Asian Games: भारतीय रणरागिणींची जपानवर मात, महिला कबड्डी संघाची विजयाची हॅटट्रिक

जपानमध्ये सुरू असलेल्या एशियन गेम्स २०२६ स्पर्धेत भारतीय महिला कबड्डी संघाने आणखी एक मोठं यश मिळवलं आहे. संघाने जपानला ५०-२५ अशा मोठ्या फरकाने पराभूत केलं. या विजयासह भारतीय संघाने ग्रुप ए मधला आपला सलग तिसरा सामना जिंकला आहे. या आधीच भारताने सेमीफायनलमध्ये आपलं स्थान पक्कं केलं होतं, त्यामुळे हा सामना संघासाठी सराव आणि आत्मविश्वास वाढवणारा ठरला.

कर्णधार पुष्पा राणा हिच्या नेतृत्वाखाली मैदानात उतरलेल्या भारतीय संघाने सामना सुरू झाल्यापासूनच जपानवर पूर्ण दबाव टाकला होता. त्यामुळे जपानच्या संघाला सामन्यात परत येण्याची कोणतीही संधीच मिळाली नाही. भारतीय खेळाडूंनी आक्रमक चढाया आणि तितकाच भक्कम डीफेन्स दाखवत पहिल्या हाफमध्येच ३२-१३ अशी मोठी आघाडी घेतली होती. या हाफमध्ये भारतीय संघाने जपानला दोनदा "ऑलआउट" करत सामन्यावर पूर्ण पकड मिळवली होती. पहिल्या हाफमधलीच ही आघाडी पुढे सामन्याची दिशा ठरवणारी ठरली.

दुसऱ्या हाफमध्येही भारतीय खेळाडूंनी आपली पकड सैल होऊ दिली नाही. रेडर्सनी सतत पॉईंट्स मिळवत ठेवले, तर डिफेंडर्सनी जपानच्या रेडर्सना पॉईंट्स मिळवण्याची फारशी संधीच दिली नाही. रेडिंग आणि डिफेन्स या दोन्ही आघाड्यांवर दाखवलेल्या दमदार खेळाच्या जोरावर भारताने अखेर २५ पॉईंट्सच्या मोठ्या फरकाने हा सामना जिंकला. सुरुवातीपासून शेवटपर्यंत भारतीय संघाने सामन्यावरची पकड कधीच सोडली नाही, हे या विजयातून पुन्हा एकदा दिसून आलं.

दुसरीकडे, एशियन गेम्स २०२६ मध्ये भारतीय महिला संघापाठोपाठ पुरुष कबड्डी संघानेही आपली विजयी घोडदौड कायम ठेवली आहे. गुरुवारी झालेल्या ग्रुप-ए मधल्या आपल्या शेवटच्या साखळी सामन्यात भारताने चीनी ताइपेचा ३७-२१ असा पराभव केला. या विजयासह भारतीय पुरुष संघाने ग्रुप स्टेजमध्ये आपलं अजेय स्थान कायम ठेवलं आहे. यापूर्वी बुधवारी बांगलादेशचा पराभव करत भारतीय पुरुष संघाने आधीच सेमीफायनलमध्ये प्रवेश केला होता. आज भारतीय पुरुष कबड्डी संघाचा सेमीफायनल सामना होणार आहे, त्यामुळे पुरुष आणि महिला अशा दोन्ही संघांची कामगिरी स्पर्धेत सध्या उठून दिसते आहे.

याशिवाय भारतीय महिला हॉकी संघानेही जपानला ३-१ ने नमवत २०२६ च्या आशियाई क्रीडा स्पर्धेतला आपला सलग चौथा विजय नोंदवला. या विजयामुळे भारतीय संघ "पूल बी" मध्ये अव्वल स्थानी पोहोचला असून त्यांचं उपांत्य फेरीतलं स्थान निश्चित झालं आहे. याआधी भारताने आपल्या सर्व प्रतिस्पर्ध्यांना मोठ्या फरकाने पराभूत केलं होतं आणि भरपूर गोल केले होते. या सामन्यात भारतासाठी लालरेम्सियामी, इशिका आणि नवनीत यांनी गोल केले, तर जपानसाठी शिहो कोबायाकावाने एकमेव गोल केला.