बहिणीला घटस्फोट दिल्याच्या रागातून मेव्हण्याचा खून केल्याचा आरोप; २८ वर्षांनी मुख्य आरोपी बिहारमधून अटकेत

डोंबिवली आणि कोपर रेल्वे स्थानकांदरम्यान १९९८ मध्ये घडलेल्या हत्येच्या प्रकरणात तब्बल २८ वर्षांनंतर पोलिसांनी मोठी कारवाई केली आहे. डोंबिवली जीआरपी पोलिसांनी या प्रकरणातील मुख्य आरोपी संदीप कृष्णन याला बिहारमधून अटक केली आहे. या गुन्ह्यातील अन्य दोन आरोपी अजूनही फरार असून पोलीस त्यांचा शोध घेत आहेत. बहिणीला घटस्फोट दिल्याच्या रागातून मेव्हण्याची हत्या करून मृतदेह रेल्वे रुळांवर टाकण्यात आल्याचा आरोप या प्रकरणात आहे.

हे प्रकरण १४ डिसेंबर १९९८ रोजी सुरू झाले. त्या दिवशी डोंबिवली आणि कोपर रेल्वे स्थानकांदरम्यान रुळांवर एका व्यक्तीचा मृतदेह आढळून आला होता. सुरुवातीला हा रेल्वे अपघात असावा, असा संशय व्यक्त करण्यात आला. मात्र तपासादरम्यान मृत व्यक्ती शैलेश मोरे असल्याचे समोर आले. त्यांचा मृत्यू अपघातात झाला नसून त्यांची हत्या झाली असावी, असा संशय बळावला. त्यामुळे पोलिसांनी हत्येचा गुन्हा दाखल केला.

डोंबिवली रेल्वे पोलिसांनी दिलेल्या माहितीनुसार, शैलेश मोरे यांनी संदीप कृष्णन याच्या बहिणीला घटस्फोट दिला होता आणि त्यावरून त्यांच्यात वाद झाला होता. याच रागातून संदीप कृष्णन आणि त्याचे दोन साथीदार विनोद यादव व विनेश कृष्णन यांनी पार्टीच्या बहाण्याने एकत्र येऊन शैलेश मोरे यांना दगडाने ठेचून मारले, असा आरोप आहे.

तपासात असेही समोर आले की, खुनानंतर हा प्रकार अपघात असल्याचे भासवण्यासाठी शैलेश मोरे यांचा मृतदेह रेल्वे रुळांवर टाकण्यात आला होता. आरोपी फरार झाल्यामुळे या प्रकरणाच्या तपासाला खूप मोठा कालावधी लागला. आता तब्बल २८ वर्षांनंतर मुख्य आरोपी पोलिसांच्या हाती लागल्याने या जुन्या प्रकरणाला पुन्हा एकदा महत्त्वाचे वळण मिळाले आहे.

डोंबिवली जीआरपीचे वरिष्ठ पोलीस निरीक्षक बाबासाहेब थोरात यांच्या मार्गदर्शनाखाली पोलिसांनी संदीप कृष्णन याचा शोध घेतला आणि त्याला बिहारमधून अटक केली. अटकेनंतर त्याला कल्याण न्यायालयात हजर करण्यात आले. न्यायालयाने त्याला पोलीस कोठडी सुनावल्याची माहिती आहे.

या प्रकरणातील विनोद यादव आणि विनेश कृष्णन हे अन्य दोन आरोपी अद्याप फरार आहेत. त्यांचा शोध सुरू असून त्यांनाही अटक करण्यासाठी पोलीस प्रयत्न करत आहेत. २८ वर्षांपूर्वी घडलेल्या या हत्येतील मुख्य आरोपीला अटक झाल्याने तपासाला गती मिळण्याची शक्यता आहे. आता उरलेले आरोपी कधी सापडतात आणि पुढील तपासात कोणती माहिती समोर येते, याकडे सगळ्यांचे लक्ष लागले आहे.