दोन आरोपी अटकेत

गोंदिया जिल्ह्यातील मुंडीपार (एमआयडीसी) भागात 22 सप्टेंबरच्या रात्री रस्त्याच्या कडेला रक्ताच्या थारोळ्यात एक मृतदेह सापडला होता. मृत व्यक्तीची ओळख 58 वर्षीय रविशंकर उदेलाल रहांगडाले अशी झाली. स्थानिक गुन्हे शाखेने (LCB) अवघ्या 24 तासांत या हत्येचा छडा लावला. पोलिसांच्या माहितीनुसार ही घटना साधी लूट किंवा भांडणातून झालेली नव्हती, तर अंधश्रद्धा आणि सूडबुद्धीतून रचलेला भयानक कट होता. या प्रकरणी पोलिसांनी मुख्य सूत्रधार असल्याचा आरोप असलेला कमलेश अशोक नेवारे (19) आणि जितेंद्र कोहळे (45) यांना ताब्यात घेतले असून, या घटनेत सामील असल्याचा संशय असलेल्या दोन विधिसंघर्षग्रस्त बालकांनाही (कायद्याशी संघर्ष करणाऱ्या अल्पवयीन मुलांना) ताब्यात घेण्यात आले आहे.

पोलिसांनी दिलेल्या माहितीनुसार, 22 सप्टेंबरला संध्याकाळी साधारण 7.45 ते 8.15 वाजण्याच्या दरम्यान ही घटना घडली. मुंडीपार येथील रहिवासी रविशंकर रहांगडाले हे आपल्या बाईकवरून वेंकटेश राईस मिलमध्ये नाईट शिफ्टच्या ड्युटीसाठी निघाले होते. आधीच घात लावून बसलेल्या आरोपींनी मार्बल कंपनीजवळून स्प्लेंडर बाईकवरून त्यांचा पाठलाग सुरू केला. चामड्याच्या कारखान्यासमोर आरोपींनी रविशंकर यांना ओव्हरटेक करून अडवले. त्यांना काही समजायच्या आतच मागून हातोड्याने जोरदार वार करून त्यांना बाईकसह जमिनीवर पाडण्यात आले, आणि त्यानंतर डोक्यावर कुऱ्हाडीने सलग वार करून त्यांचा जीव घेतल्याचा आरोप आहे.

मृताचा मुलगा विक्की रहांगडाले यांच्या तक्रारीवरून गंगाझरी पोलीस स्टेशनमध्ये भारतीय न्याय संहिता 2023 च्या कलम 103(1) अंतर्गत गुन्हा दाखल करण्यात आला. पोलीस अधीक्षक गोरख भामरे यांच्या सूचनेनुसार आणि LCB निरीक्षक रेवचंद सिंगनजुडे यांच्या नेतृत्वाखाली गोपनीय सूत्रांचे जाळे सक्रिय झाले, तेव्हा धक्कादायक बाब समोर आली. गावात अशी चर्चा होती की मृत व्यक्ती जादूटोणा करत असे. संशयावरून ताब्यात घेण्यात आलेला आरोपी कमलेश नेवारे याने चौकशीत असे कबूल केल्याचा पोलिसांचा दावा आहे की, त्याच्या कुटुंबातील दोन सदस्यांचा मृत्यू रविशंकर यांच्या जादूटोण्यामुळे झाला होता. एवढेच नाही, तर मनीष टेंभरे आणि जितेंद्र कोहळे यांच्या घरी झालेले मृत्यू, तसेच ऋषभ कोहळे यांची सतत बिघडणारी तब्येत यामागेही रविशंकर यांच्या तंत्रमंत्राचा हात असल्याचे आरोपींना वाटत होते, असे पोलिसांनी सांगितले. याच सूडभावनेतून कमलेश, जितेंद्र आणि दोन अल्पवयीन मुलांनी मिळून हत्येचा कट रचल्याचा आरोप पोलिसांनी केला आहे.

पोलीस अधीक्षक गोरख भामरे, अपर पोलीस अधीक्षक अभय डोंगरे आणि तिरोडा एसडीपीओ गजानन गुल्हाणे यांच्या मार्गदर्शनाखाली LCB पोलीस निरीक्षक प्रेमचंद सिंगनजुडे आणि गंगाझरी पोलिसांच्या संयुक्त पथकाने तांत्रिक पुराव्यांच्या आणि खबऱ्यांच्या मदतीने आरोपींना पकडले. पकडलेल्या दोन्ही सज्ञान आरोपींना पुढील कायदेशीर कारवाईसाठी गंगाझरी पोलीस स्टेशनच्या ताब्यात देण्यात आले आहे. या तपासात एपीआय अमरदीप खडे, सहायक पोलीस निरीक्षक जंगमवार, सफौ राजू मिश्रा, पोलीस हवालदार तुलसीदास लुटे, सोमेंद्रसिंह तुरकर, रियाज शेख, महेश मेहर, दीक्षितकुमार दमाहे, संजय चव्हाण, दुर्गेश तिवारी, भोजराज बहेकार, इंद्रजीत बिसेन, पोलीस शिपाई राकेश इंदुरकर, छगन विठ्ठले, कुणाल बारेवार, निखिल मेश्राम, राम खंदारे, मुरली पांडे, इमरान सय्यद, निलेश ठाकरे, सायबर सेलचे देविदास ठमके, योगेश राहिले, आकिब काझी, श्रेयस लांबट तसेच गंगाझरी ठाणेदार धीरज राजूरकर, पोलीस हवालदार भुरे, उमेश कावळे, महेंद्र कटरे आणि प्रशांत गौतम यांनी महत्त्वाची भूमिका बजावली.