आशियाई क्रीडा स्पर्धेत भारतीय हॉकी संघाचा सलग तिसरा विजय, साउथ कोरियाला दाखवला घरचा रस्ता
भारतीय पुरुष हॉकी संघाने आशियाई क्रीडा स्पर्धा 2026 मध्ये आपली दमदार फॉर्म कायम ठेवली आहे. गुरुवारी झालेल्या सामन्यात भारतीय संघाने साउथ कोरियाला 8-2 अशा फरकाने धूळ चारली. हा सामना पूर्णपणे एकतर्फी झाला आणि भारताचा या स्पर्धेतला सलग तिसरा विजय ठरला आहे.
याआधी स्पर्धेच्या सुरुवातीलाच भारताने इंडोनेशियाविरुद्ध 13-1 असा दमदार विजय मिळवला होता. त्यानंतर श्रीलंकेला 16-1 अशा मोठ्या फरकाने हरवलं होतं. आणि आता साउथ कोरियालाही भारतीय संघाने घरचा रस्ता दाखवला. या तिन्ही सामन्यांमध्ये भारतीय संघाने आपल्या प्रतिस्पर्ध्यांवर सुरुवातीपासूनच वर्चस्व गाजवलं.
सामन्याची सुरुवातच भारतासाठी दमदार झाली. चौथ्या मिनिटाला शिलानंद लाकराने भारतासाठी पहिला गोल केला. त्यानंतर 10 व्या मिनिटाला सुखजीत सिंगने गोल करत भारताची आघाडी दुप्पट केली. पहिल्या दहा मिनिटांतच दोन गोल बसल्यामुळे साउथ कोरियाचे डिफेंडर्स पूर्णपणे दबावात आले होते. याचाच फायदा घेत भारताचा कर्णधार हरमप्रीत सिंगने 11 व्या मिनिटाला पेनल्टी कॉर्नरवर गोल करत भारताचा तिसरा गोल नोंदवला. पहिला क्वार्टर संपण्याच्या तोंडावर अभिषेकने चौथा गोल करत भारताची आघाडी चौपट केली.
दुसऱ्या क्वार्टरमध्ये साउथ कोरियाच्या डिफेन्सने जोर लावला आणि सुरुवातीला भारतीय संघाला फारशी संधी दिली नाही. मात्र 26 व्या मिनिटाला दिलप्रीत सिंगने प्रतिस्पर्धी संघाचा डिफेन्स भेदत भारताची लीड 5-0 अशी केली. यानंतर सहा मिनिटांतच, म्हणजे 32 व्या मिनिटाला दिलप्रीतने आपला दुसरा आणि भारतासाठी सहावा गोल केला. भारताच्या या आक्रमणासमोर साउथ कोरियाचा संघ पूर्णपणे बॅकफूटवर गेला होता आणि त्यांच्या डिफेन्सला पुन्हा एकदा अभिषेकने भेदत भारतासाठी सातवा गोल केला.
मात्र साउथ कोरियाच्या संघाने शेवटपर्यंत हार मानली नाही आणि चांगली झुंज दिली. सामना हातातून गेल्याचं स्पष्ट दिसत असतानाही त्यांनी प्रयत्न सोडले नाहीत. त्यांच्याकडून सामन्याच्या 42 व्या मिनिटाला पहिला गोल किम जेहोने केला. त्यानंतर काही मिनिटांतच कोरियाकडून दुसरा गोल किम याँग बोकने केला. या दोन गोलमुळे साउथ कोरियाला थोडा दिलासा मिळाला असला तरी भारताची आघाडी मोडता आली नाही.
अखेरच्या क्वार्टरमध्ये भारतासाठी आठवा गोल राजिंदर सिंगने केला आणि भारताच्या या दमदार विजयावर शिक्कामोर्तब झालं. भारतीय संघाला आता पुढचा सामना 26 सप्टेंबरला जपानविरुद्ध खेळायचा आहे.
