वाघिणी जिंकल्या, आता वाघ सज्ज! एशियन गेम्स २०२६ मध्ये टीम इंडिया 'या' दिवशी उतरणार मैदानात

जपानमधील आयची-नागोया इथं सुरू असलेल्या एशियन गेम्स स्पर्धेत भारतीय महिला क्रिकेट संघानं अंतिम सामन्यात श्रीलंकेला हरवून सुवर्णपदक पटकावलं. हा विजय ताजा असतानाच आता सगळ्यांचं लक्ष भारतीय पुरुष क्रिकेट संघाकडे वळलं आहे. श्रेयस अय्यरच्या नेतृत्वाखालील टीम इंडिया जपानमध्ये दाखल झाली असून लवकरच एशियन गेम्समधल्या सामन्यांसाठी मैदानात उतरणार आहे. आशियाई क्रीडा स्पर्धेत टीम इंडिया आपला पहिला सामना नेमका कधी खेळणार, हे आता जाणून घेऊया.

एशियन गेम्समधील सामने सुरू होण्याआधी भारत आणि जपान यांच्यात एक टी-२० आंतरराष्ट्रीय सामना पार पडला. हा सामना मुळात २० षटकांचा ठरला होता, पण खराब हवामानामुळे तो अवघ्या पाच षटकांवर आणण्यात आला. सामना अत्यंत चुरशीचा आणि रोमांचक झाला. भारतानं शेवटच्या चेंडूवर अवघ्या दोन धावांनी हा सामना जिंकला. या सामन्यातून एक गोष्ट स्पष्ट झाली, ती म्हणजे इथल्या खेळपट्ट्यांवर टीम इंडियाला अगदी जपूनच खेळावं लागणार आहे.

२०२६ च्या एशियन गेम्समधील पुरुषांची क्रिकेट स्पर्धा २४ सप्टेंबरपासून सुरू होते आहे. या स्पर्धेच्या पहिल्याच दिवशी यजमान जपान आणि अफगाणिस्तान यांच्यात गट फेरीतला पहिला सामना रंगेल, तर त्याच दिवशी हाँगकाँग, चीन आणि मलेशिया हे संघही मैदानात उतरतील. गट फेरीतले सर्व सामने पूर्ण झाल्यानंतर २८ सप्टेंबरपासून उपांत्यपूर्व फेरीचे सामने सुरू होणार आहेत. भारतीय संघाला या स्पर्धेत थेट उपांत्यपूर्व फेरीत प्रवेश मिळाला आहे, त्यामुळे गट फेरीतून त्यांना जावं लागणार नाही.

भारतीय संघाचा एशियन गेम्समधला पहिला सामना सोमवार, २८ सप्टेंबर रोजी होणार असून भारतीय वेळेनुसार सकाळी १०.०० वाजता सुरू होईल. मात्र भारताचा सामना नेमक्या कोणत्या संघाशी होणार हे अजून निश्चित झालेलं नाही. स्पर्धेत भारतीय संघाला 'अ' गटात ठेवण्यात आलं असून, त्यामुळे उपांत्यपूर्व फेरीत भारताची गाठ जपान, नेपाळ किंवा अफगाणिस्तान यांपैकी एका संघाशी पडू शकते.

भारताप्रमाणेच पाकिस्ताननंही आपली एशियन गेम्समधली मोहीम २८ सप्टेंबरलाच सुरू करणार आहे. पाकिस्तान संघालाही या स्पर्धेत उपांत्यपूर्व फेरीत थेट प्रवेश मिळाला आहे. पाकिस्तानचा पहिला सामना त्याच दिवशी, म्हणजे २८ सप्टेंबरला भारतीय प्रमाणवेळेनुसार पहाटे ५.३० वाजता सुरू होईल. पाकिस्तानचा प्रतिस्पर्धी संघ कोण असणार, हेही अद्याप ठरलेलं नाही. उपांत्य फेरीत जागा मिळवण्यासाठी भारत आणि पाकिस्तान या दोघांनाही आपापल्या उपांत्यपूर्व फेरीतील सामने जिंकावे लागतील.