आशियाई क्रीडा २०२६: साहिल, कुशल आणि गणेश यांचे चीनवर २३८-२३७ ने मात करून सुवर्ण

आशियाई क्रीडा २०२६ स्पर्धेचा ११ वा दिवस भारतासाठी सोन्याचा दिवस ठरला. आर्चरीच्या कंपाऊंड प्रकारात आधी महिलांच्या संघाने सुवर्णपदक जिंकले आणि त्यानंतर पुरुष संघानेही तेच करून दाखवले. साहिल जाधव, कुशल दलाल आणि गणेश मणिरत्नम थिरुमुरु यांनी भारतासाठी तिसरे सुवर्णपदक जिंकले.

अंतिम सामन्यात भारतीय पुरुष संघाची गाठ चीनशी पडली. तिसऱ्या सेटमध्ये भारतीय संघ एका गुणाने मागे होता. अंतिम फेरीच्या अगदी आधी भारत १७८-१७९ ने पिछाडीवर होता. त्यानंतर चीनने ८ गुणांचा शॉट मारला आणि ती त्यांची मोठी चूक ठरली. त्यानंतर भारतीय संघाकडून कोणतीही चूक झाली नाही.

चौथ्या आणि शेवटच्या गेममध्ये भारताने आघाडी घेतली आणि ती शेवटपर्यंत कायम ठेवली. सामना भारताने २३८-२३७ असा जिंकला. चीनचा तिरंदाजी संघ फक्त एका गुणाने हरला आणि त्यांना रौप्य पदकावर समाधान मानावे लागले. या विजयामुळे भारताने तिरंदाजीमध्ये विजयाची हॅटट्रिक केली. भारताच्या सुवर्णपदकांची एकूण संख्या आता दहावर पोहोचली आहे.

त्याआधी उपांत्य फेरीत पुरुषांच्या कंपाऊंड सांघिक प्रकारात भारताचे साहिल जाधव, कुशल दलाल आणि गणेश मणिरत्नम थिरुमुरु यांच्यासमोर दक्षिण कोरियाचे आव्हान होते. भारतीय तिरंदाजांनी तो सामना २३६-२२९ असा जिंकला आणि अंतिम फेरीत प्रवेश केला. अंतिम सामन्यातही भारतीय संघाची कामगिरी प्रभावी ठरली, मात्र चीनविरुद्धच्या सुवर्णपदकाच्या लढतीत भारत एकेवेळी पिछाडीवर होता.

२०२६ च्या आशियाई क्रीडा स्पर्धेत भारतासाठी आजचा दिवस कायम लक्षात राहण्यासारखा ठरला. भारताने एकाच दिवशी चार सांघिक पदके जिंकली, त्यातली तीन तिरंदाजीत आणि एक नेमबाजीत.

दिवसाच्या सुवर्णपदकांचे निकाल असे आहेत. महिलांच्या कंपाऊंड तिरंदाजी सांघिक स्पर्धेत ज्योती सुरेखा वेन्नम, चिकिथा तानिपर्थी आणि प्रितिका प्रदीप यांनी चीनचा २३८-२३४ असा पराभव करून सुवर्णपदक मिळवले.

मिश्र कंपाऊंड तिरंदाजी सांघिक स्पर्धेत चिकिता तनिपथी आणि साहिल जाधव यांनी शूट-ऑफमध्ये दक्षिण कोरियाला हरवून सुवर्णपदक जिंकले. यासोबतच त्यांनी लॉस एंजेलिस २०२८ ऑलिम्पिक खेळांमधील आपले स्थानही निश्चित केले.

मिश्र ट्रॅप नेमबाजी सांघिक स्पर्धेत नीरू धांडा आणि कायन चेनई यांनी सुवर्णपदक जिंकले. तर पुरुषांच्या कंपाऊंड तिरंदाजी सांघिक स्पर्धेत साहिल जाधव, कुशल दलाल आणि गणेश मणिरत्नम थिरुमुरू यांनी चीनचा २३८-२३७ असा पराभव करून सुवर्णपदक जिंकले.