घरात झोपलेल्या मासे विक्रेत्यावर चाकूने हल्ला, वृद्ध आईलाही मारहाण

नागपूर : गिट्टीखदान पोलीस स्टेशन हद्दीतील सुरेंद्रगढ भागातल्या भवानी चौकात मध्यरात्री एका घरात घुसून हल्ला करण्यात आला. घरात झोपलेल्या मासे विक्रेत्याला झोपेतच जिवे मारण्याचा प्रयत्न झाला. हत्यारांनी सज्ज असलेले हल्लेखोर त्यांना अधमरे करून पळून गेले. हल्लेखोरांनी या विक्रेत्याच्या वृद्ध आईलाही जखमी केले. ही घटना नागपूरमधील गिट्टीखदान पोलीस स्टेशनच्या हद्दीत, सुरेंद्रगढ येथील भवानी चौकात घडली.

यशवंत गौर असे या विक्रेत्याचे नाव आहे. ते गिट्टीखदान चौकात मासे विकण्याचे काम करतात. रोजच्याप्रमाणे दुकानातून घरी परतल्यावर जेवण करून ते झोपी गेले होते. रात्री साधारण अडीचच्या सुमारास दारावर थाप मारल्याचा आवाज आला. तो आवाज ऐकून त्यांची 65 वर्षांची आई पार्वती बाई काय झाले ते पाहण्यासाठी बाहेर गेल्या. समोर दोन तरुण दार ठोठावत असल्याचे त्यांना दिसले.

त्या दोघा तरुणांनी जबरदस्तीने घरात प्रवेश केला. खोलीत झोपलेल्या यशवंत यांना त्यांनी केस ओढून बाहेर आणले आणि त्यांना मारहाण करायला सुरुवात केली. बघता बघता वाद हिंसक झाला आणि एका तरुणाने यशवंत यांच्यावर चाकूने वार केला.

आपल्या मुलावर हल्ला होत असल्याचे पाहून पार्वती बाई त्याला वाचवण्यासाठी मध्ये धावल्या. तेव्हा हल्लेखोरांनी त्यांनाही मारहाण केली आणि त्याही जखमी झाल्या. घरात अचानक झालेल्या या हल्ल्याने गौर कुटुंबीयांची एकच धावपळ उडाली.

तेवढ्यात यशवंत यांची पत्नी जाग्या झाल्या. त्यांनी काठी दाखवून हल्लेखोरांना घराबाहेर निघून जायला सांगितले. ते पाहून दोघे हल्लेखोर पळून गेले. त्यानंतर कुटुंबीयांनी शेजाऱ्यांच्या मदतीने जखमी झालेल्या मायलेकांना रुग्णालयात नेले. तिथे यशवंत यांच्यावर उपचार सुरू आहेत.

मध्यरात्री घरात घुसून झालेल्या या हल्ल्यामुळे परिसरात भीतीचे वातावरण आहे. घटनेची माहिती मिळताच गिट्टीखदान पोलिसांनी तपास सुरू केला. परिसरातील सीसीटीव्ही कॅमेऱ्यांच्या फुटेजमध्ये दोन संशयित तरुण दुचाकीवरून येताना आणि जाताना दिसत आहेत. पोलिसांनी त्यांची ओळख अमोल पलसपगार आणि रवि पांडे अशी सांगितली आहे. पोलीस सीसीटीव्ही फुटेजच्या आधारे या संशयितांचा शोध घेत आहेत. ते हाती लागल्यानंतरच हल्ल्यामागचे सत्य समोर येऊ शकेल.