गरबा पार्टनर भाड्याने देण्याची जाहिरात व्हायरल, सायबर क्राईमकडून चौकशी सुरू

नवरात्रोत्सव सुरू होण्याआधीच सोशल मीडियावर एक वेगळीच जाहिरात व्हायरल झाली असून त्यावरून मोठी चर्चा रंगली आहे. 'Rent A Garba Partner' या नावाने फिरणाऱ्या पोस्टमधून गरबा खेळण्यासाठी पैसे देऊन पार्टनर उपलब्ध करून दिला जाईल, असा दावा करण्यात आला आहे.

मुंबई, अहमदाबाद आणि सुरत या शहरांशी संबंधित अशा पोस्ट आणि सोशल मीडिया अकाउंट्स समोर आल्यानंतर या प्रकरणाची सायबर क्राईमकडून चौकशी सुरू करण्यात आली आहे. या जाहिरातींमागे नेमके कोण आहे आणि त्यांचा उद्देश फक्त पार्टनर पुरवणे आहे की यामागे फसवणुकीचा काही प्रकार दडलेला आहे, याचा तपास सुरू आहे.

नवरात्रोत्सव अवघ्या काही दिवसांवर येऊन ठेपला असून या काळात देशभरात वेगवेगळ्या ठिकाणी गरबा नाईटचे आयोजन केले जाते. याच पार्श्वभूमीवर या जाहिराती व्हायरल होत आहेत. गरबा उत्सवाच्या नावाखाली यात वेगवेगळी पॅकेज आणि दर जाहीर करण्यात आल्याचे या पोस्टमधून दिसते.

व्हायरल झालेल्या काही पोस्टरमध्ये 'Silver', 'Gold' आणि 'Platinum' अशा तीन पॅकेजची माहिती देण्यात आली आहे. काही पोस्टमध्ये गरबा पार्टनरसाठी 1,000 रुपयांपासून 2,000 रुपयांपर्यंतचे दर सांगितले आहेत, तर आणखी एका व्हायरल पोस्टमध्ये 3,000 रुपयांपासून 6,500 रुपयांपर्यंतचे पॅकेज असल्याचे नमूद केले आहे. या जाहिरातींमध्ये 2 तासांपासून ते संपूर्ण रात्रीपर्यंत गरबा पार्टनर मिळेल, असा दावा करण्यात आला आहे. यासोबतच डान्स स्टेप शिकवणे, मॅचिंग आउटफिट, सेल्फी, इंस्टाग्राम रिल्स आणि फोटो काढणे अशा वेगवेगळ्या सेवांचाही उल्लेख आहे. काही पोस्टमध्ये 'फोरहेड किस', उशिरा रात्री फूड आउटिंग आणि घरी सोडणे यासारख्या बाबींचाही उल्लेख असल्याने या जाहिरातींच्या स्वरूपाबाबत प्रश्न उपस्थित झाले आहेत.

मीरा-भाईंदर विधानसभा मतदारसंघाचे भाजप आमदार नरेंद्र मेहता यांनी या भाड्याच्या गरबा पार्टनर जाहिरातींवर प्रश्न उपस्थित केला आहे. प्रकरणाचे गांभीर्य लक्षात घेत त्यांनी पोलीस आयुक्त निकेत कौशिक यांच्याकडे लेखी तक्रार करत दोषींवर कडक कारवाईची मागणी केली आहे. या प्रकरणाची सखोल चौकशी करून आवश्यक ती कारवाई करावी, अशी मागणी मेहता यांनी पत्रातून केली असून पोलीस आयुक्तांची प्रत्यक्ष भेट घेऊनही त्यांनी हे प्रकरण त्यांच्या निदर्शनास आणून दिले आहे.

या जाहिरातींमागे नेमके कोण आहे, याचा तपास सध्या सुरू आहे. सोशल मीडियावर महिला-पुरुष तसेच तरुण-तरुणींना पार्टनर उपलब्ध करून देण्याच्या ऑफर्स दाखवल्या जात असल्याचा दावा केला जातो. नवरात्री आणि गरबा उत्सवाच्या पार्श्वभूमीवर अशा जाहिराती मोठ्या प्रमाणात लोकांपर्यंत पोहोचत असल्याने सायबर क्राईमकडून याची चौकशी सुरू आहे.

पोलिसांनी अशा जाहिरातींबाबत सावध राहण्याचे आवाहन केले आहे. या ऑफर्सच्या माध्यमातून लोकांना जाळ्यात ओढले जाऊ शकते, असा इशारा देण्यात आला आहे. अशा जाहिरातींमधून ग्राहकांना फिशिंग लिंकवर क्लिक करायला भाग पाडले जाऊ शकते आणि त्यानंतर ऑनलाइन पेमेंटच्या नावाखाली आर्थिक फसवणूक होण्याची शक्यता आहे. यातून इतर प्रकारचे सायबर गुन्हेही घडू शकतात, अशी चिंता व्यक्त करण्यात येत आहे. त्यामुळे सोशल मीडियावर दिसणाऱ्या अशा आकर्षक ऑफर्सवर लगेच विश्वास न ठेवता त्यांची सत्यता तपासणे गरजेचे आहे. 'Rent A Garba Partner' जाहिरातींमागील सत्य तपास यंत्रणांच्या चौकशीनंतरच स्पष्ट होणार आहे.