आशियाई पॅरा गेम्सच्या पहिल्याच दिवशी भारताची ११ पदके, त्यात ४ सुवर्ण

जपानमधील आईची-नागोया येथे आजपासून आशियाई पॅरा गेम्स २०२६ या स्पर्धेला सुरुवात झाली आहे. स्पर्धेच्या पहिल्याच दिवशी भारतीय पॅरा-ॲथलीट्सनी आपली ताकद दाखवून दिली आणि ऐतिहासिक, सुवर्णमय सुरुवात केली आहे. भारताच्या खेळाडूंनी पहिल्या दिवशी केलेल्या शानदार कामगिरीमुळे देशाची मान अभिमानाने उंचावली आहे.

चार वेगवेगळ्या क्रीडा प्रकारांमध्ये भारतीय खेळाडूंनी अप्रतिम कामगिरी केली. त्यांनी ४ सुवर्ण, ५ रजत आणि २ कांस्य अशी एकूण ११ पदके जिंकली आहेत. पहिल्या दिवशी अनुभवी खेळाडूंनी अपेक्षेप्रमाणे चमकदार कामगिरी केली.

नेमबाजीत व्हीलचेअरवर असणाऱ्या भारताच्या अव्वल नेमबाज मोना अग्रवालने महिलांच्या १० मीटर एअर रायफल एसएच-१ स्पर्धेत सुवर्णपदक जिंकले. मोना अग्रवाल पॅरिस पॅरालिम्पिक २०२४ ची विजेती आहे. अतिशय रोमांचक ठरलेल्या अंतिम फेरीत तिने शेवटच्या शॉटवर बाजी मारली. या प्रतिष्ठेच्या स्पर्धेतील कांस्यपदक दक्षिण कोरियाच्या युनरी ली हिने जिंकले.

याच स्पर्धेत देशाची स्टार पॅराॲथलीट आणि दोन वेळा पॅरालिम्पिक चॅम्पियन राहिलेली अवनि लेखरा हिनेही चमकदार खेळ करत सिल्व्हर मेडल जिंकले. या दोघींनी पदके जिंकल्यामुळे भारताची मान अभिमानाने उंचावली आहे.

विना हातांची प्रसिद्ध तिरंदाज शीतल देवी हिने आपल्या कामगिरीने सर्वांचे लक्ष वेधून घेतले. पॅरा आर्चर शीतल देवीने जागतिक विक्रमाशी बरोबरी केली आणि नवा विक्रमही प्रस्थापित केला.

ॲथलेटिक्समध्ये पॅरालिम्पिकमध्ये रजत पदक जिंकलेल्या निषादने आपल्या कारकिर्दीतील पहिले गोल्ड मेडल जिंकले. त्याने ७.११ मीटर लांब उडी या प्रकारात हे गोल्ड मेडल मिळवले. तसेच महिलांच्या १५०० मीटर T12/T13 प्रकारात दृष्टिबाधित धावपटू सौम्या हिने ५ मिनिटे १२.३९ सेकंदांची सर्वोत्तम वेळ नोंदवली आणि गोल्ड मेडल जिंकले.

अशा प्रकारे आशियाई पॅरा खेळांच्या पदक तालिकेत भारताने पहिल्याच दिवशी दणदणीत एन्ट्री केली आहे. स्पर्धा जपानमध्ये सुरू असून अजून पुढे खेळ व्हायचे आहेत, पण पहिल्या दिवशीच भारतीय खेळाडूंनी चार वेगवेगळ्या क्रीडा प्रकारांत पदके पटकावून चांगले यश मिळवून दिले आहे.