दुष्काळात धुळ्यात लावणीचे कार्यक्रम, भाजप नेत्यांवर विरोधकांची टीका

धुळे जिल्ह्यात यंदा पाऊस पुरेसा न झाल्यामुळे खरीप हंगामातील पिके पूर्णपणे जळून गेली आहेत आणि शेतकरी भीषण दुष्काळाच्या संकटात सापडला आहे. जिल्हा तत्काळ दुष्काळग्रस्त म्हणून जाहीर करावा, या मागणीसाठी शेतकरी आणि लोकप्रतिनिधी सतत जिल्हाधिकारी कार्यालयाकडे खेटे घालत आहेत. अशा परिस्थितीत सत्ताधारी आणि विरोधी बाजूच्या काही मोठ्या नेत्यांनी स्वतःच्या किंवा आपल्या मुलांच्या वाढदिवसानिमित्त लावणी आणि मनोरंजनाचे मोठे कार्यक्रम आयोजित केल्याने जिल्ह्यातील राजकीय वातावरण चांगलेच तापले आहे.

मिळालेल्या माहितीनुसार, भाजपचे नेते आणि मंत्री जयकुमार रावल यांच्या मुलाच्या वाढदिवसानिमित्त लावणी व इतर मनोरंजनात्मक कार्यक्रमांचे आयोजन करण्यात आले होते. यावरून विरोधकांनी त्यांच्यावर टीका केली आहे. धुळे जिल्हा दुष्काळी यादीत समाविष्ट करण्यासाठी रावल यांनी प्रशासकीय पातळीवर प्रयत्न करणे गरजेचे होते, मात्र ते उलट शेतकऱ्यांच्या जखमेवर मीठ चोळण्याचे काम करत असल्याचा थेट आरोप विरोधकांनी केला आहे.

त्याचबरोबर भाजप नेते कुणाल पाटील यांच्या वाढदिवसानिमित्त प्रसिद्ध नृत्यांगना गौतमी पाटील यांच्या नृत्याचा कार्यक्रम थेट आयोजित करण्यात आला. दुष्काळाच्या परिस्थितीत असा कार्यक्रम घेऊन पाण्यासारखा पैसा उधळल्याबद्दल स्थानिक नागरिक आणि शेतकऱ्यांमध्ये तीव्र संताप आहे. सोशल मीडियावरही या दोन्ही नेत्यांवर नेटकऱ्यांनी टीकेची झोड उठवली आहे.

शेतकरी पावसाअभावी आणि पिकांच्या नुकसानीमुळे होरपळत असताना नेत्यांनी वाढदिवस आणि मनोरंजनावर एवढा खर्च करणे योग्य आहे का, असा सवाल आता उपस्थित होत आहे. शिवसेना (उद्धव बाळासाहेब ठाकरे) पक्ष आणि महाराष्ट्र राज्य किसान सभेच्या पदाधिकाऱ्यांनी दोन्ही नेत्यांचा जाहीर निषेध केला आहे.

शिवसेना (उद्धव बाळासाहेब ठाकरे) पक्षाचे धुळे जिल्हाध्यक्ष नानाभाऊ सोनवणे यांनी म्हटले की, दुष्काळात शेतकरी पाण्यासाठी आणि मदतीसाठी टाहो फोडत असताना अशा प्रकारचे मनोरंजनात्मक कार्यक्रम आयोजित करणे अत्यंत बेजबाबदारपणाचे आहे.

महाराष्ट्र राज्य किसान सभेचे प्रदेशाध्यक्ष हिरालाल परदेशी यांनीही टीका करताना म्हटले की, जिल्ह्यात गंभीर दुष्काळी परिस्थिती असताना लोकप्रतिनिधींनी शेतकऱ्यांना मदत मिळवून देण्यासाठी पाठपुरावा करायचा सोडून वाढदिवसाचे उत्सव साजरे करण्यात धन्यता मानणे ही शेतकऱ्यांची क्रूर चेष्टा आहे.

माजी आमदार अनिल गोटे यांनीही महायुती सरकारवर टीका केली. त्यांनी सांगितले की, धुळे जिल्ह्यात केवळ 65 टक्के पाऊस झाला असूनही सरकारने अजून दुष्काळ जाहीर केलेला नाही, आणि अशा भीषण परिस्थितीत भाजपचे माजी आमदार कुणाल पाटील यांनी वाढदिवसानिमित्त गौतमी पाटील यांच्या नृत्याचा कार्यक्रम घेऊन जल्लोष केला. विरोधी पक्षाच्या मागण्यांकडे दुर्लक्ष करून सत्ताधारी निष्काळजीपणा दाखवत आहेत, शेतकऱ्यांच्या पाठीशी उभे राहण्याऐवजी नेत्यांनी केलेला हा पैशांचा अपव्यय लाजीरवाणा आहे, आणि आज धुळ्यातील शेतकरी असहाय्य झाला असून त्याच्याकडे पश्चाताप करण्याशिवाय काही उरलेले नाही, अशी संतप्त प्रतिक्रिया अनिल गोटे यांनी दिली.