दमपूर मोहदा गावात अवैध दारू विक्रीविरोधात ग्रामस्थांची मागणी; ठाणेदारांचे कडक कारवाईचे आश्वासन

जिवती तालुक्यातील दमपूर मोहदा गावात अवैध दारू विक्री वाढल्याने ग्रामस्थांनी पोलिसांकडे कारवाईची मागणी केली आहे. या वाढत्या विक्रीमुळे गावातील सामाजिक शांतता आणि सुव्यवस्था धोक्यात आल्याची चिंता गावकऱ्यांनी बोलून दाखवली.

अवैध दारूमुळे गावातील तरुण मोठ्या प्रमाणावर व्यसनाच्या गर्तेत ढकलले जात असल्याने ग्रामस्थांमध्ये तीव्र चिंता व्यक्त केली जात होती. ही गंभीर समस्या आटोक्यात आणण्यासाठी ग्रामविकास समिती, दमपूर मोहदा यांच्या वतीने जिवती पोलीस स्टेशनच्या ठाणेदारांना अवैध दारूबंदीबाबत लेखी निवेदन देण्यात आले होते. त्या निवेदनात कडक कारवाईची मागणी करण्यात आली होती.

निवेदन दिल्यानंतर गावात शांतता आणि सुरक्षिततेचे वातावरण कायम राहावे, तसेच ग्रामस्थांमध्ये जनजागृती व्हावी, या उद्देशाने ग्रामविकास समितीने जिवती पोलीस स्टेशनच्या ठाणेदारांना गावात येण्याचे निमंत्रण दिले होते. त्या निमंत्रणाला प्रतिसाद देत पोलीस प्रशासनाच्या वतीने ग्रामस्थांसोबत एक विशेष जनजागृती व शांतता बैठक पार पडली.

या बैठकीत बोलताना ठाणेदारांनी ग्रामस्थांना आश्वासन दिले की, दमपूर मोहदा गावातील अवैध दारू विक्रीवर तातडीने धाडी टाकल्या जातील आणि संबंधितांवर कडक कायदेशीर कारवाई केली जाईल. कोणत्याही परिस्थितीत अवैध धंदे सहन केले जाणार नाहीत, असा इशारा त्यांनी दिला.

गावात कुठेही अवैध दारू विक्री किंवा इतर बेकायदेशीर प्रकार आढळल्यास गावकऱ्यांनी न घाबरता पोलिसांना माहिती द्यावी, असे आवाहनही ठाणेदारांनी केले. माहिती देणाऱ्यांचे नाव गुप्त ठेवले जाईल, अशी ग्वाहीही त्यांनी दिली.

या बैठकीला ग्रामविकास समिती, दमपूर मोहदाचे सर्व सदस्य, गावातील प्रतिष्ठित नागरिक, महिला मंडळाच्या प्रतिनिधी तसेच मोठ्या संख्येने ग्रामस्थ उपस्थित होते. पोलिसांनी घेतलेल्या पुढाकारामुळे आणि दिलेल्या आश्वासनामुळे ग्रामस्थांमध्ये समाधानाचे वातावरण निर्माण झाले आहे. गावात पूर्ण दारूबंदी व्हावी, अशी अपेक्षा आता व्यक्त केली जात आहे.