गणेश विसर्जन मिरवणुकीत पोलिसांना दमबाजी, भाजप तालुकाध्यक्षासह 14 जणांवर गुन्हा दाखल
शिरूर अनंतपाळ तालुक्यातील डिगोळ गावात गणेश विसर्जन मिरवणुकीदरम्यान पोलिसांना दमबाजी केल्याचा आणि रस्ता अडवून वाहतुकीत अडथळा आणल्याचा प्रकार समोर आला आहे. या प्रकरणी शंभू महादेव गणेश मंडळाचे अध्यक्ष व उपाध्यक्ष यांच्यासह 14 जणांवर पोलिसांनी गुन्हा दाखल केला आहे. ही घटना 22 सप्टेंबर रोजी रात्री डिगोळ गावात घडली.
डिगोळ गावातील शंभू महादेव गणेश मंडळाची विसर्जन मिरवणूक निघाली होती, तेव्हा गावात पोलीस आणि होमगार्ड यांचा बंदोबस्त तैनात करण्यात आला होता. रात्री साधारण 10.22 च्या सुमारास मिरवणुकीत डीजे मोठ्या आवाजात सुरू असल्याचे आणि विसर्जनाची कार्यवाही ठरलेल्या वेळेत न करता विनाकारण उशीर केला जात असल्याचे बंदोबस्तावरील होमगार्डच्या लक्षात आले. ही बाब होमगार्डने वरिष्ठ अधिकाऱ्यांच्या लक्षात आणून दिली. ही माहिती मिळताच परिविक्षाधीन पोलीस उपअधीक्षक तथा प्रभारी अधिकारी अक्षय जाधव हे पोलीस ठाण्याच्या कर्मचाऱ्यांना सोबत घेऊन घटनास्थळी पोहोचले.
घटनास्थळी पोहोचल्यानंतर रात्री साधारण 10.35 वाजता पोलिसांनी मंडळाच्या पदाधिकाऱ्यांना आणि मिरवणुकीत सहभागी झालेल्या नागरिकांना डीजे बंद करून विसर्जनाची प्रक्रिया लवकरात लवकर पूर्ण करण्याच्या सूचना दिल्या. मात्र फिर्यादीनुसार, पोलिसांच्या या सूचनांकडे दुर्लक्ष करत डीजे सुरूच ठेवण्यात आला आणि पोलिसांशी हुज्जत घालण्यात आली. पोलीस व होमगार्ड यांच्याशी वाद घालून शासकीय कामात अडथळा निर्माण केल्याचा आरोप फिर्यादीत करण्यात आला आहे.
पोलीस अंमलदार विनय उबाळे यांनी दिलेल्या फिर्यादीनुसार, आरोपींनी बंदोबस्तावरील पोलीस व होमगार्ड यांच्याशी धक्काबुक्की केली, हुज्जत घातली, अश्लील शिवीगाळ केली, घोषणाबाजी केली आणि जमावाला चिथावणी देत ठरलेल्या वेळेनंतरही मिरवणूक सुरूच ठेवली. एवढेच नव्हे तर लातूर-उदगीर राष्ट्रीय महामार्ग क्रमांक 63 वर रस्ता रोको करून वाहतुकीला अडथळा निर्माण केल्याचाही आरोप फिर्यादीत करण्यात आला आहे.
या प्रकरणी ज्यांच्यावर गुन्हा दाखल झाला आहे, त्यात माधव भाऊसाहेब बिराजदार, रामेश्वर विनोद डिगोळे (अध्यक्ष), मंगेश मारोती दासरे (उपाध्यक्ष), सुदर्शन दिनकर डिगोळ, गोविंद मधुकर दासरे, संदीप मारोती टाकळगावे, किरण रवींद्र बिराजदार, नवाज बाबुराव मुजेवार, शुभम नानासाहेब बिराजदार, सुधाकर शिंगरुपे, बाळू महादू लोंढे, सतीश राजाराम कलमे, सचिन माधव वडजे आणि अमोल ज्ञानोबा शेळके या सर्वांचा समावेश आहे. हे सर्वजण डिगोळ गावाचे, तालुका शिरूर अनंतपाळ येथील रहिवासी आहेत.
पोलीस अंमलदार विनय उबाळे यांच्या फिर्यादीवरून या 14 जणांविरुद्ध गुन्हा दाखल करण्यात आला असून पुढील तपास शिरूर अनंतपाळ पोलीस स्टेशनचे पोलीस करत आहेत.
