दिल्लीत अॅपलच्या नावाने अमेरिकन लोकांना गंडवणारे बनावट कॉल सेंटर उघड, सात जणांना अटक
नारायणा इंडस्ट्रियल परिसरात दिल्ली पोलिसांनी छापा मारून सात जणांना अटक केली आहे. आरोपी अॅपलचे टेक्निकल सपोर्ट असल्याचे भासवून अमेरिकेतील लोकांना गिफ्ट कार्डच्या जाळ्यात ओढत होते, असा पोलिसांचा दावा आहे.
दिल्ली पोलिसांनी नारायणा इंडस्ट्रियल परिसरात सुरू असलेल्या एका बनावट एप्पल/आयओएस टेक्निकल सपोर्ट कॉल सेंटरवर कारवाई केली आहे. या ठिकाणाहून फसवणुकीचे कॉल करून आणि गिफ्ट कार्ड स्कॅमच्या मार्गाने अमेरिकन नागरिकांना लक्ष्य केले जात होते. या प्रकरणात पोलिसांनी सात जणांना अटक केली आहे. हे नेटवर्क दिल्लीत आणखी ठिकाणी पसरले असावे, असा पोलिसांना संशय आहे.
25 सप्टेंबरला उपनिरीक्षक गजेंद्र माथूर यांना गुप्त माहिती मिळाली. त्या आधारे वेस्ट डिस्ट्रिक्टच्या अँटी ऑटो थेफ्ट स्क्वॉडच्या एका पथकाने नारायणा इंडस्ट्रियल परिसरातील वेप्ट्रा नावाने चालणाऱ्या संशयित इंटरनॅशनल टेक सपोर्ट कॉल सेंटरवर छापा टाकला. या छाप्यात कॉल सेंटरचा कथित मालक अरुण, त्याचा पार्टनर सलीम आणि पाच कॉलर्सना अटक झाली. पोलिसांनी सांगितले की, हे कॉलर्स अमेरिकन नागरिकांशी बोलण्यासाठी लॅपटॉप आणि हेडफोन वापरायचे आणि खोटी इंग्रजी नावे सांगायचे.
कारवाईनंतर 26 सप्टेंबरला नारायणा पोलीस स्टेशनमध्ये एफआयआर नोंदवला गेला. हा एफआयआर भारतीय न्याय संहितेच्या (बीएनएस) कलम 318 (4), 319 (2), 61 (2) आणि 3(5) तसेच इन्फॉर्मेशन टेक्नॉलॉजी अॅक्टच्या कलम 66 डी अंतर्गत आहे.
सुरुवातीच्या तपासात असे समोर आले की, आरोपी अमेरिकेतील लोकांना गाठण्यासाठी खोटे एप्पल/आयओएस टेक्निकल सपोर्ट चालवत होते. ते कथितरीत्या टोल फ्री क्रमांकावरून अमेरिकेत राहणाऱ्या लोकांना फोन करायचे आणि आपण एप्पल टेक्निकल सपोर्टचे एक्झिक्युटिव्ह असल्याचे सांगायचे. समोरच्याच्या डिव्हाइसमध्ये किंवा सिस्टममध्ये व्हायरस, मालवेअर किंवा पोर्नोग्राफिक कंटेंट सापडल्याचे ते सांगायचे. तातडीने टेक्निकल मदत लागेल, असेही एप्पल फोन वापरणाऱ्यांना सांगितले जायचे.
त्यानंतर कथित टेक्निकल अडचण सोडवण्याच्या बहाण्याने पीडितांना गिफ्ट कार्ड विकत घ्यायला लावले जायचे. कार्डचे डिटेल्स किंवा कोड कॉलर्स मिळवायचे आणि आपल्या टीममधील इतरांना पाठवायचे. पोलिसांना सुरुवातीच्या तपासात आयबीएम, अल्ट्राव्ह्यूअर आणि एनीडेस्कसारखे सॉफ्टवेअर इन्स्टॉल केलेले आढळले. अमेरिकन क्रमांकांची कॉल हिस्ट्रीही पोलिसांच्या हाती लागली आहे.
पोलिसांनी सांगितले की, या कारवाईत पाच लॅपटॉप, 12 मोबाइल फोन, 2 राउटर, 6 हेडफोन, 10 क्रेडिट/डेबिट कार्ड, 5 चेक बुक आणि एक ऑडी ए 3 35 टीडीआय कार जप्त केली आहे. अटक झालेल्यांमध्ये अरुण (29) आणि सलीम (28) हे दोघे काकरोलाचे राहणारे आहेत. काकरोलाचाच निखिल (30), पितमपुराचा मोंटू सिंह (34), किशनगडचा तिरहुचू (26), उत्तमनगरचा करण (28) आणि सागपुरचा विशाल (29) यांचाही अटकेत समावेश आहे.
पुढील तपास सुरू असल्याचे पोलीस म्हणाले. या मोठ्या नेटवर्कचा शोध घेणे, टोल फ्री क्रमांकाचा स्रोत शोधणे, संपर्क झालेल्या लोकांची ओळख पटवणे, गिफ्ट कार्डच्या ट्रान्झॅक्शनचा तपास करणे, जप्त केलेल्या डिजिटल पुराव्यांचे विश्लेषण करणे आणि पैशांच्या देवाणघेवाणीची माहिती मिळवणे, असे या तपासाचे मुद्दे आहेत.
