आशियाई स्पर्धेतील महिला कुस्तीपटूंवर बृजभूषण सिंह नाराज, 8 पदकांची होती अपेक्षा
भाजपचे माजी खासदार बृजभूषण शरण सिंह यांनी एशियन गेम्स 2026 मधील कुस्तीच्या कामगिरीवर प्रतिक्रिया दिली आणि 2027 ची विधानसभा न लढवण्याचे सांगितले.
भाजपचे माजी खासदार आणि भारतीय कुस्ती महासंघाचे माजी अध्यक्ष बृजभूषण शरण सिंह (BrijBhushan Singh) यांनी एशियन गेम्स 2026 मधील भारतीय कुस्तीपटूंच्या कामगिरीबद्दल नाराजी व्यक्त केली. विशेषतः महिला कुस्तीपटूंच्या कामगिरीवर ते समाधानी नाहीत. "मला किमान 8 पदकांची अपेक्षा होती, पण महिला कुस्तीपटूंनी चांगली कामगिरी केली नाही," असे ते म्हणाले.
एका वृत्तसंस्थेशी बोलताना सिंह म्हणाले की, यावेळी कुस्तीत आमचा अंदाज फसला. मुलींची कामगिरी म्हणावी तितकी चांगली झाली नाही. त्यांच्या मते एकूण 8 पदके यायला हवी होती, त्यात 3 सुवर्ण, सिल्वर आणि ब्रॉंज पदकांचा समावेश होता, पण प्रत्यक्षात फक्त 6 पदके आली. तरीही 1966 नंतरची कुस्तीतील ही चांगली कामगिरी आहे, असेही ते म्हणाले. एशियन गेम्स 2023 प्रमाणेच आपल्याला मेडल मिळाली, पण यावेळी सुवर्ण पदकांची संख्या जास्त आहे, असे ते बोलले.
पुढे ते म्हणाले की, आता कुस्तीवर काम करण्याची गरज आहे, कारण गेली दोन ते तीन वर्षे कुस्तीत काही ना काही घडत आले आहे. त्याचा चांगल्या कुस्तीपटूंच्या कामगिरीवर परिणाम झाला. यावेळी सरकार, क्रीडा संघ आणि खेळाडू यांच्यात समतोल आहे. मिळालेली 6 मेडल ऑलिम्पिकमध्येही मिळावीत, असा आमचा प्रयत्न असेल, असे त्यांनी सांगितले.
राजकीय भवितव्याबद्दल विचारले असता बृजभूषण यांनी स्पष्ट केले की, 2027 मध्ये होणारी विधानसभा निवडणूक मी लढवणार नाही. पुढच्या लोकसभा निवडणुकीबद्दल ते म्हणाले की, येत्या काळात त्याचा निर्णय घेऊ. लोकसभा निवडणूक लढवण्याबद्दल आत्ता मी कोणतेच वक्तव्य करू शकत नाही, असे त्यांनी स्पष्ट शब्दांत सांगितले.
दरम्यान, 2023 साली कुस्तीविश्वातील प्रसिद्ध महिला कुस्तीपटूंनी बृजभूषण यांच्यावर लैंगिक अत्याचाराचे आरोप केले होते. दिल्ली उच्च न्यायालयाने 3 ऑगस्ट 2026 रोजी त्यांना या आरोपातून निर्दोष मुक्त केले. आता एशियन गेम्समधील महिला कुस्तीपटूंच्या कामगिरीवर भाष्य करून त्यांनी पुन्हा कुस्तीविश्वात सक्रिय होण्याचा प्रयत्न केला आहे.
एशियन गेम्स 2026 मध्ये भारतीय पुरुष आणि महिला कुस्तीपटूंना मिळून एकूण 6 मेडल मिळाली. अमन सहरावतने 57 किलोग्राम फ्रीस्टाइल गटात सुवर्ण जिंकले. सुजीत कलकलने पुरुषांच्या 65 किलो वजनी गटातील फ्रीस्टाइल रेसलिंगमध्ये सुवर्ण पटकावले. नितेश सिवाचने ग्रीको रोमनच्या 97 किलो वजनी गटात रौप्य जिंकले. महिला कुस्तीपटू अंतिम पंघाल हिने 53 किलो वजनी गटात फ्रीस्टाइल रेसलिंगमध्ये सिल्वर मेडल जिंकले, तर दीपक पूनियाने कांस्य पदकाची कमाई केली. ग्रीको रोमन रेसलिंगच्या 87 किलो वजनी गटात पुरुष कुस्तीपटू सुनील कुमारला कांस्य पदकावर समाधान मानावे लागले.
