गहुंजेतील बंद फ्लॅटमध्ये लंडनहून परतलेल्या मुग्धा देशमुखचा कुजलेला मृतदेह सापडला

पिंपरी-चिंचवडजवळच्या गहुंजे येथील 'लोढा बेलमोंडो' या आलिशान सोसायटीतल्या एका बंद फ्लॅटमध्ये ३४ वर्षांच्या मुग्धा अविनाश देशमुख हिचा मृतदेह कुजलेल्या अवस्थेत सापडला. मुग्धा मूळची छत्रपती संभाजीनगरची असून उच्च शिक्षणासाठी ती लंडनला गेली होती. या घटनेमुळे संपूर्ण महाराष्ट्रात खळबळ उडाली आहे.

२८ ऑक्टोबरला पोलिसांनी फ्लॅटचा दरवाजा उघडला, तेव्हा हा प्रकार समोर आला. लंडनहून परत आल्यावर घरच्यांना काहीच न सांगता ती पुण्यात एकटीच का राहत होती, हे कोडे आता अधिकच गडद झाले आहे.

मुग्धा पुण्याच्या COEP कॉलेजमधून पदवीधर झाली होती. जुलै २०२५ मध्ये MBA च्या उच्च शिक्षणासाठी ती लंडनला गेली. तिथे पार्ट टाईम जॉब करून ती शिक्षणाचा खर्च भागवत होती आणि घरच्यांशी नियमित बोलत होती.

ऑगस्ट २०२६ च्या शेवटच्या आठवड्यात तिने कोणालाही न सांगता लंडन सोडले आणि ती भारतात आली. पालकांना याची जराही कल्पना दिली नाही. ती गहुंजे येथील फ्लॅटमध्ये एकटीच राहू लागली. ऑनलाईन पद्धतीने ती MBA च्या विद्यार्थ्यांना शिकवत असल्याने घराबाहेर क्वचितच पडायची. २१ ऑक्टोबरला तिने घरकामाला येणाऱ्या मोलकरणीलाही काम बंद करायला सांगितले.

२३ ऑक्टोबरला आईशी तिचे शेवटचे बोलणे झाले. त्यानंतर तिचा फोन बंद झाला आणि तिच्याशी संपर्क पूर्णपणे तुटला. संपर्क होत नसल्याने २४ ते २६ ऑक्टोबरदरम्यान कुटुंबीयांनी लंडनमधल्या मैत्रिणीमार्फत तिथल्या पोलिसांत तक्रार नोंदवून चौकशी केली. तेव्हा मुग्धाने ऑगस्टच्या शेवटीच लंडन सोडल्याचे उघड झाले.

मुलगी लंडनमध्ये नसून बेपत्ता आहे, हे कळताच २७ ऑक्टोबरला पालकांनी छत्रपती संभाजीनगरच्या उस्मानपुरा पोलीस ठाण्यात तक्रार दिली. पोलिसांनी बँक व्यवहार आणि डिजिटल पुराव्यांच्या आधारे तपास सुरू केला, तेव्हा तिचे लोकेशन पुण्यात असल्याचे दिसले.

२८ ऑक्टोबरला ऑनलाईन फूड ॲप्सवर तिच्या क्रेडिट कार्डचा वापर झाल्याचे समोर आले आणि ती पुण्यातच असल्याचे नक्की झाले. पोलिसांनी गहुंजेतल्या 'लोढा बेलमोंडो' मधल्या फ्लॅटवर धाड टाकली. बंद फ्लॅटमध्ये मुग्धाचा मृतदेह कुजलेल्या अवस्थेत मिळाला.

बंद फ्लॅटमध्ये मृतदेह सापडल्याने प्रकरणाला मोठे गूढ वळण मिळाले आहे. मुग्धा लंडनहून अचानक का परत आली? भारतात असल्याचे तिने कुटुंबाला का कळू दिले नाही? मृत्यूच्या तीन दिवस आधी तिने कामवाल्या बाईला काम बंद करायला का सांगितले? आणि तिचा मृत्यू नेमका कसा झाला? असे अनेक प्रश्न अजून अनुत्तरित आहेत.

पोलीस सध्या डिजिटल पुरावे, बँक व्यवहार आणि व्हिसेरा रिपोर्ट यांच्या आधारे या प्रकरणाचा सखोल तपास करत आहेत.