Asian Games 2026: सर्वेश कुशारेची उंच उडीत ऐतिहासिक कामगिरी, जिंकले रौप्यपदक

जपानमध्ये सध्या सुरू असलेल्या आशियाई क्रीडा स्पर्धा 2026 मध्ये भारतीय खेळाडूंची कामगिरी उठून दिसत आहे, आणि याच स्पर्धेत भारताचा स्टार ॲथलीट सर्वेश कुशारे याने पुरुषांच्या उंच उडी प्रकारात एक मोठी कामगिरी नोंदवली आहे. सर्वेशने 2.25 मीटर उंच उडी मारत रौप्यपदकावर आपले नाव कोरले असून, त्याच्या या कामगिरीचे सर्वत्र कौतुक होत आहे. या यशामुळे भारताच्या ॲथलेटिक्सच्या इतिहासात एक नवा अध्याय जोडला गेला आहे.

सर्वेशच्या या पदकाला विशेष महत्त्व आहे, कारण पुरुषांच्या उंच उडी प्रकारात भारताला तब्बल 56 वर्षांनंतर आशियाई क्रीडा स्पर्धेत पदक मिळाले आहे. याआधी 1970 साली बँकॉक येथे झालेल्या आशियाई क्रीडा स्पर्धेत भारताने या प्रकारात पदक जिंकले होते. त्यानंतर साडेपाच दशके भारताला या क्रीडा प्रकारात पदकाची प्रतीक्षा करावी लागली. म्हणजेच जवळपास साडेपाच दशकांनंतर भारताला या क्रीडा प्रकारात पुन्हा पदक मिळण्याची संधी मिळाली, आणि सर्वेशच्या कामगिरीमुळे हा प्रदीर्घ दुष्काळ अखेर संपुष्टात आला आहे.

स्पर्धेत सर्वेश सुरुवातीपासूनच जिंकण्याच्या इराद्याने उतरला होता. त्याने सुरुवातीच्या फेऱ्या सहज पूर्ण करत 2.25 मीटरच्या उंच उडी प्रकारात यशस्वी उडी मारली. अंतिम फेरीत पदक जिंकण्यासाठी त्याने कडवी झुंज दिली, आणि अखेर त्याच्या मेहनतीचे फळ मिळाले. देशासाठी रौप्यपदक जिंकत त्याने मैदानावरील प्रेक्षकांची मने जिंकली.

सोनेरी पदकासाठी सर्वेश कुशारे आणि चीनी तैपेईचा खेळाडू चाओ ह्सुआन-फू यांच्यात अत्यंत चुरशीची लढत पाहायला मिळाली. दोघांनीही 2.25 मीटर ही समान उंची यशस्वीरीत्या पार केली, मात्र चाओ ह्सुआन-फूने ही उंची पहिल्याच प्रयत्नात गाठली, तर सर्वेशला तीच उंची गाठण्यासाठी दोन प्रयत्न लागले. यामुळेच सर्वेशचे सुवर्णपदक थोडक्यात हुकले आणि त्याला रौप्यपदकावर समाधान मानावे लागले.

सर्वेश कुशारे हा महाराष्ट्रातील नाशिक जिल्ह्याचा सुपुत्र आहे. आशियाई क्रीडा स्पर्धेपर्यंतचा त्याचा प्रवास संघर्षमय आणि प्रेरणादायी राहिला आहे. प्रतिकूल परिस्थितीतही कठोर मेहनत आणि सततच्या सरावाच्या जोरावर त्याने राष्ट्रीय आणि आंतरराष्ट्रीय पातळीवर स्वतःची ओळख निर्माण केली. या मेहनतीच्या जोरावरच आज त्याला आशियाई क्रीडा स्पर्धेत देशाचे प्रतिनिधित्व करण्याची संधी मिळाली असून, नाशिक जिल्ह्यातून आलेल्या या खेळाडूने संपूर्ण देशाला अभिमान वाटावा अशी कामगिरी करून दाखवली आहे.