दिवाळीपूर्वी शेतकऱ्यांना मदत देण्याचा प्रयत्न सुरू, बावनकुळे यांची माहिती

नागपूर : राज्यात दुष्काळी परिस्थिती आहे आणि शेतकऱ्यांना दिवाळीच्या आधी आर्थिक मदत मिळावी म्हणून शासनाकडून प्रयत्न सुरू आहेत, असे महसूल मंत्री तथा दुष्काळ निवारण मंत्रिमंडळ उपसमितीचे अध्यक्ष चंद्रशेखर बावनकुळे यांनी सांगितले. शेतकऱ्यांची दिवाळी काळी होऊ देणार नाही, असे ते म्हणाले. नुकसानीचे पंचनामे लवकर पूर्ण करण्यावर शासनाचा भर आहे, असेही त्यांनी स्पष्ट केले.

ट्रिगर-१ मध्ये समावेश न झालेल्या राज्यातील सुमारे १५ ते १८ तहसीलांमध्येही अचूक पंचनामा आणि आनेवारीच्या आधारे त्यांना दुष्काळाच्या कक्षेत आणण्याचा प्रयत्न केला जाणार आहे, असे बावनकुळे यांनी सांगितले. संबंधित शेतकऱ्यांना दिलासा द्यायचा, अशी शासनाची भूमिका आहे. मुख्यमंत्री देवेंद्र फडणवीस यांनी ११ सदस्यीय उपसमितीला आवश्यक ते अधिकार दिले आहेत. २५ ऑक्टोबरपर्यंत अंतिम अहवाल सादर करण्याचे नियोजन आहे, असेही बावनकुळे यांनी सांगितले.

दुष्काळग्रस्त भागात पाणीटंचाई निर्माण झाली, तर टँकर, चारा छावण्या आणि इतर गरजेचे उपाय केले जातील. जिल्हाधिकाऱ्यांना मोठ्या औद्योगिक संस्थांशी बोलून सीएसआरमधून मदत मिळवण्याच्या सूचना देण्यात आल्या आहेत.

बेला येथे 'स्मार्ट व्हिलेज'ची संकल्पना : नागपूर जिल्ह्यातील बेला-उमरेड परिसरात ज्या गरीब आणि गरजू लोकांना घर नाही, त्यांच्यासाठी शासकीय जमीन उपलब्ध करून देण्याचा निर्णय मंत्रिमंडळाने घेतला, असे बावनकुळे यांनी सांगितले. केंद्रीय मंत्री नितीन गडकरी यांनी बेला येथे 'स्मार्ट व्हिलेज' उभारण्याची संकल्पना मांडली होती. त्यानुसार शासकीय जमीन विनामूल्य दिली जाणार असून पारधी तसेच भटक्या-विमुक्त समाजालाही त्याचा लाभ मिळणार आहे.

काँग्रेसवर टीका : जनतेच्या विकासकामांतून जनाधार उभा करण्याऐवजी काँग्रेस नकारात्मक राजकारणावर भर देत आहे, असा आरोप बावनकुळे यांनी केला. जनतेला विकास आणि प्रत्यक्ष काम हवे आहे, आंदोलनाचे राजकारण नको, असे ते म्हणाले. महाविकास आघाडीने बॅलेट पेपरवर निवडणुका घेण्याची मागणी केली आहे, त्यावरही त्यांनी टीका केली.

रोहित पवार यांनी 'मंत्र्यांना दिवाळी साजरी करू देणार नाही' असे वक्तव्य केले होते. त्यावर प्रतिक्रिया देताना बावनकुळे म्हणाले, "रोहित पवार यांनी माझ्या घरी यावे. मी दिवाळी साजरी करणार नाही, त्यांचे स्वागत आहे."

दुष्काळाची परिस्थिती लक्षात घेऊन विवाह समारंभ साधेपणाने करण्याचे आवाहन करण्यात आले आहे, तर आमदारांनी वाढदिवसाचे कार्यक्रम रद्द केले आहेत, असे बावनकुळे यांनी सांगितले. "राजकारणापेक्षा शेतकऱ्यांच्या पाठीशी उभे राहणे महत्त्वाचे आहे," असे आवाहन त्यांनी रोहित पवार यांना केले.